މިހާތަނަށް ލިބުނީ 7.1 ބިލިއަން، ހަރަދުވީ 5.1 ބިލިއަން

މިހާތަނަށް ދައުލަތަށް ހިލޭ އެހީ އާއި އާމްދަނީގެ ގޮތުގައި 7.1 ބިލިއަން ރުފިޔާ ލިބުނުއިރު، މިހާތަނަށް 5.1 ބިލިއަން ރުފިޔާ ހަރަދުވެފައިވާ ކަމަށް ދައްކައިފި އެވެ. 

ފިނޭންސް މިނިސްޓްރީން އާއްމުކުރި އެންމެފަހުގެ ހަފުތާގެ މާލީ ހިސާބުތައް ދައްކާ ގޮތުން މި އަހަރުގެ މިހާތަނަށް ހިލޭ އެހީ އާއި އާމްދަނީގެ ގޮތުގައި 7.1 ބިލިއަން ރުފިޔާ ވަނީ ލިބިފަ އެވެ. މިއީ މިދިޔަ އަހަރުގެ މި މުއްދަތުގައިވެސް ގާތްގަނޑަކަށް ލިބުނު އާމްދަނީ އެވެ. މި މުއްދަތުގައި ޓެކުހުގެ އާމްދަނީގެ ގޮތުގައި ލިބިފައިވަނީ 5.9 ބިލިއަން ރުފިޔާ އެވެ. މިދިޔަ އަހަރު ލިބިފައިވަނީ ހަ ބިލިއަން ރުފިޔާ އެވެ. 

ހިސާބުތައް ދައްކާ ގޮތުގައި މި އަހަރުގެ މިހާތަނަށ ޓެކްސް ނޫން އާމްދަނީގެ ގޮތުގައި ލިބޭ އަދަދު އިތުރުވެފައިވެ އެވެ. ޓެކްސް ނޫން އާމްދަނީގެ ގޮތުގައި މިހާތަނަށް 1.2 ބިލިއަން ރުފިޔާ ލިބުނުއިރު މިދިޔަ އަހަރު ލިބުނީ އެއް ބިލިއަން ރުފިޔާ އެވެ. ހިލޭ އެގީއަށް މި އަހަރު 40 މިލިއަން ރުފިޔާ ލިބުނުއިރު މިދިޔަ އަހަރު ލިބިފައިވަނި 28 މިލިއަން ރުފިޔާ އެވެ. 

މި އަހަރުގެ ބަޖެޓުން މިހާތަނަށް ޖުމްލަ ހަރަދުގެ ގޮތުގައި ހަރަދުކޮށްފައިވަނީ 5.7 ބިލިއަން ރުފިޔާ އެވެ. ނަމަވެސް މިދިޔަ އަހަރުގެ ހަރަދު ހުރީ 7.4 ބިލިއަން ރުފިޔާގަ އެވެ. މިހާތަނަށް މުސާރަދޭން 2.4 ބިލިއަން ހަރަދުކޮށްފައިވެ އެވެ. މިދިޔަ އަހަރު މުސާރައަށް ހަރަދުކޮށްފައިވަނީ 2.2 ބިލިއަން ރުފިޔާ އެވެ. އަދި ހިންގުމުގެ ހަރަދުތަކަށް މި އަހަރު 2.9 ބިލިއަން ރުފިޔާ ހަރަދުކޮށްފައިވެ އެވެ. މިދިޔަ އަހަރު މިބައިގެ ހަރަދު ހުރީ 3.6 ބިލިއަން ރުފިޔާގަ އެވެ.