55 ކައުންސިލް އިމާރާތް ކުރަނީ 36 މިލިއަން ޑޮލަރަށް

ބާވެ، ވީރާނާވާން ކައިރިވެފައިވާ 55 ރަށެއްގެ ކައުންސިލް އިދާރާ އަލުން އިމާރާތް ކުރުމަށް މެލޭޝިއާގެ ކުންފުންޏަކާ ހަވާލުކޮށްފައި ވަނީ 36 މިލިއަން ޑޮލަރު (555 މިލިއަން ރުފިޔާ) އަށް ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މި 55 ރަށުގެ ކައުންސިލް އިދާރާތައް އަލުން އިމާރާތް ކުރުމަށް ހަވާލުކޮށްފައި ވަނީ މެލޭޝިއާގެ ކުންފުންޏެއް ކަމަށްވާ "ހެކްސްޓާ ގްލޯބަލް" އާއެކު އެވެ. 

މިއަދު ބޭއްވި ނޫސްވެރިންގެ ބައްދަލުވުމުގައި މި މަޝްރޫއާ ގުޅޭ އިތުރު މައުލޫމާތު ދެއްވަމުން މިނިސްޓަރު އާދަމް ޝަރީފް ވިދާޅުވީ މިމަހުގެ 28 ގައި މެލޭޝިއާ ކުންފުނީގެ ޓީމެއް ރާއްޖެ އަންނާނެ ކަމަށެވެ. އަދި އޭޕްރީލް މަހުގެ ތެރޭގައި ރަސްމީކޮށް މަޝްރޫއުގެ މަސައްކަތް ފެށިގެން ދާނެ ކަމަށެވެ.

މިނިސްޓަރު ވިދާޅުވީ އިމާރާތް ކުރާ 55 ކައުންސިލްގެ ތެރެއިން 39 ކައުންސިލް އިދާރާ އިމާރާތް ކުރާނީ ދެ ބުރިއަށް ކަމަށެވެ. މި ތަންތަނުގައި ކައުންސިލް ރައީސަށް އަދި ނައިބް ރައީސަށް ވަކި ކޮޓަރިއެއް އަދި ސެކްރެޓެރީ ޖެނެރަލްއަށް ވަކި ކޮޓަރިއެއް ހުންނާނެ އެވެ.

އަދި، އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކަށް ވަކި ކޮޓަރިއަކާއި، އޭގެ އިތުރުން ފާހާނާ، ކެންޓީން އަދި ޒަމާނީ މީޓިން ރޫމުތައް ވެސް ގާއިމް ކުރެވިގެންދާނެ ކަމަށް މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ މި މަޝްރޫއަށް ހަރަދުވާ ފައިސާ 2028 ނިމޭއިރަށް ދައްކާ ނިންމާލެވޭނެ ކަމަށެވެ. މި މަޝްރޫއު ހަވާލުކޮށްފައި ވަނީ ދެ އަހަރާއި ބައިން ނިންމާ ގޮތަށެވެ.

އޭގެ އިތުރުން އިތުރު 50 ކައުންސިލް އިދާރާ ގާއިމް ކުރުމުގެ މަސައްކަތް މިއަހަރު މެދުތެރޭގައި ފެށިގެން ދާނެ ކަމަށް ވެސް މިނިސްޓަރު ވިދާޅުވި އެވެ. ނަމަވެސް އެ މަޝްރޫއުގެ ތަފްސީލު ވިދާޅުވެދެއްވާފައެއް ނުވެ އެވެ.