ޓޫރިސްޓުންގެ އަދަދު ތިން ލައްކައިން މައްޗަށް | 70 ޕަސެންޓް ރިސޯޓަށް
މި އަހަރުގެ މިހާތަނަށް ބަލާއިރު ޓޫރިޒަމަށް 8.5 ޕަސެންޓުގެ ކުރިއެރުމެއް ވަނީ ލިބިގެން ގޮސްފަ އެވެ. މިދިޔަ ދެ ދުވަހު ޑެއިލީ އެރައިވަލްސް ހުރީ 9،000 އިން މަތީގަ އެވެ.
މި އަހަރުގެ މިހާތަނަށް ރާއްޖެ އަށް 344,216 ޓޫރިސްޓުން ޒިޔާރަތްކޮށްފައިވާއިރު މި ޓޫރިސްޓުންގެ ގާތްގަނޑަކަށް 70 ޕަސެންޓް ޗުއްޓީ ހޭދަކުރަމުން ދަނީ ރާއްޖޭގެ ރިސޯޓްތަކުގަ އެވެ.
ޓޫރިޒަމް މިނިސްޓްރީން އިއްޔެ ނިޔަލަށް ނެރުނު ހިސާބުތައް ދައްކާ ގޮތުގައި މިހާތަނަށް ރާއްޖެއަށް 344,216 ޓޫރިސްޓުން ވަނީ ޒިޔާރަތްކޮށްފަ އެވެ. މި ޓޫރިސްޓުންގެ ތެރޭން 239,326 މީހުން ތިބީ ރިސޯޓްތަކުގަ އެވެ. އަދި 87,340 ޓޫރިސްޓުން ގެސްޓްހައުސްތަކުގައި ތިބިއިރު 9,252 ޓޫރިސްޓުން ހޮޓާތަކުގައި ޗުއްޓީ ހޭދަކޮށްފައިވެ އެވެ. އަދި ސަފާރީތަކުގައި ޗުއްޓީ ހޭދަކުރަމުންދާ ޓޫރިސްޓުންގެ އަދަދަކީ 8,128 އެވެ. އަދި އެެހެންތަންތަނުގައި 171 ޓޫރިސްޓުން ޗުއްޓީ ހޭދަކޮށްފައިވެ އެވެ.
މި އަހަރުގެ މިހާތަނަށް ރާއްޖޭގެ ޓޫރިޒަމަށް 8.5 ޕަސެންޓުގެ ކުރިއެރުމެއް ވަނީ ލިބިފަ އެވެ. މި އަހަރުގެ މިހާތަނަށް ޖުމްލަ 344,216 ޓޫރިސްޓުން އައިސްފައިވެ އެވެ. މިދިޔަ އަހަރުގެ މި މުއްދަތުގައި އައިސްފައިވާ ޓޫރިސްޓުންގެ އަދަދު އުޅެނީ 317,244 ގަ އެވެ. އަދި އޭގެކުރީ އަހަރު އައިސްފައިވަނީ 273,115 ޓޫރިސްޓުންނެވެ.
ރާއްޖެއަށް މިހާރު އެންމެ ގިނައިން ޓޫރިސްޓުން އަންނަ ގައުމެއްގެ ގޮތުގައި އޮތީ ޗައިނާ އެވެ. އެ ގައުމުން އައި ޓޫރިސްޓުންގެ އަދަދު ވަނީ ބައި ލައްކައަށްވުރެ މަތިވެފަ އެވެ.
ޓޫރިސްޓުން ގިނައިން އައި ގައުމުތައް
- ޗައިނާ - 53,745
- ރަޝިއާ - 33,886
- ޔޫކޭ - 31,137
- އިޓަލީ - 33,084
- ޖަރުމަނު - 20,455
- އިންޑިއާ - 16,016
- ފްރާންސް - 13,446
- ޔޫއެސްއޭ - 10,582
- ޕޮލެންޑް - 7,720
- ސުވިޒަލޭންޑް - 6,821
ޓޫރިޒަމް މިނިސްޓްރީގެ ހިސާބުތައް ދައްކާ ގޮތުގައި މިހާރު ދުވާލެއްގެ މައްޗަށް އަންނަ ޓޫރިސްޓުންގެ އެވްރެޖު ނިސްބަތް ހުރީ 7,324 ގަ އެވެ. މިދިޔަ ހޮނިހިރު ދުވަހާއި އާދީއްތަ ދުވަހު ޑެއިލީ އެރައިވަލްސް ވަނީ 9،000 އަށް އިތުރުވެފަ އެވެ.
ރާއްޖެއަށް މިދިޔަ އަހަރު ޖުމްލަ ދެ މިލިއަން ޓޫރިސްޓުން އައިސްފައިވެ އެވެ. ސަރުކާރުން ވަނީ މި އަހަރު 2.3 މިލިއަން ޓޫރިސްޓުން ގެނަމަކީ އަމާޒެއް ކަމަށް ބުނެފަ އެވެ.
ކޮމެންޓް
Republic of Maldives