ރައީސް، ނޫސްވެރިއަކަށް ބިރު ދެއްކިކަމުގެ ހެކި ނެތް، ދައުވާނުކުރާނެ

ރައީސް ޑރ. މުހައްމަދު މުއިއްޒު، ނޫސްވެރިއަކަށް ފޯނުން ގުޅުއްވައި ބިރު ދައްކައި، އިންޒާރު ދެއްވި ކަމަށް ދައުވާ ކުރެވޭނެ މިންވަރަށް ގާނޫނު ބަޔާންކުރާ ހެކި ނެތް ކަމަށް ބުނެ، އެ މަނިކުފާނުގެ މައްޗަށް ދައުވާ ނުކުރަން ޕީޖީ އޮފީހުން ނިންމައިފި އެވެ.

ޕީޖީ އޮފީހުން މިރޭ ނެރުނު ބަޔާނެއްގައި ބުނީ، ރައީސް މުއިއްޒު، 'އަދަދު' ނޫހުގެ ނޫސްވެރިޔާ އަދި ސީ.އީ.އޯ ހުސައިން ފިޔާޒު މޫސާއަށް ފޯނުން ގުޅުއްވައި، ބިރު ދައްކައި އިންޒާރުދީފައިވާކަމަށް ބުނެ ދިވެހި ފުލުހުންގެ ހިދުމަތަށް ހުށަހެޅި މައްސަލަ އެ ހިދުމަތުން ތަހުގީގު ކުރުމަށްފަހު، އިއްޔެގެ ވަގުތެއްގައި ޑިއުޓީ ޕްރޮސިކިއުޝަނަށް ހުށަހަޅާފައިވާ ކަމަށެވެ.

ނަމަވެސް، ފުލުހުންގެ ހިދުމަތުން ހޯދާފައިވާ ހެކި ގަރީނާ ދިރާސާކޮށް ބެލިއިރު، ރައީސް، ފިޔާޒުއަށް ގުޅައި އިންޒާރު ދިންކަމަށް ގާނޫނީ ގޮތުން މާނަކުރެވޭނެ ފަދަ ބަހެއް ނުވަތަ އިބާރާތެއް ބޭނުންކުރައްވާފައިވާކަން އެނގެން ނެތުމުން މި މައްސަލައިގައި ދައުވާ ނުކުރުމަށް ނިންމާފައިވާ ކަމަށް އެ ބަޔާނުގައި ޕީޖީ އޮފީހުން ބުންޏެވެ.

ނަމަވެސް، ފިޔާޒްގެ ފަރާތުން ފުލުހަށް މައްސަލަ ހުށަހަޅުއްވާފައިވަނީ، ރައީސް މުއިއްޒު އޭނާއަށް ގުޅުއްވައި ދެއްކެވި ވާހަކަފުޅެއްގެ ތެރޭގައި "ގާނޫނީ ގޮތުން އެންމެ ހަރުކަށި ފިޔަވަޅު އަޅުއްވާނެކަމަށް" ވިދާޅުވެ އޭނާއަށް އިންޒާރު ދީފައިވާކަމަށް ބަޔާންކޮށް ކަމަށް ޕީޖީ އޮފީހުން ވަނީ ފާހަގަކޮށްފަ އެވެ.

"...މިއީ އިސްވެ ދެންނެވުނު ގާނޫނީ ނައްސުތަކަށް ފެތޭ އިންޒާރުދިނުމުގެ އަމަލަކަށްނުވާތީ މިއީ ޖިނާއީ ދައުވާއެއް ކުރެވޭނެ މައްސަލައެއް ނޫންކަމަށް މި އޮފީހުން ނިންމީ އެވެ."