މި އަހަރު ޓޫރިޒަމަށް ދަށް ފެބްރުއަރީއެއް

މި އަހަރު ފެބްރުއަރީ މަހު ރާއްޖެއަށް ޒިޔާރަތް ކުރި ޓޫރިސްޓުންގެ އަދަދު މިދިޔަ އަހަރާ އަޅާ ކިޔާނަމަ ދަށްވެއްޖެ އެވެ. 

ޓޫރިޒަމް މިނިސްޓްރީގެ ހިސާބުތައް ދައްކާ ގޮތުގައި މިދިޔަ ފެބްރުއަރީ މަހު ރާއްޖެއަށް 214,091 ޓޫރިސްޓުން އައިސްފައިވެ އެވެ. މިއީ މިދިޔަ އަހަރު ޒިޔާރަތް ކުރި 217,392 ޓޫރިސްޓުންނާ އަޅާ ބަލާއިރު -1.5 ދަށްވުމެކެވެ.  

ފެބްރުއަރީ މަހު އައި ޓޫރިސްޓުންގެ އަދަދު ދަށްވިއިރު މިއީ މިދިޔަ އަހަރު އަހަރުތެރޭ ފެބްރުއަރީ މަހު އައި ޓޫރިސްޓުންގެ އަދަދު ފެބްރުއަރީ މަހު ދަށްވި ފުރަތަމަ ފަހަރެވެ. 

މި އަހަރުގެ ފެބްރުއަރީ މަހު އައި ޓޫރިސްޓުންގެ އަދަދު ދަށްވިނަމަވެސް މުޅި އަހަރު ދުވަހަށް ބަލާއިރު އަންނަ ޓޫރިސްޓުންގެ އަދަދު މިދިޔަ އަހަރަށްވުރެ އިތުރެވެ. މި އަހަރު 445,529 ޓޫރިސްޓުން އައިސްފައިވާއިރު މިދިޔަ އަހަރު އައިސްފައިވަނީ 423,861 ޓޫރިސްޓުންނެވެ. މިއީ 5.1 ޕަސެންޓުގެ އިތުރުވުމެކެވެ. 

މުޅި އަހަރަށް ބަލާއިރު ވަކިވަކި މާކެޓުތަކުން އަންނަ ޓޫރިސްޓުންގެ އަދަދުވެސް ވަނީ އިތުރުވެފަ އެވެ. ޓޫރިސްޓުންގެ އެންމެ ގިނައިން އަންނަ ފަސް މާކެޓުން އަންނަ ޓޫރިސްޓުންގެ އަދަދު ބޮޑުތަނުން އިތުރުވަމުންދާކަމަށް ދައްކަ އެވެ. އެންމެ ގިނައިން ޓޫރިސްޓުން އަންނަ ޗައިނާއިން މިހާތަނަށް  59,641 ޓޫރިސްޓުން އައިސްފައިވެ އެވެ. 

މިދިޔަ އަހަރު ރާއްޖެއަށް ދެ މިިލިއަން ޓޫރިސްޓުން ޒިޔާރަތްކޮށްފައިވެ އެވެ. ސަރުކާރުގެ އަމާޒަކީ މި އަހަރު 2.3 މިލިއަން ޓޫރިސްޓުން ގެނައުމެވެ. މިދިޔަ އަހަރު ދެ މިލިއަން ޓޫރިސްޓުން ޒިޔާރަތް ކުރިއިރު ޓޫރިޒަމަށް 5.6 ބިލިއަން ޑޮލަރުގެ އާމްދަނީއެއް ލިބުނު ކަމަށް ރިސޯޓް އޯނަރުން ތަމްސީލް ކުރާ ޖަމިއްޔާ މަޓީން ބުނެފައިވެ އެވެ.