ވޭޕް ވިއްކަމުން ދިޔަ ދެ ތަނެއް ރެއިޑްކޮށް، މީހަކު ހައްޔަރު ކޮށްފި

މާލޭގައި ގަވާއިދާ ހިލާފަށް ވޭފްގެ ވިޔަފާރިކުރާކަަމަށް ފުލުުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ދެ ތަނެއް ރެއިޑްކޮށް، މީހަކު ހައްޔަރު ކޮށްފި އެވެ.

ފުލުހުން ބުނީ ރޭ ހިންގި މި އޮޕަރޭޝަނުގައި، ވޭޕް ވިއްކައި ވިޔަފާރިކުރާ ކަމަށް ތުހުމަތުކުރެވޭ މީހަކު ދިރިއުޅޭ ތަނާއި އޭނާ މަސައްކަތްކުރާ ކެފޭ ބަލައި ފާސްކޮށްފައިވާ ކަމަށެވެ.

އެތަންތަން ބަލައިފާސްކުރުމުގެ ތެރޭގައި 84 ވޭޕް ކާޓްރިޖްއާއި ވޭޕް ވިއްކައިގެން ހޯދާފައިވާ ކަމަށް ތުހުމަތުކުރެވޭ ފައިސާ ފުލުހުން ވަނީ ހޯދާފަ އެވެ.

މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 27 އަހަރުގެ އެމްޑީ އަބޫ ސުފްޔާން ކިޔާ ބަންގްލަދޭޝް މީހެކެވެ. އެމީހާގެ ވަނަވަރު ވެސް ފުލުހުން އާންމުކޮށްފައިވެ އެވެ.

ފުލުހުން ދެވަނައަށް ރެއިޑް ކޮށްފައި ވަނީ ގަލޮޅުގައި ހުންނަ ފިހާރައެކެވެ. އެތަނުގައި ވޭޕްގެ ވިޔަފާރިކުރާ ކަމަށް ތުހުމަތުކުރެވޭ މައްސަލައާ ގުޅިގެން އެ ފިހާރަ ބަލައިފާސްކޮށް ގިނަ އަދަދެއްގެ ވޭޕް ފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ.

މި އޮޕަރޭޝަނުގައި، ފުލުހުންގެ އިތުރުން ހެލްތު މިނިސްޓްރީ އާއި އިކޮނޮމިކް މިނިސްޓްރީ ވަނީ ބައިވެރިވެފަ އެވެ.

މި ދެ މައްސަލަ ވެސް ތަހުގީގު ކުރަމުންދާ ކަމަށް ފުލުހުން ބުންޏެވެ.

ރާއްޖޭގައި ވޭޕް ބޭނުން ކުރުމާއި ގެންގުޅުން އަދި ވިޔަފާރި ކުރުމަކީ މިހާރު ގާނޫނުން މަނާކޮށްފައިވާ ކަމެކެވެ. އެފަދަ ކަމެއް ކޮށްފި މީހުންނަށް އަދަބު ކަނޑައެޅޭ ގޮތަށް ގާނޫނު ވަނީ އިސްލާހުކޮށްފަ އެވެ.