ފަލަސްތީނުގެ ދައުލަތް ސައުދީގައި ގާއިމުކުރާ ވާހަކަ ރާއްޖޭން ކުށްވެރިކޮށްފި

ފަލަސްތީނުގެ މިނިވަން ދައުލަތެއް، ސައުދީ އަރަބިއްޔާގެ ފަސްގަނޑުގައި ގާއިމުކުރާ މޭރުމަކުން އިޒްރޭލުގެ ބޮޑުވަޒީރު ދެއްކި ވާހަކަތައް ރާއްޖޭން މިއަދު ކުށްވެރިކޮށްފި އެވެ. 

އިޒްރޭލުގެ ސަރުކާރަށް ތާއީދުކުރާ ޓީވީ ޗެނަލަކަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދިން އިންޓަވިއުއެއްގެ ތެރެއިން، ޕްރޮގުރާމް ހުށަހަޅައިދިން މީހާއަށް އޮޅިގެން ފަލަސްތީނުގެ ދައުލަތެއްގެ ބަދަލުގައި ސައުދީ ދައުލަތެއް ކަމަށް ބުނެވެމުން، ނަތަންޔާހޫ ވަނީ ސައުދީ އަކީ ބިންބޮޑު ގައުމެއް ކަމަށްވާތީ، އެތަނުގައި ފަލަސްތީނުގެ ދައުލަތެއް ގާއިމުކުރުމުގެ ވާހަކަ އެހީތޯ ބުނެ، ސަމާސާކޮށްފަ އެވެ. 

ނަތަންޔާހޫގެ މި ވާހަކަތަކާ ގުޅިގެން، ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ، ސައުދީގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާ ގޮތަށް ދައްކާ އެއްވެސް ވާހަކައެއް ބަލައި ނުގަންނާނެ ކަމަށެވެ. އަދި މިފަދަ ވާހަކަތަކަކީ ބައިނަލްއަގުވާމީ ގާނޫނުތަކާއި އދ.ގެ ޗާޓަރުތަކާއި މުޅިން ހިލާފު ވާހަކަތަކެއް ކަމަށް ވެސް ބުނެފައިވެ އެވެ.

އެއާ އެކު ރާއްޖޭން ވަނީ، މުޅި ސަރަހައްދުގެ ހަމަޖެހުމަށް ހުރަސްއެޅޭ ގޮތަށް ދައްކާ މިފަދަ ވާހަކަތަކާ ދެކޮޅަށް ތެދުވުމަށް ބައިނަލްއަގުވާމީ މުޖުތަމައުއަށް ގޮވާލައިފަ އެވެ. 

"މިފަދަ ވާހަކަތަކުން ސައުދީގެ އިސްތިގުލަށް ހުރަސްއެޅުމުގެ އިތުރުން، މިއީ ފަލަސްތީނުގެ ރައްޔިތުންގެ ހައްގުތަކުން މަހްރޫމްކޮށްފައިވާ އޮތް އޮތުމަށް ދެވޭ އިތުރު ހިތްވަރެއް،" ފޮރިން މިނިސްޓްރީގެ އެ ބަޔާނުގައި ބުންޏެވެ. 

މީގެއިތުރުން، އިރުމަތީ ގުދުސްއަކީ ފަލަސްތީނުގެ ވެރިރަށުގެ ގޮތުގައި ބަލައިގެނެ 1967 ގެ ބޯޑަރުތަކަށް ތަބާވުމަށް ރާއްޖޭން ގޮވާލަމުންދާ ގޮވާލުން ވަނީ އެ ބަޔާނުގައި ތަކުރާރުކޮށްފަ އެވެ.

ސަމާސާގެ ރާގުގައި ނަމަވެސް، ނަތަންޔާހޫ މި ވާހަކަ ދައްކާފައިވަނީ، ޣައްޒާ ތަރައްގީކުރަން، އެތަނުގައި ދިރިއުޅޭ ފަލަސްތީނުގެ ރައްޔިތުން ބާލައި، އެތަނަކީ އެމެރިކާގެ އަމިއްލަ ތަނެއް ކަމަށް ހެދުމަށް، އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފްތާގެ ތެރޭގައި ހުށަހަޅުއްވާފައިވަނިކޮށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.