ބިދޭސީ މީހާ މަރުވި އެކްސިޑެންޓް: 60 އަހަރުގެ އަންހެނެއްގެ ލައިސަންސް ހިފަހައްޓައިފި

މިދިޔަ ހޮނިހިރު ދުވަހު ސިނަމާލޭ ބްރިޖް ހައިވޭގައި ބަހައްޓާފައި ހުރި ކޯނެއްގައި ޖެހި އެކްސިޑެންޓްވެ، ބިދޭސީ މީހަކު މަރުވި މައްސަލައިގައި 60 އަހަރުގެ އަންހެނެއްގެ ލައިސަންސް ހިފަހައްޓައިފި އެވެ.

އެކްސިޑެންޓް ހިނގާފައި ހުޅުމާލޭން މާލެ އަންނަ ލޭނުގެ ސޯލާ ޕެނަލްތައް ކައިރީގައި މަސައްކަތް ކުރާކަން އަންގައިދިނުމަށް ބަހައްޓާފައި ހުރި ކޯނެއްގައި ސައިކަލަކުން ޖެހިގެންނެވެ.

މި އެކްސިޑެންޓްގައި އަނިޔާވި މީހާ ފަރުވާ ދިނުމަށް ގެންދިޔައީ އައިޖީއެމްއެޗަށެވެ. ފަރުވާ ދެމުން ދަނިކޮށް އެދުވަހުގެ 9:05 ހާއިރު އެމީހާ މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުނެފައިވެ އެވެ.

މި އެކްސިޑެންޓް ކަމަށް ބުނާ ހާދިސާއެއްގެ ވީޑިއޯއެއް ސޯޝަލް މީޑިއާގައި ވަނީ އާންމުވެފަ އެވެ. އާންމުވެފައިވާ ވީޑިއޯއިން ފެންނަނީ ބިދޭސީ މީހާ ކޯނުގައި ޖެހި ސައިކަލާއެކު ވެއްޓޭ މަންޒަރެވެ. 

ހަމައެވަގުތު ފަހަތުން އަންހެނަކު ދުއްވާފައި އައި ސައިކަލެއް ކޮންޓްރޯލުން ނެއްޓި، ދަނީ ވެއްޓިފައި އޮތް މީހާގެ ބޮލުގައި ޖެހިފަ އެވެ. އެކަން ހިނގުމުން ވެސް މަޑުނުކޮށް އަންހެން މީހާ އެތަން ދޫކޮށް ދިޔައީ އެވެ.

މިވީޑިއޯއާ ގުޅިގެން ސުވާލު ކުރުމުން ފުލުހުން ބުނީ މި އެކްސިޑެންޓާ ގުޅިގެން އަންހެން މީހާގެ ސައިކަލު ވެސް ޓޯކޮށްފައިވާ ކަމަށެވެ.

"މި އެކްސިޑެންޓާ ގުޅިގެން 60 އަހަރުގެ ދިވެހި އަންހެނަކާ ވަނީ ސުވާލުކޮށްފައި. އަދި އޭނާގެ ލައިސަންސް ހިފަހައްޓައި، އޭނާ ދުއްވި ސައިކަލް ވަނީ ޓޯކޮށްފައި،" ފުލުހުން ބުންޏެވެ.

އެކްސިޑެންޓްގެ މައްސަލަ އިތުރަށް ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.