އުދައްޔު މަރާލި މައްސަލައިގައި ދެން އޮތީ ހުކުމް

ގއ. މާމެންދޫގައި ގުރޫޕް މާރާމާރީ ހިންގައި އެ ރަށު ލިލީ އޮފް ދަ ވެލީ، އަހްމަދު އުދައްޔު މަރާލި މައްސަލައިގެ އަޑުއެހުންތައް މިއަދު ނިންމާލައިފި އެވެ.

މި މަރުގެ ދައުވާ ލިބެނީ ގއ. މާމެންދޫ ރިހިފަރުދާގެ، އަހްމަދު ޝަމީމާއި އެ ރަށު ބިލަތްމާގެ، ޝަރަފް ރަޝީދު އަދި ގުލްފާމުގެ، މުހައްމަދު މާޒިން އަށެވެ. މީގެ އިތުރުން މި މައްސަލައިގައި 18 އަހަރުން ދަށުގެ ކުޑަކުއްޖަކު ވެސް ހިމެނެ އެވެ. އެ ކުއްޖާގެ މައްޗަށް ވަނީ އުދައްޔު މަރައިލިކަން ސާބިތު ވެފަ އެވެ.

މި މައްސަލައިގައި މިއަދު ކްރިމިނަލް ކޯޓުގައި ބޭއްވި އަޑުއެހުމުގައި ވަނީ ދެ ފަރާތުން ވެސް ހުލާސާ ބަޔާން އިއްވާފަ އެވެ. ހުލާސާ ބަޔާން އިއްވަމުން ދައުލަތުން ބުނެފައި ވަނީ ކުޑަކުއްޖާގެ އިތުރުން ތިން މީހުން ވެސް އަމަލީ ގޮތުން މި މައްސަލައިގައި ބައިވެރިވެފައިވާ ކަމަށެވެ.

އުދައްޔުއަށް ހަމަލާ ދޭ މަންޒަރާއި، އުދައްޔުއާމެދު މި ތިން މީހުން ތޫނު ހަތިޔާރު ބޭނުންކޮށްގެން މާރާމާރީ ހިންގާ މަންޒަރު ލޮލަށް ފެނުނު ހެކިވެރިން މައްސަލައިގައި ހެކިބަސް ދީފައިވާކަން ދައުލަތުން ފާހަގަކުރި އެވެ. ބައެއް ހެކިންގެ ހެކިބަހުގައި ފުށުއެރުންތަކެއް ހުއްޓަސް، މައްސަލައަށް އަސަރުކުރާ މިންވަރުގެ ފުށުއެރުމެއް ނެތްކަން ވެސް ފާހަގަކުރި އެވެ.

އޭގެ އިތުރުން، ހަމަލާއަށްފަހު މި މީހުން އުފާފާޅުކުރާ މަންޒަރު ފެނުނު މީހުން ވެސް ހެކިބަސް ދީފައިވާ ކަމަށާއި، އުފާފާޅުކުރާނީ ހަމަލާ ދިނުމުގެ ގަސްތު އޮތުމުން ކަމަށް ވެސް ދައުލަތުން ބުނެފައިވެ އެވެ.

ދިފާއުން ހުލާސާ ބަޔާން އިއްވަމުން އެމީހުން މި ކަމުގައި ބައިވެރިވެފައި ނުވާ ކަމަށް ނެގި ދިފާއު ތަކުރާރުކޮށްފައިވެ އެވެ.

ދެފަރާތުން ވެސް ހުލާސާ ބަޔާން އިއްވާ ނިމުމުން، ގާޒީ އަލީ ނަދީމް ވިދާޅުވީ މައްސަލައިގައި ހުކުމް ކުރުމަށް މާޗް މަހުގެ ތެރޭގައި އަޑުއެހުމެއް ތާވަލު ކުރައްވާނެ ކަމަށެވެ.

އުދައްޔު މާރާލީ ފެބްރުއަރީ 8، 2021 ގައި މާމެންދޫގައި ހިންގި ވަރުގަދަ މާރާމާރީއެއްގަ އެވެ. ހާދިސާ ހިނގި ސަރަހައްދުގައި ތިން މީހުން އަމަލީ ގޮތުން ހަރަކާތްތެރިވި ކަމާއި، އުދައްޔުއަށް ހަމަލާ ދިނުމަށްފަހު އެމީހުން އުފާފާޅުކުރި ކަމަށް ދައުލަތުގެ ހެކިން ހެކިބަސް ދީފައިވެ އެވެ.