ޒިންމާ އަދާކުރީ އިހުލާސްތެރިކަމާއެކު، އެ ފުރުސަތަށް ޝުކުރުވެރިވަން: ފައިސަލް

ޓޫރިޒަމް މިނިސްޓަރުގެ ހައިސިއްޔަތުން ގައުމަށް ހިދުމަތް ކުރަން ލިބުނު ފުރުސަތާމެދު ފަހުރުވެރިވާ ކަމަށާއި އެކަމަށް ރައީސް ޑރ. މުހައްމަދު މުއިއްޒަށް ޝުކުރު އަދާކުރައްވާ ކަމަށް ކުރީގެ މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.

ރައީސްގެ ސިޓީފުޅަކުން ފައިސަލް ވަނީ މިދިޔަ އަންގާރަ ދުވަހު މަގާމުން ވަކިކުރައްވާފަ އެވެ. މިކަމާ ގުޅިގެން ފައިސަލް ވަނީ މިއަދު ބަޔާނެއް އާންމު ކުރައްވާފަ އެވެ.

އެ ބަޔާނުގައި އޭނާ ވިދާޅުވެފައި ވަނީ އެ މަގާމު ފުރުއްވަން ލިބުނު ފުރުސަތަކީ ލިބުނު ނުހަނު މަތިވެރި އުފަލަކާއި ޝަރަފެއް ކަމަށެވެ.

"ދިވެހި ގައުމަށާއި ދިވެހި ރާއްޖޭގެ ޓޫރިޒަމަށް ހިދުމަތް ކުރާން އަޅުގަނޑަށް ފުރުސަތު ދެއްވި ކަމައްޓަކައި އިހުލާސްތެރި ކަމާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޝުކުރު އަދާ ކުރަން،" ފައިސަލްގެ ބަޔާނުގައިވެ އެވެ.

ފައިސަލް ވިދާޅުވީ ވޭތުވެ ދިޔަ ތަނުގައި، ރައީސް ހަވާލުކުރެއްވި ޒިންމާތައް އަދާކުރައްވާފައި ވާނީ ޝައުގުވެރިކަމާއި އިހުލާސްތެރި ކަމާއެކު ތެދުވެރިކަމާއެކުގައި ކަމަށެވެ.

"އަޅުގަނޑު ގާބިލިއްޔަތު ތަންދިން އެންމެ އުސް ދަރަޖައިގައި ވަރުބަލި ނުވެ [ހިދުމަތް ކުރީ]. އަޅުގަނޑާ ހަވާލު ކުރެއްވި ޓޫރިޒަމްގެ އަމާޒުތަކަށް ވާސިލުވާން މަސައްކަތްކޮށްފައި ވާނީ ދިވެހި ރައްޔިތުންނާއި ގާތުން. ބަދަލުވަމުންދާ ދުނިޔޭގެ ފަތުވެރިކަމަށް ބަލައިގެން،" ފައިސަލްގެ ބަޔާނުގައިވެ އެވެ.

ޓޫރިޒަމް ދާއިރާއާ ގުޅޭ ގޮތުން ފައިސަލް ވިދާޅުވީ ސަރުކާރުން މިދިޔަ އަހަރަށް ކަނޑައެޅި މައިގަނޑު އަމާޒު ކަމަށްވާ ދެ މިލިއަން ޓޫރިސްޓުންގެ ލަނޑުދަޑިއަށް ވާސިލްވެފައިވާ ކަމަށެވެ. އެއީ ދިވެހިންގެ ހަޔާތުގައި ތާރީހީ އުފަލަކާއި ލިބުނު ބޮޑު ކާމިޔާބީއެއް ކަމަށެވެ. އެކަން ހާސިލް ކުރެވުނީ ސަރުކާރާއި ރައްޔިތުނާއި އަދި މުޅި އިންޑަސްޓްރީގެ އިތުރުން ފާޑުކިޔުންތައް ވެސް އަޑު އަހައިގެންކަން ވެސް ފާހަގަކުރައްވާފައިވެ އެވެ.

"ދިވެހި ސަރުކާރާއެކު ދިވެހި ގައުމަށް އަޅުގަނޑު ހިދުމަތް ކުރިއިރު، ރައީސް މުއިއްޒުގެ ފަރާތްޕުޅުންނާއި އެ މަނިކުފާނުގެ ވަޒީރުންގެ މަޖިލީހާއި ޓޫރިޒަމް މިނިސްޓަރީގެ ސިޔާސީ މުވައްޒަފުންނާއި ސިވިލްސާވިސް މުވައްޒަފުންގެ ފަރާތުން އަޅުގަނޑަށް އެއްބާރުލުން ދީފައި ވަނީ ނުހަނު ބޮޑަށް. އެ ހުރިހާ ފަރާތްތަކަށް އަޅުގަނޑުގެ ހިތުގައި އޮތީ ލޯތްބާއި ޝުކުރު،" ފައިސަލް ވިދާޅުވި އެވެ.

އޭގެ އިތުރުން ޓޫރިޒަމް އިންޑަސްޓްރީ އާއި އެ އިންޑަސްޓްރީގައި ހިމެނޭ މަޓީ، މަޓާޓޯ އަދި ގެސްޓް ހައުސް އެސޯސިއޭޝަނާއި އެޑްވައިޒާ ޓު ދަ ޕްރެޒިޑެންޓް އޮން ޓޫރިޒަމް، ދެއްވި އެއްބާރުވުމަށް ވެސް ފައިސަލް ވަނީ ޝުކުރު ދަންނަވާފަ އެވެ.

ފައިސަލް ވިދާޅުވެފައި ވަނީ ދިވެހި ޓޫރިޒަމް އެހެން ހަރުފަތަކަށް ގެންދިއުމަށް ޒުވާނުންނަށް ފަހި ފުރުސަތުތައް ހޯދައިދީ، އިންވެސްޓްކޮށް ޒުވާނުންގެ ބައިވެރިވުމާއެކު ދިވެހި ޓޫރިޒަމް ދިވެހިންގެ އަތް މައްޗަށް ގެނައުމަކީ މުހިންމު ކަމެއް ކަމަށެވެ. އެއީ ރައީސް ވެސް ވަރަށް ބޮޑަށް ޝައުގުވެރިވާ ކަމެއްކަން ފާހަގަކުރައްވާފައިވެ އެވެ.

"ދިވެހި ގައުމަށް ހިދުމަތް ކުރުމަކީ އަބަދުވެސް އަޅުގަނޑުގެ އެންމެ ބޮޑު އުފާ. ދެކޭ އެންމެ ބޮޑު ހުވަފެން. އަޅުގަނޑު އަދާ ކުރަން ޖެހޭ އެންމެ ބޮޑު ގައުމީ ވާޖިބުވެސްމެ. އަޅުގަނޑު އެދެނީ ދިވެހި ގައުމާއި، ރާއްޖޭގެ، ޓޫރިޒަމަށް ފެހި ކަމާއި އާރޯ ކަން ލިބިލިބި ހުރުން،" ފައިސަލް ވިދާޅުވި އެވެ.