ޓޫރިޒަމް މިނިސްޓަރަކަށް ތޯރިގު އައްޔަނުކުރަން މަޖިލީހުން ރުހުން ދީފި

ޓޫރިޒަމް މިނިސްޓަރުގެ މަގާމަށް އެންވަޔަރަމެންޓް މިނިސްޓަރުގެ މަގާމުގައި ހުންނެވި ތޯރިގް އިބްރާހިމް އައްޔަނުކުރަން ރައްޔިތުންގެ މަޖިލީހުން މިއަދު ރުހުންދީފި އެވެ.

ސަރުކާރުން އެންމެ ފުރަތަމަ އެކުލަވައިލި ކެބިނެޓުގައި ތޯރިގު ހުންނެވީ އެންވަޔަރަމެންޓް މިނިސްޓަރުގެ މަގާމުގަ އެވެ. ނަމަވެސް ރައީސް ވަނީ ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ އާއި ޓޫރިޒަމް މިނިސްޓްރީ އެއްކޮށްލާފަ އެވެ.

މިހާރު އެ މިނިސްޓްރީއަށް ކިޔަނީ މިނިސްޓްރީ އޮފް ޓޫރިޒަމް، އެންޑް އެންވަޔަރަންމަންޓް އެވެ.

ދެ މިނިސްޓްރީ އެއްކޮށްލައިގެން އުފެއްދެވި އާ ވުޒާރާ ހިންގެވުމަށް ތޯރިގު އައްޔަނުކުރަން، މަޖިލީހަށް ފޮނުއްވުމުން، އެ މައްސަލަ ދިރާސާކުރި، ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން ވަނީ އޭނާ އެ މަގާމަށް އައްޔަނުކުރަން ފެންނަ ކަމަށް ނިންމައިފަ އެވެ. 

ކޮމިޓީން ނިންމި ގޮތަށް، މަޖިލީހުގެ މިއަދުގެ ޖަލްސާގައި ތޯރިގަށް ރުހުން ދީފައިވަނީ، ވޯޓުގައި ބައިވެރިވެވަޑައިގެންނެވި 69 މެމްބަރުންގެ އިއްތިފާގުންނެވެ. 

މި ބަދަލާ ގުޅިގެން އެންވަޔަރަމަންޓް މިނިސްޓްރީގެ ދަށުން ހިނގަމުންދިޔަ އެންވަޔަރަންމަންޓަލް ޕްރޮޓެކްޝަން އޭޖެންސީއާއި، ޔުޓިލިޓީ ރެގިއުލޭޓަރީ އޮތޯރިޓީއާއި، މޯލްޑިވްސް މީޓިއޮރޮލޮޖިކަލް ސަރވިސްއާއި، މާޅޮސްމަޑުލު ދެކުނުބުރީ ބަޔޮސްފިއާ ރިޒާވްގެ އޮފީސް ވަނީ އާ މިނިސްޓްރީގެ ދަށުން ހިންގާ ތަންތަނުގެ ގޮތުގައި ވަނީ ހަމަޖައްސަވާފައެވެ.