ޓީޖީއެސްޓީގެ ޖުމުލަ އާމްދަނީއަށް 5 ޕަސެންޓުގެ އިތުރުވުމެއް

މި އަހަރުގެ މިހާތަނަށް ޓޫރިޒަމް ޖީއެެސްޓީ (ޓީޖީއެސްޓީ) އަށް 10 ޕަސެންޓުގެ އިތުރުވުމެއް ލިބިފައިވާއިރު ޖުމްލަ އާމްދަނީ ފަސް ޕަސެންޓް އިތުރުވެފައިވާ ކަމަށް ދައްކައިފި އެވެ. 

ފިނޭންސުގެ ހަފުތާގެ މާލީ ހިސާބުތައް ދައްކާ ގޮތުގައި އިމްޕޯޓް ޑިއުޓީ ނޫން ހުރިހާ އާމްދަނީއެއް ވަނީ މަތިވެފަ އެވެ. މިގޮތުން ޓެކުހުގެ އާމްދަނީގެ ގޮތުގައި މިހާތަނަށް އެއް ޕަސެންޓުގެ އިތުރުވުމަކާއެކު 6.3 ބިލިއަން ރުފިޔާ ލިބިފައިވެ އެވެ. މިދިޔަ އަހަރު ލިބުނީ 6.2 ބިލިއަން ރުފިޔާ އެވެ. އަދި ޓެކްސް ނޫން ގޮތްގޮތުން އާމްދަނީގެ ގޮތުގައި މި އަހަރު 1.5 ބިލިއަން ރުފިޔާ ލިބިފައިވެ އެވެ. މިދިޔަ އަހަރު ލިބުނީ 1.2 ބިލިއަން ރުފިޔާ އެވެ. 

ޓޫރިޒަމް ޖީއެސްޓީގެ ގޮތުގައި މިހާތަނަށް 2.4 ބިލިއަން ރުފިޔާ ވަނީ ލިބިފަ އެވެ. މި ޓެކުހުން މިދިޔަ އަހަރުގެ މި މުއްދަތުގައި ލިބިފައިވަނީ 2.2 ބިލިއަން ރުފިޔާ އެވެ. މިއީ ގާތްގަނޑަކަށް 10 ޕަސެންޓުގެ އިތުރުވުމެކެވެ. މީގެ އިތުރުން މިދިޔަ އަހަރާ އަޅާބަލާއިރު ގްރީން ޓެކުހުގެ އާމްދަނީއަށް ވަނީ 60 ޕަސެންޓުގެ އިތުރުވުމެއް ލިބިފަ އެވެ.  

ޓެކުސް ނޫން އާމްދަނީގެ ތެރޭން އިތުރުވީ ފީ އާއި ޗާޖުގެ ގޮތުގައި މި އަހަރު ލިބުނު އެއް ބިލިއަން ރުފިޔާ އެވެ. މި ބައިން މިދިޔަ އަހަރު ލިބިފައިވަނީ 511 މިލިއަން ރުފިޔާ އެވެ. މީގެ އިތުރުން އެއާޕޯޓް ޑިވްލޮޕްމަންޓް ފީގެ ގޮތުގައި 283.6 މިލިއަން ލިބިފައިވެ އެވެ. 

ފިނޭންސުގެ ހިސާބުތައް ދައްކާ ގޮތުގައި މި އަހަރުގެ މިހާތަނަށް ހިލޭ އެހީގެ ގޮތުގައި ލިބިފައިވަނީ 43.9 މިލިއަން ރުފިޔާ އެވެ. މިދިޔަ އަހަރު ހިލޭ އެހީއަށް ލިބުނީ 28.7 މިލިއަން ރުފިޔާ އެވެ. 

މި އަހަރުގެ ބަޖެޓަކީ 56.6 ބިލިއަން ރުފިޔާ އެވެ. މި ބަޖެޓުގައި ހިލޭ އެހީއާއި އާމްދަނީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކޮށްފައިވެ އެވެ. އެއީ ހިލޭ އެހީގެ ގޮތުގައި ލިބޭނެކަމަށް އަންދާޒާކުރާ 2.5 ބިލިއަން ރުފިޔާއާއި، އާމްދަނީގެ ގޮތުގައި ލިބޭނެކަމަށް އަންދާޒާކުރާ 37.2 ބިލިއަން ރުފިޔާ އެވެ. ޖުމްލަ އާމްދަނީީއާއި ހިލޭ އެހީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކުރާއިރު ދައުލަތުގެ ހަރަދުތަކަށް ހިނގާނެކަމަށް ލަފާކުރަނީ 49.2 ބިލިއަން ރުފިޔާ އެވެ. އެއިން 35.8 ބިލިއަން ރުފިޔާއަކީ ރިކަރަންޓު ހަރަދުތަކެވެ. އަދި ކެޕިޓަލް ހަރަދުގެ ގޮތުގައި 13.4 ބިލިއަން ރުފިޔާ ހަރަދުވާނެކަމަށް ލަފާކޮށްފައިވެ އެވެ. އެއިން 12.4 ބިލިއަން ރުފިޔާއަކީ ޕީއެސްއައިޕީ މަޝްރޫއުތަކަށް ހިނގާނެކަމަށް ބެލެވޭ ހަރަދެވެ.