"ކާޑެއްދޫ އިންޓަނޭޝަނަލް ކުރުމުގެ ވިސްނުން އެބަހުރި، ތަން ހިންގަނީ ގެއްލުމުގައި"

ގދ. ކާޑެއްދޫ އެއާޕޯޓް އިންޓަނޭޝަނަލް ކުރުމުގެ ވިސްނުން ގެންގުޅޭ ކަމަށާއި ނަމަވެސް އެތަން މިހާރު ހިންގަމުން ދަނީ ގެއްލުމުގައި ކަމަށް އެ އެއާޕޯޓް ހިންގާ ވިލާ އެއާގެ ޗެއާފާސަން އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.

ކާޑެއްދޫ އެއާޕޯޓްގެ ފެންވަރު ދަށްވެ، އެތަން ހިންގާ ވިލާ އެއާ މެދު އޮތް ޝަކުވާތަކާ ގުޅިގެން މަޖިލީހުގެ އިގްތިސޯދީ ކޮމެޓީއަށް ވަނީ މައްސަލައެއް ހުށަހަޅާފަ އެވެ. މި މައްސަލަ ހުށަހެޅުއްވީ ތިނަދޫ އުތުރު ދާއިރާގެ ޕީއެންސީ މެމްބަރު ސައުދުﷲ ހިމްލީ އެވެ.

އެހެންވެ، މިއަދު ވަނީ ކޮމެޓީއަށް ވިލާ އެއާގެ އިސްވެރިން ހާޒިރުކޮށްފަ އެވެ. މި ކަންބޮޑުވުންތަކާ ގުޅޭ ގޮތުން ވާހަކަ ދައްކަވަމުން ގާސިމް ވިދާޅުވީ ޓްރާންސްޕޯޓް މިނިސްޓްރީއާއެކު އެ ކުންފުނިން ހަދާފައިވާ އެއްބަސްވުމާ ހިލާފަށް އެއްވެސް ކަމެއް ކޮށްފައި ނުވާނެ ކަމަށެވެ. 

"ހަގީގަތަކީ ވަރަށް ކުޑަ އެއްޗެއް ލިބެނީ، ލިބޭ އެއްޗަކުން ގާތްގަނޑަކަށް އަޅުގަނޑުމެންނަށް ދެބައިކުޅަ އެއްބައިވެސް ނުލިބޭ. އަނެއްކާ ލިބޭ އެއްޗެއް ވެސް އޮންނަނީ ޕެންޑިންގަ ނުލިބި. އެހެންވުމުގެ ސަބަބުން މަހަކު ގާތްގަނޑަކަށް މިލިއަނަކަށްވުރެ ގިނަ ރުފިޔާ ހަރަދުކުރަން ޖެހޭ،" ގާސިމް ވިދާޅުވި އެވެ.

ގާސިމް ވިދާޅުވީ ކުންފުނިން ދެވަނަ ފަހަރަށް އެ އެއާޕޯޓާ ހަވާލުވިފަހުން ދެ ފަހަރަށް ޖެނެރޭޓަރު ވެސް ބަދަލުކޮށްފައިވާނެ ކަމަށެވެ. އަދި ތަނަށް ބޭނުންވާ އޮޕަރޭޝަނަލަށް ރަގަޅު ބަދަލުތައް ވެސް މިހާރު ގެނެސްފައިވާ ކަމަށެވެ. ރަންވޭ ވެސް މަރާމާތު ކޮށްފައިވާ ކަމަށާއި ނަމަވެސް އިގްތިސޯދީ ގޮތުން ތަނަކަށް ތަރައްގީ ގެނެވޭނީ ދެމެހެއްޓެނިވި ގޮތެއްގައި އެތަނަކުން ފައިދާއެއް ލިބޭނަމަ ކަމަށެވެ.

އޭނާ ވިދާޅުވީ އެއާޕޯޓް އިންޓަނޭޝަނަލް ކުރުމާ ގުޅޭ ގޮތުން ޓްރާންސްޕޯޓް މިނިސްޓަރާއެކު މަޝްވަރާ ކުރެވުނު ކަމަށާއި އެ ވިސްނުން އެ ކުންފުނިން ވެސް ގެންގުޅޭ ކަމަށެވެ.

"އެންމެ ކުޑަވެގެން 2400 މީޓަރު ދިގުމިނަށް އެތަނުގެ ރަންވޭ ހަދަން، ކޮޅުން ހިއްކައިގެން ވިޔަސް ރަންވޭ ހަދައި އިންޓަނޭޝަނަލް އެއާޕޯޓަކަށް ދާން އަޅުގަނޑުމެންގެ ވިސްނުން އޮތީ. އެހެންނަމަވެސް ސަރުކާރުން އިރުއިރުކޮޅުން އަޅުގަނޑުމެން އަތުން [އެއާޕޯޓް ހިންގުން] އަތުލާފަ އިރުއިރުކޮޅުން ގޯނާ ކުރަންޏާ ކިހިނެއްތޯ އެކަން ކުރާނީ. ކުރީގަ ވެސް ނުކުރެވުނީ އެހެންވެގެން. ކުރީގައިވެސް އިންވެސްޓަރުން ހުރިހާ ކަމެއް ނިންމާފަ އޮއްވައި ސަރުކާރުން އަތުލައިގަތީ،" ގާސިމް ވިދާޅުވި އެވެ.

ގާސިމް ވިދާޅުވީ ސަރުކާރުން ގެންގުޅޭ އެއްވެސް ވިސްނުމަކަށް އެ ކުންފުނިން ހުރަސް ނާޅާނެ ކަމަށެވެ. އެ ކުންފުނިން ހަވާލުވިއިރު އޮތް ހާލަތަށްވުރެ ތަނުގެ ހާލަތު މިހާރު ރަގަޅު ވާނެ ކަމަށް ވެސް ވިދާޅުވި އެވެ.

ވިލާ އެއާގެ ޑިރެކްޓަރު ސިޔާދު ގާސިމް ވިދާޅުވީ ޑިވެލޮޕްމެންޓް ފައިނޭންސިން ހޯދުމަކީ ދައްޗެއް ނޫން ކަމަށެވެ. ނަމަވެސް ކައިރި ކައިރީގައި އިންޓަނޭޝަނަލް އެއާޕޯޓް ގާއިމް ކުރުމަކީ އެންމެ ރަގަޅު ގޮތް ނޫން ކަމަށެވެ. ސަރުކާރާއެކު ކުރަމުން އައި ކާޑެއްދޫ އެއާޕޯޓް އިންޓަނޭޝަނަލް ކުރުމުގެ މަޝްވަރާތައް ހުއްޓުނީ އެތަނާ ތިން ކިލޯމީޓަރު ކައިރީ އޮތް ގދ. ތިނަދޫގައި އިންޓަނޭޝަނަލް އެއާޕޯޓެއް އަޅަން އެމްއޯޔޫއެއްގައި ސޮއިކުރި ހިސާބުން ކަމަށް ވެސް އޭނާ ފާހަގަކުރެއްވި އެވެ.

ހުރި މައްސަލަތައް ހައްލު ކުރުމަށް ކަމާ ބެހޭ އިދާރާތަކާއެކު މަޝްވަރާ ކުރަމުންދާކަން ވެސް އޭނާ ފާހަގަކުރެއްވި އެވެ.

މިއަދުގެ ކޮމެޓީއަށް ޓްރާންސްޕޯޓް މިނިސްޓްރީ އާއި ސިވިލް އޭވިއޭޝަންގެ ބޭފުޅުން ހާޒިރުވާން އޮތް ނަމަވެސް ކޮންމެވެސް ކަމެއް ދިމާވެގެން ހާޒިރުވެފައެއް ނުވެ އެވެ. މި ދެ އިދާރާއިން ވެސް ކޮމެޓީއަށް ފޮނުވާފައިވާ ލިޔުމުގައި، ކާޑެއްދޫ އެއާޕޯޓް ހިންގުމުގައި އެގްރިމެންޓްގައިވާ ކަންކަމާ ވިލާ އެއާއިން ހިލާފުވެފައި ނުވާ ކަމަށް ބަޔާންކޮށްފައިވެ އެވެ. 

ކާޑެއްދޫ އެއާޕޯޓު ހިންގުން 2013 ވަނަ އަހަރު 50 އަހަރަށް ވިލާ އެއާ އަށް ދީފައި ވަނިކޮށް ޖެނުއަރީ 2017 ގައި ކުރީގެ ރައީސް އަބްދުﷲ ޔާމީންގެ ވެރިކަމުގައި އެތަނުގެ އެއްބަސްވުން ބާތިލްކޮށް، އެއާޕޯޓް އަތުލި އެވެ. ނަމަވެސް، 2018 ވަނަ އެތަން އަނބުރާ ދޭން ސިވިލް ކޯޓުން ކުރި ހުކުމަށް ހައި ކޯޓާއި ސުޕްރީމު ކޯޓުން ވެސް ތާއީދުކުރުމުން، ކާޑެއްދޫ އެއާޕޯޓު ހިންގުން ވިލާ އެއާ އާ އަލުން ހަވާލުކުރީ މާޗް 2022 ގަ އެވެ.