ޑިއުޓީ ބޮޑުކޮށް އެމެރިކާއާއި ކެނެޑާ ވިޔަފާރީގެ "ހަނގުރާމަ" އަކަށް

އެމެރިކާ އަށް އެތެރެ ކުރާ ކެނެޑާގެ އުފެއްދުންތަކުން ބޮޑު ޑިއުޓީއެއް ނަގަން ފެށުމާއެކު ބަދަލުގައި ކެނެޑާއިންވެސް އެމެރިކާގެ އުފެއްދުންތަކަށް ބޮޑު ޑިއުޓީއެއް ހިމަނައިފި އެވެ. 

ކެނެޑާ އިން އެމެރިކާއަށް ގަވައިދާ ހިލާފަށް އެތެރެވެފައި ތިބި ހަޖުރަވެރިންގެ މައްސަލާ އާއި އެމެރިކާގެ ވިޔަފާރީގެ މަސްތަހަތު ހިމާޔަތް ކުރުމަށް ކަމަށްބުނެ އެމެރިކާގެ ރައީސް ޑޮނަލްޑް ޓްރަމް ވަނީ ކެނެޑާ އާއި ޗައިނާ އަދި މެކްސިކޯއިން އެ ގައުމަށް އެތެރެކުރާ އުފެއްދުންތަކުން ޑިއުޓީ ނަގަން ފަށާފަ އެވެ. މިއާއެކު މި ގައުމުތަކާއި އެމެރިކާއާ ދެމެދު ވަނީ ވިޔަފާރީގެ "ހަނގުރާމަ" އެއް ފެށިފަ އެވެ. 

އެމެރިކާ އިން ވަނީ ކެނެޑާއިން އެ ގައުމަށް އެތެރެކުރާ އުފެއްދުންތަކުން 25 ޕަސެންޓުގެ ޑިއުޓީ ބޮޑު ކުރަން ނިންމާފަ އެވެ. އަދި ޗައިނާގެ ބައެއް އުފެއްދުންތަކުން ވަނީ 10 ޕަސެންޓުގެ ޑިއުޓީއެއް ޖައްސާފަ އެވެ. 

އެމެރިކާގެ މި ބޯހަރު ފިޔަވަޅުގެ ސަބަބުން ކެނެޑާއިން ވަނީ ރައްދުގައި ޑިއުޓީ ބޮޑުކޮށްފަ އެވެ. އެ ގައުމުގެ ބޮޑު ވަޒީރު ޖަސްޓިން ޓްރޫޑޯ ވިދާޅުވީ އެމެރިކާގެ އުފެއްދުންތަކުން 25 ޕަސެންޓުގެ ޑިއުޓީ ބޮޑުކޮށް އެމެރިކާގެ 155 ބިލިއަން ޑޮލަރުގެ އަގުހުރި މުދަލުން ޑިއުޓީ ބޮޑު ކުރަން ވަނީ ނިންމާފަ އެވެ. 

މިގޮތުން ބުރާސްފަތި ދުވަހުން ފެށިގެން އެ ގައުމަށް އެތެރެކުރާ އެމެރިކާ 30 ބިލިއަން ޑޮލަރުގެ މުދަލުން ޑިއުޓީ ބޮޑުވާނެ އެވެ. އަދި ކުރިއަށް އޮތް 21 ދުވަހުގެ ތެރޭގައި އެތެރެކުރާ 125 ބިލިއަން ޑޮލަރުގެ އަގުހުރި މުދަލުން ޑިއުޓީ އުފުލާލާނެ އެވެ. 

"މި ފިޔަވަޅާއެކު ކެނެޑާގެ ކުންފުނިތަކާއި ކެނެޑާގެ ސަޕްލަޔަރުން ދެން [އެމެރިކާ] ނޫން ގޮތެއް ހޯދުމުގެ މަސައްކަތް ފަށާނެ،" ޖަސްޓިން ޓްރޫޑޯ ވިދާޅުވި އެވެ.