މަސްދަޅު ބެހުމުގައި ސްޓެލްކޯގެ މުވައްޒަފުންގެ އެހީ
ސްޓެލްކޯ އެމްޑީ ހުސެއިން ފަހުމީ ވަނީ ގައުމީ މަސައްކަތްތަކުގައި އެ ކުންފުނީގެ މުވައްޒަފުންދޭ އެއްބާރުލުން ފާހަގަ ކުރައްވާފަ އެވެ.
ރޯދަ މަހަށް ސަރުކާރުންދޭ މަސް ދަޅު ބެހުމުގައި ސްޓެލްކޯގެ މުވައްޒަފުންވެސް އިންތިޒާމުތަކުގައި އެހީތެރިވާން ފަށައިފި އެވެ.
ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ މަސްދަޅުކޭސް ބެހުމަށް ސަރުކާރުން މިހާރު އަޅާފައިވާ ހަރުދަނާ ފިޔަވަޅުތަކުގެ ތެރެއިން ކިއުގެ ތަކުލީފު ވީހާވެސް ކުޑަވާނެ ގޮތަކަށް އިންތިޒާމްކުރެވި ރޭވިފައިވާ ރޭވުންތަކުގެ ތެރެއިން ސްޓެލްކޯގެ މުވައްޒަފުން ވެސް މިވަނީ މި މަސައްކަތުގައި ސަރުކާރުގެ ޓީމުތަކާއި ގުޅިގެން ބައިވެރިވަމުންދާ ކަމަށެވެ.
"އަޅުގަނޑުމެންގެ މުވައްޒަފުން މިހާރު ތިބީ ޕޮލްކޯ ޓަވާ [ސީބްލޮކް] ގައި ސްޓޭޝަންވެ ރައްޔިތުންގެ ހިދުމަތުގައި. މިފަދަ ކަންކަމުގައި މުވައްޒަފުންގެ ފަރާތުން ލިބެމުން އަންނަ އެއްބާރުލުމަށް ޝުކުރު ދަންނަވަން،" އެކްސްގައި އެމްޑީ ފަހުމީ ވިދާޅުވެފައިވެ އެވެ.
ރޯދަ މަހު ރާއްޖޭގެ ކޮންމެ ގޭބިސީއަކަށް މަސް ދަޅު ކޭހެއް ދޭން ސަރުކާރުން ނިންމައި ވަނީ ބަހަން ފަށާފަ އެވެ. ކޮންމެ ގޭބިސީއަކަށް 80،000 އަށްވުރެ ގިނަ މަސްދަޅު ކޭސް ބަހާނެ އެވެ. މަސްދަޅު ބެހުމުގެ މަސައްކަތް ކުރަނީ ސިޓީ މިނިސްޓްރީގެ ބެލުމުގެ ދަށުންނެވެ. މިކަން ކުރަން އޮންލައިން ސިސްޓަމެއް އެ މިނިސްޓްރީން ވަނީ ގާއިމްކޮށްފަ އެވެ.
ކޮމެންޓް
Republic of Maldives