"ޖުޑިޝަރީގެ ބާރު މުށުތެރެއަށް ލުމުގެ ހިތި ތަހައްމަލް ކުރަންޖެހޭނީ ރައްޔިތުން"

ރައީސް ޑރ. މުހައްމަދު މުއިއްޒުގެ "މުށުތެރެއަށް" ބާރުތައް އެއް ކުރުމަށް މަސައްކަތް ކުރައްވަމުން ގެންދަވާ ކަމަށާއި، އެކަމުގެ ހިތި ނަތީޖާ ތަހައްމަލް ކުރަން ޖެހޭނީ ރައްޔިތުން ކަމަށް ކުރީގެ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް ސޯލިހު މިފަދައިން ވިދާޅުވެފައި ވަނީ ސުޕްރީމް ކޯޓުގެ ތިން ފަނޑިޔާރުން ސަސްޕެންޑް ކޮށްފައި ވަނިކޮށެވެ. ޖުޑިޝަލް ސާވިސް ކޮމިޝަން (ޖޭއެސްސީން) ސަސްޕެންޑް ކޮށްފައި ވަނީ ފަނޑިޔާރު ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރެވެ. މި ތިން ފަނޑިޔާރުން ސަސްޕެންޑް ކޮށްފައި ވަނީ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާ ގުޅިގެންނެވެ.

ތިން ފަނޑިޔާރުން ސަސްޕެންޑް ކޮށްފައި ވަނީ ރައްޔިތުންގެ މަޖިލީސް މެންބަރުންގެ ގޮނޑި ގެއްލޭ އިސްލާހާ ދެކޮޅަށް ހުށަހަޅާފައިވާ މައްސަލައިގައި، އެ އިސްލާހަށް އަމަލުކުރުން ހުއްޓުވުމުގެ ވަގުތީ އަމުރަކަށް އެދިފައިވާތީ އިއްޔެ ތާވަލުކޮށްފައިވާ އަޑުއެހުމަށް ކުޑަތަން ވެފައި ވަނިކޮށެވެ.

މިކަމާ ގުޅިގެން އިދިކޮޅު އެކި ފަރާތްތަކުން ސަރުކާރަށް ދެކޮޅަށް އަޑުއުފުލަމުން ދާއިރު، ރައީސް ސޯލިހު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، މިއަދު މި ފެނިގެންދަނީ ދުސްތޫރީ މައްސަލައެއް ސުޕްރީމް ކޯޓުގައި ކުރިއަށް ދަނިކޮށް އެމައްސަލައަށް ސަރުކާރުން ސިޔާސީ ނުފޫޒު ވައްދައި, ހުރިހާ މުއައްސަސާއެއްގެ މުސްތަގިއްލުކަން ނަގާލައި, ފަނޑިޔާރުންނަށް ބިރު ދެއްކުމުގެ ވަރަށް ނާތަހުޒީބު އަދި ހުތުރު އަމަލުތަކެއް ކަމަށެވެ.

"ދިވެހިރާއްޖެ މިވަގުތު މިސްރާބު ޖަހާފަ މިވަނީ ހުދުމުހުތާރު ވެރިކަމަކާ ދިމާލަށް. އެތައް ބައެއްގެ ބުރަ މަސައްކަތުން އަޅުގަނޑުމެން އެންމެން ހޯދި ހައްގުތަކާއި, ތިން ބާރު ވަކިވެފައިވާ ނިޒާމު ހަރާބުގެ މަގަށް މިގެންދަނީ ރައީސުލްޖުމްހޫރިއްޔާގެ މުށުތެރެއަށް ބާރުތައް އެއް ކުރަން. އެކަމުގެ ހިތި ނަތީޖާ ތަހައްމަލު ކުރަން ޖެހޭނީ އާންމު ދިވެހި ރައްޔިތުން،" ސޯލިހު ވިދާޅުވި އެވެ.

އެކަމިކުފާނު ވަނީ މި ކަންކަން ހުއްޓާލައި, ގާނޫނުގެ ވެރިކަމަށް ރުޖޫއަވުމަށް ރައީސްއަށާއި ދައުލަތުގެ ވެރިންނަށް ގޮވާލައްވާފަ އެވެ.

ސުޕްރީމް ކޯޓުގެ ތިން ފަނޑިޔާރުން ސަސްޕެންޑް ކުރުމަށްފަހު، އެ ތިން ފަނޑިޔާރުންގެ ސުލޫކީ މައްސަލަތަކެއް ބަލަމުންދާ ކަމަށް ވެސް ޖޭއެސްސީން ވަނީ ބުނެފަ އެވެ.

އޭގެ އިތުރުން ސުޕްރީމް ކޯޓުގެ ހަތް ފަނޑިޔާރުންގެ ބެންޗު، ފަހަކަށް ބަދަލު ކުރުމަށް ވެސް މަޖިލީހަށް ވަނީ މައްސަލައެއް ހުށަހަޅާފަ އެވެ.