ރައީސްގެ އެސްޓޯނިއާ ދަތުރުފުޅަށް 1.3 މިލިއަން ރުފިޔާ ހަރަދުކުރި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ މަހު އެސްޓޯނިއާއަށް ކުރެއްވި ދަތުރުފުޅަށް ދިވެހި ދައުލަތުން 1.3 މިލިއަން ރުފިޔާ ހަރަދުކޮށްފައިވާކަން ހާމަކޮށްފި އެވެ.

އެސްޓޯނިއާގެ ރައީސް ޑރ. އަލާރް ކަރިސްގެ ދައުވަތަކަށް ކުރައްވާ ދަތުރުފުޅެއްގައި އެ ގައުމަށް ވަޑައިގެންނެވީ މިދިޔަ މަހުގެ 13 ވަނަ ދުވަހުން ފެށިގެން 17 ވަނަ ދުވަހަށެވެ. 

ރައީސް އޮފީހުން މިއަދު ވަނީ މި ދަތުރުފުޅުގެ ތަފްސީލުތައް އާންމުކޮށްފަ އެވެ. ޖުމްލަ މުޅި ދަތުރަށް ކުރި ހަރަދު އާންމުކޮށްފައިވީ ނަމަވެސް، މި ހަރަދުތަކުގެ ތަފްސީލުތަކެއް ނެތެވެ.

މި ދަތުރުފުޅުގައި ރައީސް ވަނީ އެ ގައުމުގެ ފެންވަރު ރަގަޅު ތައުލީމީ ނިޒާމުގެ އެހީގައި ރާއްޖޭގެ މި ނިޒާމު ފުޅާކޮށް، އެ ގައުމުގައި ދިވެހިންނަށް މަތީ ތައުލޫމު ހާސިލް ކުރުމަށް ޔުނިވާސިޓީތަކުން ޖާގަ ހޯދުމަށް މަޝްވަރާ ކުރައްވާފަ އެވެ.

އޭގެ އިތުރުން އިޔާދަކުރަނިވި ހަކަތައާއި ޑިޖިޓަލް އިޖާދުތަކާއި، ތިމާވެށީގެ ވިލުންތެރިކަމުގެ ދާއިރާއިން އެއްބާރުލުން ދިނުމަށް ފަހުމުނާމާއެއްގައި ސޮއިކުރައްވާފައިވެ އެވެ. އަދި ދެ ގައުމުގެ ދެމެދުގައި ޕޮލިޓިކަލް ކޮންސަލްޓޭޝަން ފެށުމަށް ވެސް ފަހުމުނާމާއެއްގައި ސޮއިކުރައްވާފައިވެ އެވެ.

މި ދަތުރުފުޅުގައި ރައީސް އަދި އަރިހުގައި ވަޑައިގަތް ބޭފުޅުން ވަނީ އެސްޓޯނިއާގެ އިސްވެރިންނާ ބައްދަލުކުރައްވައި ވަރަށް ފުޅާ ދާއިރާއެއްގައި މަޝްވަރާތައް ކުރައްވާފަ އެވެ.

މިއީ ދިވެހި ރައީސަކު ރަސްމީ ދަތުރުފުޅެއްގައި އެގައުމަށް ވަޑައިގަތް ފުރަތަމަ ފަހަރެވެ. ރައީސް ވަޑައިގަތުމުން އެ ގައުމުން ވަނީ އެމަނިކުފާނަށް ވަރަށް ހޫނު މަރުހަބާއެއް ދަންނަވާފަ އެވެ.