މަސްދަޅު ކޭސް ބަހަން ދޫކުރާ ޓޯކަން މިރޭ އިތުރުވާނެ

ސަރުކާރުން ރޯދަ ހަދިޔާގެ ގޮތުގައި ބަހަމުންދާ މަސްދަޅު ކޭސް މާލެ ސަރަހައްދުގައި ބެހުމަށް އޮންލައިންކޮށް ދޫކުރާ ޓޯކަން މިރޭ އިތުރުވާނެ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

މާލެ ސަރަހައްދުގައި ރޭ މަސްދަޅު ކޭސް ބަހާފައި ވަނީ މަރުކަޒުތައް އިތުރުކޮށް އަދި އޮންލައިންކޮށް ޓޯކަން ދޫކޮށްގެންނެވެ. އެންމެ ފުރަތަމަ ރެޔަށްވުރެ، އިންތިޒާމްތައް ހަރުދަނާ ކުރުމުން ރޭގައި ފަސޭހަވެގެން ގޮސްފައިވާކަން މިނިސްޓަރު މިއަދު ވަނީ ފާހަގަކުރައްވާފަ އެވެ.

މިނިސްޓަރު ވިދާޅުވީ އިތުރަށް ރައްޔިތުންނަށް ފަސޭހަކޮށްދިނުމުގެ ގޮތުން، މިރޭ 18:00 ގައި ޓޯކަން ދޫކުރުން އަލުން ފަށާއިރު ރެޔަށްވުރެ އިތުރަށް ދޫކުރާނެ ކަމަށެވެ.

އަދި، މިހާރު ޓޯކަން ނަގާފައިވާ ފަރާތްތަކުގެ ތެރެއިން ފަހުގެ ތާރީހަކަށް ޓޯކަން ލިބިފައިވާ ފަރާތްތައްކުގެ ތާރީހު އަވަސްކޮށްދިނުމުގެ ގޮތުން، ރީޝެޑިއުލްކުރުމުގެ ފުރުސަތު ވެސް ލިބިގެންދާނެ ކަމަށެވެ. އޭގެ އިތުރުން، ޓޯކަން ނެގުން ފަދަ ކަމެއްގައި ހައްލުކޮށްލަންޖެހޭ ފަދަ ކަމެއް ކުރިމަތިވާ ފަރާތްތަކަށް އެއް ދިމާލަކުން އެކަމަށް އަޅާލައި، އެކަން ހައްލު ކުރެވޭނެ އިންތިޒާމު ހަމަޖައްސައިދެއްވާނެ ކަމަށް ވެސް މިނިސްޓަރު ވިދާޅުވި އެވެ.

މިރޭ ޓޯކަން ދޫކުރަން ފަށާއިރު، މިހާރު ޓޯކަން ލިބިފައިވާ ފަރާތްތަކަށް ހަމަ އެ ޓޯކަންއަށް މަސްދަޅު ކޭސް ދޫކުރުން ކުރިއަށް ގެންދެވޭނެ އިންތިޒާމް ވެސް ހަމަޖައްސައިދެއްވާނެ ކަމަށް ވިދާޅުވި އެވެ.

"ސަރުކާރުގެ އަމާޒަކީ ރޯދަމަހުގެ ކުރިން ހުރިހާ ފަރާތްތަކަށް ރޯދަ ހަދިޔާ ލިބޭނެ އިންތިޒާމު ހަމަޖެއްސުން ކަމަށްވުމާއެކު، ހުރިހާ ގޭބިސީއަކަށް ލިބެންދެން ކުރިޔަށްދާނެކަމުގެ ޔަގީންކަން އަރުވަން. ހުރިހާ ގޭބިސީތަކަށް ރޯދަ ހަދިޔާ ލިބޭނެ،" މިނިސްޓަރު ވިދާޅުވި އެވެ.

މާލެ ސަރަހައްދުގެ 13 ތަނެއްގައި ދަނީ މަސްދަޅު ދޫކުރަމުންނެވެ. ޓޯކަން ނެގުމަށް މިނިސްޓްރީން ވަނީ "ރޯދަ ހަދިޔާ" ޕޯޓަލް ގާއިމްކޮށްފަ އެވެ. ޓޯކަން ނެގޭނީ މިރޭ 18:00 ގައެވެ.