ސަލްޓަން ޕާކު މަރާމާތު ކޮށްދޭނެ ފަރާތެއް ހޯދަނީ
ސަލްޓަން ޕާކަކީ ހުޅުވުނު ފަހުން އެއްވެސް މަރާމާތެއް ނުކުރެވި، އެތަނުގައި ހުރި އިމާރާތްތަކާއި ވަސީލަތްތައް ބޭނުން ނުކުރެވޭ ހާލަތަކަށް ގޮސްފައިވާ ތަނެއް ކަމަށް ކައުންސިލުން ބުނެފައިވެ އެވެ.
ސިޓީ ކައުންސިލުން އިއްޔެ ކުރި އިއުލާނެއްގައި ބުނެފައި ވަނީ ސަލްޓަލް ޕާކު މަރާމާތު ކޮށްދޭނެ ފަރާތެއް ހޯދުމަށް ބޭނުންވާތީ، އެ މަސައްކަތަށް ބީލަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
އެ ޕާކު މަރާމާތު ކޮށްފިނުމަށް ޝައުގުވެރިވާ ފަރާތަކުން އަންނަ އަންގާރަ ދުވަހުގެ ހެނދުނު 9:00 ގައި މައުލޫމާތު ސާފުކުރުމަށް ކައުންސިލް އިދާރާއަށް ހާޒިރުވާން ވަނީ އަންގާފަ އެވެ. އަގު ހުށަހެޅުން ކުރިއަށް ދާނީ މިމަހުގެ 24 ވަނަ ދުވަހު ކަމަށް ވެސް އެ އިއުލާނުގައިވެ އެވެ.
ސަލްޓަން ޕާކު މަރާމާތު ކޮށްދޭނެ ފަރާތެއް ހޯދަން ސިޓީ ކައުންސިލުން އިއުލާނުކޮށްފައި ވަނިކޮށް، އެ ޕާކާއި ރަސްފަންނު ވަރަށް ބޮޑަށް ވީރާނާވަމުންދާކަން ފާހަގަކުރައްވައި ރައީސް ޑރ. މުހައްމަދު މުއިއްޒު އިއްޔެ ވަނީ ޕޯސްޓެއް ކުރައްވާފަ އެވެ. އެތަންތަނުގެ ރީތިކަމާއި އާރޯކަން އަނބުރާ ގެނެސްދީ އަދި ކުރިޔަށްވުރެވެސް ފުރިހަމަކޮށްދިނުމަށް ސަރުކާރުން ހާއްސަ މަސަައްކަތްތަކެއް ކުރައްވާނެ ކަމަށް ވެސް ވިދާޅުވެފައިވެ އެވެ.
ނަމަވެސް ރައީސް އެހެން ވިދާޅުވުމާ ގުޅިގެން ސިޓީ ކައުންސިލުން ބުނެފައި ވަނީ އެ ދެ ޕާކު ވެސް މަރާމާތުކުރަން ކައުންސިލުން ތައްޔާރުވަމުންދާ ކަމަށެވެ.
ސަލްޓަން ޕާކަކީ ހުޅުވުނު ފަހުން އެއްވެސް މަރާމާތެއް ނުކުރެވި، އެތަނުގައި ހުރި އިމާރާތްތަކާއި ވަސީލަތްތައް ބޭނުން ނުކުރެވޭ ހާލަތަކަށް ގޮސްފައިވާ ތަނެއް ކަމަށް ކައުންސިލުން ބުނެފައިވެ އެވެ.
ކޮމެންޓް
Republic of Maldives