ކަނޑުހުޅުދޫގައި ދެއަހަރުގެ ކުއްޖާ ރޭޕްކުރި ކާފަ ވެސް މަރުވެއްޖެ

ގއ. ކަނޑުހުޅުދޫގައި ދެ އަހަރުގެ ކުއްޖަކު ރޭޕްކުރި މައްސަލައިގައި އުމުރަށް ޖަލަށް ލާފައި ހުރި ކުއްޖާގެ ކާފަ، އެރަށު ރިހިވެލި، އިބްރާހިމް ދީދީ މަރުވެއްޖެ އެވެ.

މޯލްޑިވްސް ކަރެކްޝަނަލް ސާވިސް އިން ބުނީ އުމުރުން 67 އަހަރުގެ އިބްރާހިމް ދީދީ މަރުވެފައި ވަނީ ރޭ ދަންވަރު ކުއްލި ގޮތަކަށް ކަމަށެވެ.

އެގޮތުން، ރޭ އޭނާ ހޭލާ އުޅެނިކޮށް ކުއްލިއަކަށް ވެއްޓުމާއި ގުޅިގެން މެޑިކަލް ޓީމްއިން ބަލައި، އަވަސް ފަރުވާ ދިނުމުންވެސް ހަރަކާތް ނުކުރާތީ، އެމަޖެންސީ ހާލަތުގައި ހުޅުމާލޭ ހޮސްޕިޓަލަށް ގެންގޮސް ދީފައިވާ ކަމަށް ކަރެކްޝަނުން ބުންޏެވެ. ފަރުވާ ދިނުމަށްފަހުވެސް ހަރަކާތެއް ނެތުމުން، އޭނާ މަރުވެފައިވާކަމަށް ކަނޑައަޅާފައި ވަނީ 2:40 ކަށް ހާއިރުގަ އެވެ.

"މީނާއަކީ ހައި ބަލްޑް ޕްރެޝަރު، ކޮލެސްޓްރޯލް އަދި ޓްރެމާސް، ފަދަ ބަލިތަކަށް ބޭސްކުރަމުން އައި މީހެއް،" އެ ހިދުމަތުން ބުންޏެވެ.

އިބްރާހިމް ދީދީ މަރުވުމާ ގުޅިގެން އެކަން އޭނާގެ އާއިލާއަށާއި ފުލުހުންނަށާއި ހިއުމަން ރައިޓްސް ކޮމިޝަނަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިވާ ކަމަށް ވެސް އެ ހިދުމަތުން ބުންޏެވެ.

މި މައްސަލައިގައި ރޭޕްކުރި ކުޑަކުއްޖާގެ މުނިކާފަ، ހަސަން މޫސާ ދީދީ ވެސް އުމުރަށް ޖަލަށްލި އެވެ. ނަމަވެސް ޖަލު ހުކުމް ތަންފީޒު ކުރަމުން ދަނިކޮށް އުމުރުން 85 ގައި އޭނާ ވެސް ވަނީ މަރުވެފަ އެވެ. އޭނާ ވެސް މަރުވީ ކުއްލި ގޮތަކަށް، ސެޕްޓެމްބަރު 9، 2023 ގައެވެ.

2022 ވަނަ އަހަރުގެ ޖުލައި މަހުގެ ތެރޭގައި ދެ މީހުންގެ މައްޗަށް ކްރިމިނަލް ކޯޓުން އިއްވި ހުކުމުގައި ބުނެފައި ވަނީ ޖެނުވަރީ 17، 2020 ވަނަ ދުވަހުގެ ކުރިން ތަފާތު އެކި ދުވަސް މަތިން ކުއްޖާގެ ކާފަ އާއި މުނިކާފަ އެކުއްޖާއާ ބެހިފައިވާ ކަމަށެވެ.