އިންޑިއާގެ މެދުފަންތީ އާބާދީ މާލީ ގޮތުން ބާރުވެރި ކުރުވަން ޓެކުހުގެ ލުޔާއެކު ބޮޑު ބަދަލެއް

އިންޑިއާ އިން ކުރިއަށް އޮތް ދެ އަހަރު ދުވަހަށް ފާސްކުރި ބަޖެޓުގައި އެންމެ އިސްކަމެއް ދީފައިވަނީ މެދުފަންތީގެ އާމްދަނީއެއް ލިބޭ މީހުން މާލީ ބާރުވެރި ކުރުވުމަށެވެ. މިގޮތުން ގެންނަ އެންމެ މުހިންމު އެއް ބަދަލަކީ މެދުފަންތީގެ މީހުން ދައްކަން ޖެހޭ އިންކަމް ޓެކްސް މައާފު ކުރުމެވެ. 

އިންޑިއާގެ ބޮޑު ވަޒީރު ނަރެންދުރަ މޯދީގެ ތިންވަނަ ދައުރުގައި މަޖިލީހަށް ހުށަހެޅި ބަޖެޓުގައި އެ ގައުމުގެ ފިނޭންސް މިނިސްޓަރު ނިރްމާލާ ތިސާރާމަން އިއްޔެ ހުށަހެޅުއްވި ބަޖެޓުގައި އެ ގައުމުގެ ފުޅާވެ އިތުރުވަމުންދާ މެދުފަންތީގެ އާމްދަނީ ލިބޭ މީހުންގެ މާލީ ފުދުންތެރިކަން އިތުރުކޮށް މާލީ ގޮތުން ބާރުވެރި ކުރުވަން ގިނަ ފިޔަވަޅުތަކެއް އަޅަން ވަނީ ނިންމާފަ އެވެ. 

މިގޮތުން މެދުފަންތީގެ އާމްދަނީ ލިބޭ މީހުންނަށް ޓެކުހުގެ ލުއިތަކެއް ދޭން ވެސް ވަނީ ނިންމާފަ އެވެ. އަހަރެއްގެ މައްޗަށް 12 މިލިއަން ރުޕީސްގެ އާމްދަނީއެއް އަހަރެއްގެ މައްޗަށް ލިބޭ މީހުންނަށް އިންކަމް ޓެކްސް މައާފުވާނެ އެވެ.  މި ބަަދަލާއެކު ގޭބިސީ އަކުން 700،000 އިންޑިއަން ރުޕީސްގެ ޓެކުސް މައާފު ވެގެންދާނެ އެވެ. މި ބަދަލާއެކު އެ ގައުމުގެ މެދުފަންތީގެ މީހަކު އަހަރެއްގެ މައްޗަށް 1.28 މިލިއަން އިންޑިއާ ރުފިޔާ (14،800 ޑޮލަރު) ގެ ޓެކުސް މައާފު ވެގެންދާނެ އެވެ. 

ފިނޭންސް މިނިސްޓަރު ނިރްމާލާ ވިދާޅުވީ މީގެ މަގުސަދަކީ އާއްމު މީހާގެ އަތްމަތީގެ ގިނަ ފައިސާ ހިފެހެއްޓޭނެ ގޮތެއް ހެދުމާއި އެމީހުންގެ އާމްދަނީ މައްޗަށް ޖައްސަން ފުރުސަތު ފަހި ކުރުމެވެ. 

ދުނިޔޭގެ އެންމެ ހަފުވިކަމާއެކު ކުރިއަރަމުންދާ އެއް އިގްތިސޯދު ކަމަށްވާ އިންޑިއާގެ ބަޖެޓުގައި ފާހަގަ ކުރެވޭ އަނެއް ކަމަކީ އެ ގައުމުގެ ފްރީލާންސް މަސައްކަތްތެރިންގެ އުފެއްދުންތެރިކަން އިތުރު ކުރަން ގެންނަ ބަދަލެވެ. ޒުވާން ޖީލުގެ ވަޒީފާގެ ވައްޓަފާޅިއަށް އަންނަ ބަދަލަށް ބަލައި ގެންނަ މި ބަދަލާއެކު އެ ގައުމުގެ ފްރީލާންސް މަސައްކަތްތެރިންނަށް ސަރުކާރު ގަބޫލުކުރާ އައިޑީ ކާޑެއް ދޭނެ އެވެ. އަދި ހެލްތް އިންޝުއަރެންސް ހަމަޖައްސައިދޭނެ އެވެ. އަދި ވެލްފެއާ ސްކީމްތައް ތައާރަފު ކުރާނެ އެވެ. އިންޑިއާގައި ފްރީލާންސް މަސައްކަތްތެރިންގެ އަދަދު 50 މިލިއަނަށް އަރަ އެވެ. މި މީހުންނަކީ އަހަރެއްގެ މައްޗަށް 18،000 އިންޑިއަން ރުޕީސްގެ އާމްދަނީއެއް ހޯދާ ބައެކެވެ. މި މަސައްކަތްތެރިންގެ 71 ޕަސެންޓަކީ ޒުވާނުންނެވެ.