ފެނަކައިން ހިންގަމުން އައި 14 އައިސްޕްލާންޓާ މިފްކޯއިން ހަވާލުވެއްޖެ

ފެނަކަ ކޯޕަރޭޝަން ލިމިޓެޑް އިން ހިންގަމުން އައި އައިސްޕްލާންޓުތަކުގެ ހިންގުމާ، ސަރުކާރުގެ މަސް ކުންފުނި، މިފްކޯ އިން ރަސްމީކޮށް ހަވާލުވެއްޖެ އެވެ. 

ފެނަކައިން ހިންގަމުން އައި 14 އައިސް ޕްލާންޓު ހިންގައި ބެލެހެއްޓުން މިފްކޯ އާ ހަވާލުކުރުމުގެ އެއްބަސްވުމުގައި ފެނަކަ ކޯޕަރޭޝަންގެ ފަރާތުން ސޮއި ކުރެއްވީ، އެ ކުންފުނީގެ އެމްޑީ މުހައްމަދު ނަޖާހު އެވެ. މިފްކޯގެ ފަރާތުން ސޮއި ކުރެއްވީ، އެ ކުންފުޏިގެ ސީއީއޯ ވިޓާލީ ލުބިމޯވް އެވެ. 

މިފްކޯ އިން ބުނީ، ފެނަކައިން ހިނގަމުން އައި 14 އައިސް ޕްލާންޓަކާ ހަވާލުވެ، އެ ޕްލާންޓުތައް އޮޕަރޭޝަނަށް ގެނައުމުގައި އެ ކުންފުނީގެ އިންޖިނިއަރުން މިހާރު ވެސް މަސައްކަތް ފަށާފައިވާ ކަމަށެވެ. 

އަދި މިއީ، މިފްކޯ އިން ދެމުންދާ ހިދުމަތްތަކުގެ ގާބިލުކަން އިތުރުކުރުމަށް އެޅުނު މުހިންމު ފިޔަވަޅެއްގެ ގޮތުގައި އެ ކުންފުނިން ވަނީ ސިފަކޮށްފަ އެވެ. 

ފެނަކައަށް ގެއްލުންވާތީ، އެ ކުންފުނީގެ އައިސް ޕްލާންޓުތައް ހިންގުން މިދިޔަ އަހަރުން ފެށިގެން އޮތީ ހުއްޓާލައިފަ އެވެ.