ފައްޔާޒް ވިދާޅުވީ މިއަދު ގާނޫނުއަސާސީ ފުނޑާލައި ތިން ބާރު ވަކިވެފައިވާ ވެރިކަމުގެ ނިޒާމު ޕީއެންސީން ހަރާބުކޮށްލާފައިވާ ކަމަށާއި، ކުރިއަށް އޮތީ ދަތި، އުނދަގޫ، ކަޅު ދުވަސްތަކެއް ކަމަށެވެ.
ރައްޔިތުންނަށް އެ މީހުންގެ ބާރުވެރިކަން ކަށަވަރު ކުރެވޭނެ ނިޒާމީ އިންތިޒާމުތައް ފުޑާލާފައިވާ ކަމަށާއި، މިވަގުތު ރާއްޖޭގައި ހިނގަމުން ދަނީ ޣައިރު ގާނޫނީ ސަރުކާރެއް ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
އެކްގައި ކުރެއްވި ޕޯސްޓެއްގައި ފައްޔާޒް ވިދާޅުވީ މި ސަރުކާރު ވެރިކަމަށް އައިއިރު ވެސް މިއީ ރައްޔިތުންގެ ބާރުވެރިކަން ކަނޑުވާލައި ހުދުމުހުތާރު ވެރިކަމެއް ކުރުމުގެ މާޒީއެއް އޮތް ބައެއްކަން އެނގޭ ކަމަށެވެ. އެމްޑީޕީން މަސައްކަތް ކުރީ ރާއްޖޭގެ ގާނޫނުއަސާސީ އާއި ޑިމޮކްރަޓިކް ނިޒާމުގެ ތެރެއިން ސަރުކާރަށް ފާރަވެރިވެ ޖަވާބުދާރީ ކުރުވުމަށް ކަމަށް ވެސް އޭނާ ވިދާޅުވި އެވެ.
ފައްޔާޒް މިހެން ވިދާޅުވެފައި ވަނީ ސުޕްރީމް ކޯޓުގެ ބެންޗު ހަތަކުން ފަހަކަށް މަދުކުރަން މަސައްކަތްކޮށް އަދި ސުޕްރީމް ކޯޓުގެ ތިން ފަނޑިޔާރުން ސަސްޕެންޑް ކޮށްފައިވާ ދަނޑިވަޅެއްގަ އެވެ.
ނަމަވެސް، ފައްޔާޒް ވިދާޅުވީ މިއަދު ގާނޫނުއަސާސީ ފުނޑާލައި ތިން ބާރު ވަކިވެފައިވާ ވެރިކަމުގެ ނިޒާމު ޕީއެންސީން ހަރާބުކޮށްލާފައިވާ ކަމަށާއި، ކުރިއަށް އޮތީ ދަތި، އުނދަގޫ، ކަޅު ދުވަސްތަކެއް ކަމަށެވެ.
"މިވަގުތު ރާއްޖޭގައި ހިންގަމުން މިދަނީ ޣައިރު ގާނޫނީ ދައުލަތެއް. ވަކިން ހާއްސަކޮށް މުޅި ވެރިިކަމުގެ ނިޒާމު ފުނޑާލި މުއިއްޒުގެ ސަރުކާރަކީ ގާނޫނީ ތަރަހައިން ބޭރުވެފައިވާ ޣައިރު ގާނޫނީ ސަރުކާރެއް. ރައްޔިތުންނަށް އެ މީހުންގެ ބާރުވެރިކަން ކަށަވަރު ކުރެވޭނެ ނިޒާމީ އިންތިޒާމުތައް މި ޣައިރު ގާނޫނި ސަރުކާރުން ފުނޑުފުނޑުކޮށްފި،" ފައްޔާޒް ވިދާޅުވި އެވެ.
އޭނާ ވިދާޅުވީ އެމްޑީޕީ ގައުމީ މަޖިލީހުން މިދިޔަ ޑިސެމްބަރު މަހުގެ 10 ގައި ފާސްކުރި ގޮތަށް، ސަރުކާރުން ކުރާ ނޭއްގާނީ އަމަލުތަކާ ދެކޮޅަށް މުޅި ރާއްޖޭގައި އަޑުއުފުލުން ނޫން ގޮތެއް ދެން ނެތް ކަމަށެވެ. މުޅި ވެރިކަމުގެ ނިޒާމު ސަރުކާރުން ހައިޖެކް ކޮށްފައިވާ ކަމަށާއި، އެކަން ކުރުމަށް ކޮށްފައިވާ ކަންކަމާމެދު މެދުނުކެނޑި އިހުތިޖާޖުކޮށް އަޑޫއުފުލަން އެމްޑީޕީން ތައްޔާރުވެފައިވާ ކަމަށެވެ.
"ރައްޔިތުންގެ ބާރުވެރިކަން އަލުން އިއާދަ ކުރުމަށް އެމްޑީޕީން ސިލްސިލާކޮށް ކުރިއަށް އޮތް ދުވަސްތަކުގައި ހަރަކާތްތައް ހިންގާނަން. މި ހަރަކާތްތަކުގައި ރާއްޖޭގެ ހުރިހާ ސިޔާސީ ޕާޓީއަކާއި، މަދަނީ ޖަމިއްޔާތަކާއި، ޑިމޮކްރަސީގެ ދިފާއުގައި މަސައްކަތް ކުރައްވާ އެންމެހާ ފަރުދުންނަށް ދައުވަތު އަރުވަން. މާތް الله ގެ ވާގިފުޅާއެކު މި އަނދިރި ދުވަސްތަކުގެ ތެރެއިން އަޅުގަނޑުމެން އަލިމަގެއް ހޯދާނަން،" ފައްޔާޒް ވިދާޅުވި އެވެ.
"ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމިއޮންނާނީ ރައްޔިތުންގެ ކިބައިގައެވެ." ފައްޔާޒްގެ ޕޯސްޓް ނިންމާލަމުން ކުއޯޓް ކޮށްފައިވެ އެވެ.
ބަލަ މަޖިލީހުގެ މިދިޔަ ދައުރުގެ ޖަލްސާތައް ބެލީމަ އެނގޭ ތިކަން. ބަލަ އެ ހުރީ ކަލޭމެން ދެއްކި ހުރިހާ ވާހަކައެއްގެ ވީޑިއޯ.