ހިޔާނާތުގެ މައްސަލައިގައި ބަންދުކުރި އިމިގްރޭޝަން މުވައްޒަފުންގެ ވަނަވަރު އާންމުކޮށްފި

މަގާމުގެ ނުފޫޒު ނަހަމަ ގޮތުގައި ބޭނުންކުރި ކަމުގެ ތުހުމަތުގައި ބަންދުކޮށްފައި ތިބި އިމިގްރޭޝަން މުވައްޒަފުންގެ ވަނަވަރު މިރޭ ފުލުހުން އާންމުކޮށްފި އެވެ. 

މި މައްސަލައިގައި މިދިޔަ ބުރާސްފަތި ދުވަހުގެ ރޭ ހައްޔަރު ކޮށްފައި ވަނީ ތ. ބުރުނި، މޫނިމާގޭ މުހައްމަދު އަލްސަން އިސްމާއިލް (21އ) އާއި ގ. ހެޕީސައިޑް، އިބްރާހިމް އަހުމަދު (37އ) އާއި އެގޭ ހަސަން ސެހެޝާން (47އ) އެވެ.

އަދި ކުރީގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު (36އ) ހައްޔަރުކޮށްފައި ވަނީ ހުކުރު ދުވަހުގެ ރެއެވެ.

އޭގެ އިތުރުން މިއަދު މ. ހާޒާރީވިލާ، އަހުމަދު ލައްސާން (40އ) ހައްޔަރު ކޮށްފައިވާ ކަމަށް ވެސް ފުލުހުން ވަނީ ބުނެފަ އެވެ.

ޝަމްއާންގެ މައްޗަށް ކުރަނީ އިމިގްރޭޝަންގެ ޑިިޓެންޝަނަށް ގެންދިޔަ ބިދޭސީއެއް ދޫކޮށްލުމަށްފަހު އެމީހާގެ ގެއިން ހޯދި ގިނަ އަދަދެއްގެ ފައިސާ ނެގުމަށްފަހު އަމިއްލަ ގޭގައި ބެހެއްޓި ކަމުގެ ތުހުމަތެވެ. 

އެކަމުގައި އެހެން މުވައްޒަފުން ވަނީ އެހީތެރިވެފަ އެވެ. ހައްޔަރު ކޮށްފައިވާ އެހެން މީހުންނަށް ކުރާ ތުހުމަތުތައް ފުލުހުން ހާމަކޮށްފައެއް ނުވެ އެވެ.

ފުލުހުން މިއަދު ބުނީ މި މައްސަލައާ ގުޅިގެން ޝަމްއާންގެ އާއިލާ މީހެއްގެ ފޯނު ކޯޓު އަމުރެއްގެ ދަށުން ހިފަހައްޓާފައިވާ ކަމަށެވެ. އެނގިފައިވާ ގޮތުން އެއީ ޝަމްއާންގެ އަނބިކަނބަލުންގެ ފޯނެވެ.