ރިސޯޓު ވެރިން ނެރުނު އާމްދަނީ ހިސާބުތަކާމެދު މަޓާޓޯގެ ނުރުހުން

ރިސޯޓް ވެރިންގެ ޖަމިއްޔާ، މަޓީން އާއްމުކުރި ރާއްޖޭގެ އިގްތިސޯދުގެ އާމްދަނީ ހިސާބުތަކާމެދު މަޓާޓޯ އިން ނުރުހި އެ މައުލޫމާތު ސާފުކޮށްދޭން ދައުލަތުގެ ވުޒާރާތަކުގައި އެދިއްޖެ އެވެ. 

ރިސޯޓް ވެރިންގެ ޖަމިއްޔާ މަޓީގެ އަހަރީ އާއްމު ޖަލްސާއަށްފަހު އިއްޔެ ނެރުނު ބަޔާނުގައިވާ ގޮތުން މިދިޔަ އަހަރު ރާއްޖެއަށް ލިބުނު އާމްދަނީގެ 86 ޕަސެންޓް ހިއްސާކުރަނީ ރިސޯޓްތަކުންނެވެ. އެގޮތުން ރިސޯޓްތަކުން މިދިޔަ އަހަރު ރާއްޖެއަށް 4.5 ބިލިއަން ޑޮލަރު ނުވަތަ 69 ބިލިއަން ރުފިޔާގެ ވަނީ ލިބިފަ އެވެ. 

މަޓާޓޯ އިން ވަނީ މި ހިސާބުތަކުގައި ފުށޫއެރުން ހުރިކަމަށް ފެންނާތީ އެ މައުލޫމާތު އެ ޖަމިއްޔާ އަށް ސާފުކޮށްދޭން ކޮމިޝަނަރު ޖެނެރަލް އޮފް ޓެކްސޭޝަން ހަސަން ޒަރީރަށް ސިޓީއެއް ފޮނުވާފަ އެވެ. 

އެ ސިޓީގެ ކޮޕީއެއް "މިރާ" އަށް ލިބިފައިވާއިރު އެ ސިޓީގައި ބުނެފައިވާ ގޮތުން މަޓީން އާއްމުކުރި އަދަދުތައް ހޯދުމަށް ބޭނުންކުރާ މަސްދަރާއި މެތޮޑޮލޮޖީ ސާފުކޮށްދިނުމަށް އެދިފައިވެ އެވެ. އަދި އެ ސިޓީގައިވާ ގޮތުން މިހާތަނަށް އެމްއެމްއޭ ނުވަތަ މީރާގެ ޕަބްލިކް ޕްލެޓްފޯމްތަކުގައި އެއާ ގުޅޭ ޑޭޓާއެއް މިހާތަނަށް އާއްމުކޮށްފައި ނެތްކަމަށް ބުނެފައިވެ އެވެ. 

އެ ޖަމިއްޔާގެ އޮފިޝަލަކު ވިދާޅުވީ އެންމެ ގެސްޓްހައުސް ހިންގާ ކުންފުންޏެއް ކަމަށްވާ ކާނިއަށް ބެލިނަމަވެސް މަޓީގެ ނޫސްބަޔާނުގައި ބުނެފައިވާ އަދަދަށް އާމްދަނީ ވަނީ ހޯދާފަ އެވެ. 

"އެންމެ ޓްރެވަލް އެޖެންޓެއް މިސާލަކަށް ރިސޯޓް ލައިފް އަށް ބެލިނަމަވެސް މި އަދަދުގެ ބޮޑުބައި ކަވަރުކުރޭ. އެހެންވީއިރު މި ހިސާބު ދިމާވާނެ ގޮތެއް ނޯންނާނެ،" ނަން ނުޖެހުމަށް އެދި ވިދާޅުވި އެވެ.