ރާއްޖޭގައި އަހަރަކު މަރުވާ މީހުންގެ 17 ޕަސެންޓަކީ ކެންސަރު ބަލީގައި މަރުވާ މީހުން

އެޗްޕީއޭ އިން ނެރުނު ރިޕޯޓުގައިވާ ގޮތުން، ކެންސަރު ބައްޔަކީ ދުނިޔެއިން ދެވަނައަށް އެންމެ ގިނަ މީހުން މަރުވާ ސަބަބެވެ. ދުނިޔޭގައި އަހަރަކު 10 މިލިއަން މީހުން މިބަލީގައި މަރުވެ އެވެ.

ހޮސްޕިޓަލެއްގެ ވޯޑެއް

ދުނިޔޭގެ ސިއްހަތު ޖަމިއްޔާއިން 2020 ވަނަ އަހަރުގެ ރާއްޖޭގެ ތަފާސްހިސާބުތަކުގެ މައްޗަށް އަންދާޒާ ކުރާ ގޮތުގައި، ރާއްޖޭން އަހަރަކު މަރުވާ މީހުންގެ 17 ޕަސެންޓަކީ ކެންސަރު ބަލީގައި މަރުވާ މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

މިއަދު ފާހަގަކުރާ ދުނިޔޭގެ ކެންސަރު ބަލީގެ ދުވަހާ ގުޅޭ ގޮތުން އެޗްޕީއޭ އިން ނެރުނު ރިޕޯޓުގައިވާ ގޮތުން، ކެންސަރު ބައްޔަކީ ދުނިޔެއިން ދެވަނައަށް އެންމެ ގިނަ މީހުން މަރުވާ ސަބަބެވެ. ދުނިޔޭގައި އަހަރަކު 10 މިލިއަން މީހުން މި ބަލީގައި މަރުވެ އެވެ. 

އޭގެ ތެރެއިން 40 ޕަސެންޓް މީހުންނަކީ ދިރިއުޅުމުގެ ވައްޓަފާޅީގައި ގެންގުޅޭ ނުރަނގަޅު އެކި އާދަތަކުގެ ސަބަބުން ކެންސަރު ބަލި ޖެހި މަރުވާ މީހުންނެވެ.

އެޗްޕީއޭ އިން ބުނެފައިވާ ގޮތުގައި 2019 ވަނަ އަހަރުން ފެށިގެން ހޯދާފައިވާ މައުލޫމާތަށް ބަލާއިރު، ރާއްޖޭގެ ކެންސަރު ބަލީގެ ދަފްތަރުގައި އެންމެ ގިނައީ އުރަމަތީގެ ކެންސަރާއި، ފުއްޕާމޭގެ ކެންސަރު، ލޭގެ ކެންސަރު، ތައިރޮއިޑް، ލިވާ އަދި ޕްރޮސްޓޭޓް ކެންސަރެވެ.

އާންމުކޮށް ގެންގުޅޭ އާދަކާދަތަކުގެ ސަބަބުން ކެންސަރަށް މަގުފަހިވެ އެވެ. އޭގެ ތެރޭގައި؛

  •  ދުންފަތުގެ އިސްތިއުމާލު ކުރުމާއި ދުންފަތުގެ ދުމަށް ހުށަހެޅުން
  •  ކެއިންބުއިމުގެ ނުރަގަޅު އާދަތައް
  •  ދުފުން
  •  އެކަށީގެންވާ މިންވަރަށް ހެލިފެލިވެ ކަސްރަތުކޮށް ނޫޅުން
  •  ބަރުދަން ހުންނަންވާ ވަރަށްވުރެ އިތުރުވުން
  •  ބަނގުރާ ބުއިން
  •  އަލްޓްރާވައިލެޓް ރޭޑިއޭޝަނަށް ހުށަހެޅުން

އެޗްޕީއޭއިން ބުނި ގޮތުގައި މި ބަލިން ރައްކާތެރިވުމަށް ހެޕަޓައިސިސް ބީއާއި ހިއުމަން ޕެޕިލޯމާ ވައިރަސް (އެޗްޕީވީ) ވެކްސިން ޖެހިދާނެ އެވެ. އަދި ދުންފަތުގެ އިސްތިއުމާލު ނުކުރުމާއި ދުމުން ރައްކާތެރިވުމާއި ދުފުމާއި ދުރުހެލިވެގެން މި ބަލިން ރައްކާތެރިވެވޭނެ އެވެ. 

ސިއްހަތަށް ރަގަޅު ކާނާ ކެއުމާއި، ރައްކާތެރި ގޮތުގައި ޖިންސީ ގުޅުން ހިންގުމާއި އަދި ގަވާއިދުން ކެންސަރަށް ސްކްރީން ކުރުމުން ވެސް ބަލިން ރައްކާތެރިވެވޭނެ ކަމަށް އެޗްޕީއޭ އިން ބުންޏެވެ.

ރާއްޖޭގައި ކެންސަރު ބަލީގެ ދަފްތަރުގައި މިއަދާ ހަމައަށް 1،617 މީހުން ރަޖިސްޓްރީ ކޮށްފައި އެބަތިބި ކަމަށް ހެލްތު މިނިސްޓްރީން މައުލޫމާތުދެ އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.