މާފުށީ ޖަލުގައި ގައިދީއަކު މަރުވެފައި އޮއްވާ ފެނިއްޖެ

މާފުށީ ޖަލުގައި ހުކުމެއް ތަންފީޒު ކުރަމުން ދިޔަ ގައިދީއަކު މިއަދު މަރުވެފައި އޮއްވައި ފެނިއްޖެ އެވެ.

ޖަލުގައި ހުއްޓައި މަރުވީ އުމުރުން 23 އަހަރުގެ ސ. މަރަދޫ، ފޯ ފްލާވާ، އިބްރާހިމް ޝަމްވީލެވެ.

މޯލްޑިވްސް ކަރެކްޝަނަލަށް ސާވިސް އިން ބުނީ މިއަދު ހަވީރު 4:20 ހާއިރު ޝަމްވީލްގެ ގޮޅީގައި ދަންޖެހިފައި ހުއްޓައި ފެނިފައިވާ ކަމަށެވެ. ފެނުމާއެކު ވަގުތުން އޭނާ މާފުށީ ހޮސްޕިޓަލަށް ގެންގޮސްފައިވާ ކަމަށް ވެސް ބުންޏެވެ. 

އޭނާ މަރުވެފައިވާ ކަމަށް ޑޮކްޓަރުން ކަނޑައަޅާފައި ވަނީ ހަވީރު 4:55 ގައެވެ.

ކަރެކްޝަނުން ބުނީ ޝަމްވީލަކީ މީހެއްގެ ފުރާނައަށް ގެއްލުމެއް ދީފާނެކަމުގެ ބިރުދައްކައި، އެފަދަ ކަމެއް ކޮށްފާނެ ކަމުގެ ކުށުގައި އެއް އަހަރާއި ހަ މަސް ދުވަހުގެ ހުކުމެއް ތަންފީޒު ކުރަމުންދިޔަ މީހެއް ކަމަށެވެ.

ޝަމްވީލް މަރުވުމާ ގުޅިގެން ވަގުތުން އެކަން ފުލުހުންނަށާއި އޭނާގެ ޢާއިލާއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިވާ ކަމަށް ވެސް ކަރެކްޝަނުން ބުންޏެވެ.