ވޯޓު ނުލީ މައްސަލަ އޮއްވައި، 241 އާއި މާލިއްޔަތު ކޮމިޓީން އަޒާން ވަކިކޮށްފި

ސުޕްރީމް ކޯޓުގެ ބެންޗުގެ އަދަދު މަދުކުރަން ގާނޫނަށް ގެނައި އިސްލާހު ފާސްކުރަން ރައްޔިތުންގެ މަޖިލީހުގެ ނެގި ވޯޓުގައި ހިތަދޫ މެދު ދާއިރާގެ ޕީއެންސީ މެމްބަރު އަހުމަދު އަޒާން މަރުޒޫގު ބައިވެރިވަޑައިނުގެންނެވި މައްސަލަ އޮއްވައި، މަޖިލީހުގެ މުހިންމު ދެ ކޮމިޓީއަކުން އޭނާ ވަކިކޮށްފި އެވެ. 

މަޖިލީހުގެ މިއަދުގެ ޖަލްސާ ފައްޓަވަމުން، މަޖިލީހުގެ ރައީސް އަބްދުއްރަހީމް އަބްދުﷲ ވަނީ، މަޖިލީހުގެ ކޮމިޓީތަކުގައި ޕީއެންސީ ތަމްސީލުކުރާ މެމްބަރުންނަށް ގެނެސްފައިވާ ބަދަލުތައް އިއުލާނުކުރައްވައިފަ އެވެ.

މިގޮތުން، މަޖިލީހުގެ އެންމެ މުހިންމު ދެ ކޮމިޓީކަމަށްވާ، ސަލާމަތީ ހިދުމަތްތަކުގެ (241) ކޮމިޓީ އާއި މާލިއްޔަތު ކޮމިޓީން އަޒާން ވަކިކޮށް، ޕެޓިޝަން ކޮމިޓީ އަދި އިމްތިޔާޒާއި ސުލޫކު ކޮމިޓީއަށް ވަނީ ބަދަލުކޮށްފަ އެވެ. 

އަޒާންގެ ބަދަލުގައި މާލިއްޔަތު ކޮމިޓީއަށް ހަމަޖައްސާފައި ވަނީ ހެންވޭރު އުތުރު ދާއިރާގެ މެމްބަރު އަހުމަދު އައިފާން އެވެ. 241 ކޮމިޓީއަށް ހަމަޖެއްސީ ވިލިމާލެ ދާއިރާގެ މެމްބަރު މުހައްމަދު އިސްމާއިލް އެވެ.

ސުޕްރީމް ކޯޓުގައި މިހާރު ތިއްބެވި ހަތް ފަނޑިޔާރުންގެ ބެންޗު، ފަސް ފަނޑިޔާރުންނަށް ހުށަހަޅުއްވާފައިވަނީ، ހޮޅުދޫ ދާއިރާގެ ޕީއެންސީގެ މެމްބަރުން އަބްދުއްސައްތާރު މުހައްމަދެވެ.

ނަމަވެސް އެ ބިލު ފާސްކޮށްފައިވަނީ ޕީއެންސީގެ މެމްބަރުންގެ ތާއީދާ އެކު އެވެ. އެ ވޯޓު ނެގުމުގެ ކުރިން އަޒާން ވަނީ ވޯޓުގައި ބައިވެރިވެވަޑައިނުގަންވައި، ތަޅުމުން ނުކުމެވަޑައިގަންނަވައިފަ އެވެ.