ލަންޑަންގެ ބަސްތަކާއި ޓްރާންސްޕޯޓް ވިއުގާގައި ރާއްޖެއާއި ލިވަޕޫލްގެ ވާހަކަ

ދުނިޔޭގެ އެންމެ ދުވަސްވީ ޓްރާންސްޕޯޓް ވިއުގަ އޮންނަ ލަންޑަންގައި ދުއްވާ ގިނަ އަދަދެއްގެ ބަސްތަކާއި ކާރުތަކުގައި ރާއްޖެއާއި ލިވަޕޫލްގެ ގުޅުމުގެ މަންޒަރުތަކާއެކު  ޓޫރިޒަމް ކެމްޕޭނެއް ފަށައިފި އެވެ. 

ޕްރިމިއަ ލީގްގެ އެންމެ މަޝްހޫރު އެއް ކްލަބް ކަމަށްވާ ލިވަޕޫލްގެ ޑެސްޓިނޭޝަން ޕާޓްނަރަކަށް ރާއްޖެވުމާއެކު ފެށި މި ކެމްޕޭންތަކާ ބެހޭ ގޮތުން އެމްއެމްޕީއާރުސީ އިން ބުނީ ލިވަޕޫލް އެފްސީ އާއި ރާއްޖޭގެ ޕާޓްނާޝިލް އިސްތިހާރު ކުރަން ހައި އިމްޕެކްޓް ޑިޖިޓަލް އިސްތިހާރުތަކާއެކު ކެމްޕޭނެއް ފަށާފައިވާ ކަމަށެވެ. 

މި ކެމްޕޭންގެ ދަށުން ލަންޑަންގެ 100 އަށްވުރެ ގިނަ ޓެކްސީ އާއި ބަސްތަކުގައި ރާއްޖޭގެ ރީތި މަންޒަރުތައް ވަނީ ޖަހާފަ އެވެ. މީގެ އިތުރުން ލަންޑަންގެ ރޭލްވޭ ވިއުގައިގައި ވެސް ރާއްޖޭގެ ޑިޖިޓަލް އިސްތިހާރު ތަކެއް ވަނީ ޖަހާފަ އެވެ. އަދި ބިމުއަޑީގެ މަގުތަކާއި ބިޒްނަސް ލައުންޖުތަކުގައި ވެސް ރާއްޖޭގެ އިސްތިހާރު ތަކެއް ވަނީ ޖަހާފަ އެވެ. 

އެ ކުންފުނިން ބުނީ މި އިސްތިހާރުތަކުގެ ސަބަބުން 76 މިލިއަން ޓާގެޓް އޯޑިއަންސަކަށް ރާއްޖޭގެ ވާހަކަތައް ގެންގޮސްދީ މަތީ ފަންތީގެ މަންޒިލެއްގެ ގޮތުގައި ރާއްޖެ އޮތް މަގާމު ވަރުގަދަ ވެގެންދާނެ އެވެ. 

އެމްއެމްޕީއާރުސީން ވަނީ ލިވަޕޫލް ބޭނުންކޮށްގެން ޔޫކޭގެ އިތުރުން އިންޑިއާ އާއި ޗައިނާގެ ޓާގެޓް އޯޑިއެންސްތަކަށް ހާއްސަ ކެމްޕޭނެއް ވަނީ ފަށާފަ އެވެ. ރާއްޖެއާއި ލިވަޕޫލް އެފްސީއާއެކު ހެދި އެއްބަސްވުމުގެ ދަށުން ދުނިޔޭގެ 100 ގައުމެއްގައި ހިންގާ 316 ލިވަޕޫލްގެ އޮފިޝަލް ފޭން ކްލަބްތައް މެދުވެރިކޮށް ވެސް ކެޕޭންތައް ހިންގަން ވަނީ ފުރުސަތު ލިބިފަ އެވެ. 

އެ ކުންފުނިން ބުނީ ލިވަޕޫލް އެފްސީއާއެކު ކުރިއަށް ގެންދާ މި ޕާޓްނާޝިޕްގެ ސަބަބުން 2025 ވަނަ އަހަރު އެއް ލައްކައަށް ވުރެ ގިނަ ފަތުރުވެރިން ރާއްޖެ އަންނާނެ ކަމަށް ލަފާކުރެވޭއިރު ފަތުރުވެރިކަމުގެ އާމްދަނީގެ ގޮތުގައި ގާތްގަނޑަކަށް 200 މިލިއަން ޑޮލަރު ލިބޭނެ ކަމަށް ބެލެވެ އެވެ. މި ކެމްޕޭނުގައި ޖުމްލަ 2.5 މިލިއަން ޑޮލަރުގެ އިންވެސްޓްމަންޓެއް ކުރާއިރު އަހަރަކު އިނީޝިއަލް އިންވެސްޓްމަންޓަށް 20 ގުނަ އިތުރުވާނެ ކަމަށް ލަފާކުރެވޭ ރިޓާން އޮން އިންވެސްޓްމަންޓް ރާއްޖެއަށް ލިބޭނެ އެވެ. މި ކެމްޕޭންގެ ދަށުން ރާއްޖެއަށް ލިވަޕޫލް ޓީމު އައުމާއެކު އެ ކްލަބުގެ ކުޅުންތެރިން ބޭނުންކޮށްގެން އެ ކުޅުންތެރިން ނިސްބަތްވާ ގައުމުގައި ރާއްޖެ އިސްތިހާރު ކުރުންފަދަ ކަންކަން ކުރަން މަގުފަހިވާނެ އެވެ.