އިޖުރާއަތާ އެއްގޮތަށް ގާނޫނުއަސާސީއަށް ގެންނަ އިސްލާހެއް ކޯޓުތަކަށް ނުބެލޭނެ

ގާނޫނުއަސާސީގައި ބަޔާންކޮށްފައިވާ ހުރިހާ އިޖުރާއަތްތަކެއް ފުރިހަމަ ކުރުމަށްފަހު، ރައްޔިތުންގެ މަޖިލީހުން ގާނޫނުއަސާސީއަށް ގެންނަ އެއްވެސް އިސްލާހަކާ މެދު ރާއްޖޭގެ އެއްވެސް ކޯޓަކަށް ބަސް ކިޔުމުގެ އިހުތިސާސެއް ނޯންނާނެ ކަމަށް ބަންޑާރަނައިބުގެ އޮފީހުން މިއަދު ބުނެފި އެވެ. 

މަޖިލީހަށް އިންތިހާބުވާ ސިޔާސީ ޕާޓީއަކުން ވަކިވެއްޖެނަމަ ނުވަތަ ޕާޓީން ވަކިކޮށްފިނަމަ، މަޖިލީހުގެ މެމްބަރުކަން ގެއްލޭ ގޮތަށް މިދިޔަ އަހަރު ސަރުކާރު ހިންގާ ޕީއެންސީން އިސްވެ ގާނޫނުއަސާސީއަށް ގެނައި އިސްލާހު ބާތިލުކުރަން، ސުޕްރީމް ކޯޓަށް ދުސްތޫރު މައްސަލައެއް، މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވަނީ ހުށަހަޅުއްވައިފަ އެވެ. 

އެ މައްސަލައިގެ އަޑުއެހުންތައް ސުޕްރީމް ކޯޓުގައި މިއަދު ފެށުމާ އެކު، ބަންޑާރަނައިބު އޮފީހުގެ ވަކީލު ވަނީ، ދުސްތޫރީ މައްސަލައެއްގެ ގޮތުގައި މި މައްސަލަ ބެލުމުގެ އިހުތިސާސް ސުޕްރީމް ކޯޓަށް ލިބިގެންނުވާކަމަށް ވިދާޅުވެ، އިޖުރާއީ މައްސަލައެއް ނަންގަވައިފަ އެވެ. 

ބަންޑާރަނައިބު އޮފީހުގެ ވަކީލު ވިދާޅުވި ގޮތުގައި، ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ވެސް ބެލޭނީ ގާނޫނުއަސާސީ މާނަކުރުމާއި ގާނޫނުއަސާސީގައި ލިޔެފައި އޮތް އެއްޗަކާ ހިލާފުވެގެން ހުށަހެޅޭ މައްސަލަތައް އެކަންޏެވެ. 

ނަމަވެސް، ގާނޫނުއަސާސީއަށް ގެންނަ އިސްލާހެއް ދުސްތޫރީ މައްސަލައަކަށް ނުފެތޭނެ ކަމަށާއި، އެފަދަ އިސްލާހެއް އެއްވެސް ކޯޓަކަށް ބެލޭނެ ކަމަށް ގަބޫލުނުކުރައްވާ ކަމަށް ވަކީލު ވިދާޅުވި އެވެ. 

އޭގެ ރައްދުގައި މައްސަލަ ހުށަހެޅުއްވި ފަރާތުގެ ގާނޫނީ ވަކީލު ވިދާޅުވީ، މަޖިލީހުން ފާސްކުރާ ގާނޫނެއް ނުވަތަ ގާނޫނެއްގެ ބައެއް ވިޔަސް ގާނޫނުއަސާސީ އާ ހިލާފުވޭތޯ ބަލައި ގޮތް ނިންމުމުގެ ބާރު ސުޕްރީމް ކޯޓަށް ލިބިގެންވާ ކަމަށެވެ. 

މިގޮތުން، އެ ބަދަލާއެކު ދުސްތޫރީ ހުސްކަމެއް ކުރިމަތިވެދާނެ ހާލަތެއް އައުމުގެ ފުރުސަތު އޮތް ކަމަށާއި އެއީ ސަރުކާރު ހިންގާ ޕާޓީއަށް ނިސްބަތްވާ ހުރިހާ މެންބަރުން ވަކިކޮށްފި ހާލަތެއްގައި މަޖިލީހުގެ ޖަލްސާތައް ބާއްވައި މަޖިލީހުން ކަންކަން ނިންމުމަށް ހުރަސް އެޅުމުގެ ފުރުސަތު އޮތް ކަމަށް ވަކީލު ފާހަގަކުރެއްވި އެވެ. 

މީގެއިތުރުން، ދައުލަތް ހިންގުމުގެ މިނިވަން ބާރެއްގެ ގޮތުގައި ރައްޔިތުންގެ މަޖިލިސް ދެމި އޮތުމަށް ގާނޫނުއަސާސީގައި ސާފުކޮށް ބަޔާންކޮށްފައިވާއިރު، މި އިސްލާހުގެ ސަބަބުން ތިން ބާރު ވަކިވެފައިވާ ރިޔާސީ ނިޒާމު ގަޑުބަޑުވެގެންދާ ކަމަށް ވެސް ބުންޏެވެ.