ޝަރުއީ ނިޒާމަށް ރައީސް ނުފޫޒެއް ނުފޯރުވާނެ: ޕީއެންސީ

މިނިވަން މުއައްސަސާތަކަށް މުސްތަގިއްލުކަމާއެކު އެ މުއައްސަސާތަކާ މަތިކުރެވިފައިވާ ދުއްތޫރީ އަދި ގާނޫނީ ޒިންމާ އަދާކުރުމުގެ ފުރުސަތު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިކަން ފާހަގަކޮށް، ޝަރުއީ ނިޒާމަށް އެމަނިކުފާނު ނުފޫޒު ފޯރުވަމުން ގެންދަވާ ކަމަށް ކުރަމުންދާ ތުހުމަތުތައް ޕީއެންސީން ދޮގުކޮށްފި އެވެ.

ރައީސް ދިފާއު ކުރައްވައި ޕީއެންސީން މިއަދު ބަޔާނެއް ނެރެފައި މިވަނީ ސުޕްރީމް ކޯޓުގެ ފަނޑިޔާރުކަމުން ހުސްނުއްސުއޫދު އިއްޔެ އިސްތިއުފާ ދެއްވައި، އެ ކޯޓުގައި އޮތް މައްސަލައަކަށް ރައީސް ނުފޫޒު ފޯރުވުމަށް މަސައްކަތް ކުރައްވާ ކަމުގެ ތުހުމަތު ކުރައްވާފައި ވަނިކޮށެވެ. އިސްތިއުފާ ދެއްވައި އެންމެ ފުރަތަމަ ސިޓީ ފޮނުއްވީ ވެސް ރައީސަށެވެ.

ޕީއެންސީން ނެރުނު ބަޔާނުގައި ބުނެފައި ވަނީ ރާއްޖޭގައި އޮތް ދުސްތޫރީ ނިޒާމަކީ ބާރުތައް ވަކިވެފައިވާ ނިޒާމެއް ކަމަށެވެ. ތިން ބާރުގެ ތެރެއިން ޝަރުއީ ބާރަކީ ސިޔާސީ ކަންކަމާއި ދުރުން، ރައްޔިތުންގެ ހައްގުތައް ކަށަވަރުކޮށްދީ، އަދުލު އިންސާފު ގާއިމްކޮށްދިނުމުގެ މަތިވެރި ޒިންމާ ހަވާލުކުރެވިފައިވާ ބައެއް ކަމަށެވެ.

އަދި، ފަނޑިޔާރު ކަމުގައި މަގާމުގައާއި އަދި އެ މަގާމަށް ވަޑައިގަތުމުގައި ވެސް ފަނޑިޔާރުން ސިޔާސީ ވިސްނުމާއި އެކްޓިވިޒަމްގެ އުސޫލު އިސްކުރުމަކީ ގާނޫނީ ނިޒާމުތައް ދަންނަ ކަމެއް ނޫން ކަމަށާއި، އެއީ މުޅި ޖުޑިޝަރީގެ އިތުބާރު ގެއްލި، ޝަރުއީ ދާއިރާ ސިޔާސީ ވާދަވެރިކަމުގެ ތެރެއަށް ވަނުމުގެ ހިތްވަރުދޭ ކަމެއް ކަމަށް އެ ބަޔާނުގައިވެ އެވެ.

"އިއްޔެ ސުޕްރީމް ކޯޓުގެ ފަނޑިޔާރު ހުސްނުއްސުއޫދު އިސްތިއުފާދެއްވައި އަމަލުކުރެއްވި ގޮތުން ފަނޑިޔާރު ސުއޫދު ދިވެހިރާއްޖޭގެ އެންމެ މަތީ ކޯޓުގެ ފަނޑިޔާރުކަމުގައިވެސް ގެންގުޅުއްވީ އެ މަގާމަށް ވަޑައިގަތުމުގެ ކުރިންވެސް ގެންގުޅުއްވި ސިޔާސީ އެކްޓިވިޒަމްގެ އުސޫލުތައްކަން ސާފުވެއްޖެ،" ޕީއެންސީގެ ބަޔާނުގައިވެ އެވެ.

އެޕާޓީން ބުނީ ސުއޫދު އިސްތިއުފާ ދެއްވުމަށްފަހު ފަނޑިޔާރުންގެ ގާނޫނުގައިވާ ފަދައިން ޖުޑިޝަން ސާވިސް ކޮމިޝަން (ޖޭއެސްސީ) އަށް އިސްތިއުފާ ހުށަހެޅުމުގެ ބަދަލުގައި ރައީސަށް އެޑްރެސް ކުރައްވައި ސިޓީ ފޮނުއްވީ އެއްވެސް އަސާސެއް ނެތް ތުހުމަތުތަކެއް އެމަނިކުފާނުގެ އިސްތަށިފުޅުގައި އެޅުއްވުމަށް ކަމަށެވެ. އެއީ ސުއޫދު ސިޔާސީ ވާދަވެރިކަމުގެ ތެރެއަށް ވަދެވަޑައިގެން ހުންނެވި ކަމުގެ އަލިގަދަ ހެއްކެއް ކަމަށެވެ.

ފަނޑިޔާރު ސުއޫދު ސަސްޕެންޑް ކުރީ 2019 ވަނަ އަހަރު 19 ވަނަ ރައްޔިތުންގެ މަޖިލީހުން ޖޭއެސްސީގެ ގާނޫނަށް ގެނައި އިސްލާހެއްގެ ދަށުން ކަމަށާއި އެއީ ފަނޑިޔާރުންގެ މައްޗަށް ޖިނާއީ ތަހުގީގެއް ހިންގާނަމަ އަމަލުކުރަން ޖެހޭ ގޮތް ކަމަށް ވެސް އެ ބަޔާނުގައި ފާހަގަކޮށްފައިވެ އެވެ.

"ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިނިވަން މުއައްސަސާތަކަށް މުސްތަގިއްލުކަމާއެކު އެ މުއައްސަސާތަކާ މަތިކުރެވިފައިވާ ދުއްތޫރީ އަދި ގާނޫނީ ޒިންމާ އަދާކުރުމުގެ ފުރުސަތު ދެއްވާފައި. އަދި އެފަދަ މުއައްސަސާއަކުން އަދާކުރަން ޖެހޭ ޒިންމާއެއް އަދާކުރުމުމަކީ ޝަރުއީ ދާއިރާއަށް ނުފޫޒު ފޯރުވުމެއް ނޫން. އެއީ ދުސްތޫރީ ގާނޫނީ ނިޒާމު ހިނގަންޖެހޭ ގޮތަށް ރަނގަޅަށް ހިނގަމުންދާ ދިއުން،"

ރައީސަށް އިއްޔެ ސުއޫދު ފޮނުއްވި އެ ސިޓީގައި، ރައްޔިތުންގެ މަޖިލީހަށް އިންތިހާބުވާ ސިޔާސީ ޕާޓީއަކުން ވަކިވެއްޖެނަމަ ނުވަތަ ޕާޓީން ވަކިކޮށްފިނަމަ، މަޖިލީހުގެ މެމްބަރުކަން ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހުގެ މައްސަލަ ސުޕްރީމް ކޯޓުން ބެއްލުން ހުއްޓުވަން، ތިން ފަނޑިޔާރުން ސަސްޕެންޑްކޮށް، ނުފޫޒު ފޯރުވާކަމަށް ވަނީ ތުހުމަތު ކުރައްވާފަ އެވެ.