"ފައިސަލް މަގާމުގެ މަސްއޫލިއްޔަތުތައް އަދާކުރީ އިހްލާސްތެރިކަމާއެކު"
"ރާއްޖޭގެ ފަތުރުވެރިކަމާބެހޭ ވަޒީރުކަމުގެ މަގާމުގައި ހުރެގެން ހިދުމަތް ކުރީ އިހުލާސްތެރިކަމާ ތެދުވެރިކަމާއެކު. ނަތީޖާނެރެދެއްކި. ދާއިރާގެ އިތުބާރާ ލޯބި ހޯދި،" އަބްދުއްރަހީމް ވިދާޅުވެފައިވެ އެވެ.
ޓޫރިޒަމް މިނިސްޓަރުގެ މަގާމުގައި ހުންނަވައިގެން އިބްރާހިމް ފައިސަލް ހިދުމަތް ކުރެއްވީ އިހުލާސްތެރިކަމާއެކުގައި ކަމަށް އޭނާގެ ބައްޕަ އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒު މިއަދު ވަނީ ކުއްލި ގޮތަކަށް ފައިސަލް މަގާމުން ވަކިކުރައްވާފަ އެވެ. މަގާމުން ވަކިކުރެއްވި ސަބަބުން ހާމަކޮށްފައެއް ނުވެ އެވެ.
އެކަމާ ގުޅޭ ގޮތުން އާންމުންގެ މެދުގައި ސުވާލު އުފެދިފައި ވަނިކޮށް އަބްދުއްރަހީމް އެކްސްގައި ޕޯސްޓެއް ކުރައްވާފަ އެވެ. އެ ޕޯސްޓުގައި ވިދާޅުވެފައި ވަނީ ފައިސަލަށްޓަކައި މުޅި އާއިލާ ފަހުރުވެރިވާ ކަމަށެވެ. ޓޫރިޒަމް މިނިސްޓަރުގެ މަގާމު އަދާކުރެއްވީ އިހުލާސްތެރިކަމާއި ތެރުވެރިކަމާއި އެކުގައި ކަމަށެވެ.
އަދި، ފައިސަލްގެ މަސައްކަތުން ނަތީޖާވެސް ނެރެދީފައިވާ ކަމަށް އަބްދުއްރަހީމް ވިދާޅުވި އެވެ.
"ރާއްޖޭގެ ފަތުރުވެރިކަމާބެހޭ ވަޒީރުކަމުގެ މަގާމުގައި ހުރެގެން ހިދުމަތް ކުރީ އިހުލާސްތެރިކަމާ ތެދުވެރިކަމާއެކު. ނަތީޖާނެރެދެއްކި. ދާއިރާގެ އިތުބާރާ ލޯބި ހޯދި،" އަބްދުއްރަހީމް ވިދާޅުވެފައިވެ އެވެ.
އެ ޕޯސްޓުގައި އޭނާ ވަނީ ފައިސަލަށް އުޖާލާ މުސްތަގުބަލެއް މިންވަރު ކުރެއްވުން އެދި ދުއާ ވެސް ކުރައްވާފަ އެވެ.
ފައިސަލް މަގާމުން ވަކިކުރައްވައި ރައީސް ވަނީ ވަގުތީގޮތުން ޓޫރިޒަމް މިނިސްޓްރީގެ ހިންގެވުން އިކޮނޮމިކް މިނިސްޓަރު މުހައްމަދު ސައީދުއާ ހަވާލުކުރައްވާފަ އެވެ.
ފައިސަލް މަގާމުން ވަކިކުރައްވާފައި މިވަނީ އަބްދުއްރަހީމާއި ރައީސްގެ ގުޅުން ހީނަރުވެފައިވާކަމުގެ އަޑުތަކެއް ފެތުރިފައި ވަނިކޮށެވެ. ފައިސަލް ވަކިކުރެއްވުމުން އެކަމުގެ ކަންބޮޑުވުން އަބްދުއްރަހީމް ވަނީ ބައެއް މީޑިއާތަކަށް ދެއްވި އިންޓަވިއުތަކުގައި ފާޅުކުރައްވާފަ އެވެ.
ކޮމެންޓް
Republic of Maldives