ރޯދަ ހަދިޔާ މަސްދަޅު ބެހުމުގެ ފަހުގެ ތައްޔާރީތައް، މާލޭގައި ފަށަނީ 20 ވަނަ ދުވަހު

މި ރޯދަ މަހު ރޯދަ ހަދިޔާގެ ގޮތުގައި ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ދޭން ސަރުކާރުން ވަނީ ނިންމާފަ އެވެ. ރަށްރަށަށް މަސް ދަޅު ފޮނުވަން ފަށާފައިވާއިރު، މާލޭގާއި ބަހާނީ މިމަހުގެ 20 ވަނަ ދުވަހުން ފެށިގެންނެވެ.  

ރަމަޟާން މަހަށް ހާއްސަ ސަރުކާރުން ކޮންމެ ގޭބިސީއަކަށް އަރުވާ ދިނުމަށް ހަމަޖެހިފައިވާ މަސްދަޅު ކޭސް ބެހުމުގެ އެންމެހައި ތައްޔާރީތައް އެސްޓީއޯ އިން ވަނީ ފަށާފަ އެވެ. 

މި މަސައްކަތް އެސްޓީއޯ އިން ކުރިއަށް ގެންދަނީ ސަރުކާރުގެ އެކި މުއައްސަސާތަކާއި މިފްކޯ އާއި މޭލެ ސިޓީ ކައުންސިލް އަދި ރަށްރަށުގެ ކައުންސިލްތަކާ އެކު މަޝްވަރާކުރެވި ގިނަ ފަރާތްތަކެއްގެ އެއްބާރުލުމާއެކުގަ އެވެ. ގޭބިސީތަކަށް ދިނުމަށް ހަމަޖެހިފައިވާ މަސްދަޅު ކޭހުގައި ހިމެނެނީ 180 ގްރާމުގެ ތެޔޮމަހުގެ (ޗަންކްސް އިން އޮއިލް) 48 ދަޅެވެ.

މާލެ ސަރަހައްދުގެ ގޭބިސީތަކަށް މަސްދަޅު ކޭސް ދޫކުރުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ މާލޭ ސިޓީ ކައުންސިލްގެ ބެލުމުގެ ދަށުންނެވެ. މާލޭގައި މި މުދާ ދޫކުރުމަށް ހަމަޖެހިފައިވަނީ 2025 ވަނަ އަހަރުގެ ފެބްރުއަރީ މަހުގެ 20 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށެވެ. (މި ތާރީހު ތަކަށް އެއްވެސް ބަދަލެއް އަތުވެއްޖެނަމަ އެކަން ކުރިއާލާ އަންގާނެ އެވެ.)

މި އަހަރު ވެސް މާލެ ސަރަހައްދުގައި މަސްދަޅު ކޭސް ލިބިވަޑައިގަންނަވާނީ ހަމައެކަނި ދިވެހި ރައްޔިތުންނަށެވެ. އަދި ދޫކުރެވޭނީ ގޭގޭގެ ކަރަންޓް މީޓަރު ނަންބަރު ޗެކްކުރުމަށްފަހު ބަލައި އަންނަ ފަރާތުގެ އައިޑީ ކާޑާއި ގުޅޭނެ ފޯނު ނަންބަރު ރެކޯޑު ކުރުމަށްފަހުގަ އެވެ.

މާލެ ސަރަހައްދުގައި މަސްދަޅު ކޭސް ބެހުމަށް ހަމަޖެހިފައިވަނީ ދެ ދަންފަޅިއަކަށެވެ. އެއީ މެންދުރުފަހު 2:30 އިން ހަވީރު 6:00 އާ ހަމައަށް އަދި ރޭގަނޑު 8:30 އިން 11:00 އާ ހަމައަށެވެ. ހަދިޔާ ދޫކުރުމަށް މާލެ ސަރަހައްދުގައި ޖުމްލަ ފަސް މަރުކަޒެއް ޤާއިމުކުރެވިފައި ހުންނާނެއެވެ.

ސަރުކާރުން ވަނީ މިދިޔަ ރޯދަ މަހު ކޮންމެ ގޭބިސީއަކަށް ހަނޑޫ ހަކުރު އަދި ފުށް ބަސްތާއެއް ދީފަ އެވެ.