ތިނަދޫ ކައުންސިލުން ލިޔުންތައް ހޯދީ ގާނޫނީ އިމުގެ ތެރެއިން: އޭސީސީ

އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރަމުންދާ މައްސަލަތަކާ ގުޅިގެން ތިނަދޫ ސިޓީ ކައުންސިލުގައި ހުރި ލިޔެކިޔުންތައް ހޯދާފައި ވަނީ ގާނޫނީ އިމުގެ ތެރެއިން ކަމަށް އެ ކޮމިޝަނުން ބުނެފި އެވެ.

ތިނަދޫ ސިޓީ ކައުންސިލްގެ ޕޭސްބުކް ޕޭޖުގައި މިއަދު ކޮށްފައިވާ ޕޯސްޓެއްގައި ބުނެފައި ވަނީ އެ ކައުންސިލްގެ ގިނަ އަދަދެއްގެ ތަކެތި "އޭސީސީގެ ނަމުގައި އައި ބަޔަކު ވަގަށް" ނަގާފައިވާ ކަމަށެވެ. އެހެންވެ، ކައުންސިލްގެ ހިދުމަތްތަކަށް ވެސް ބުރޫއަރާފައިވާ ކަމަށެވެ.

މިކަމާ ގުޅިގެން ސުވާލު ކުރުމުން އޭސީސީ އިން މިއަދު ނެރުނު ބަޔާނެއްގައި ބުނެފައި ވަނީ ކައުންސިލުން ކޮށްފައި ވަނީ ދޮގު ތުހުމަތުތަކެއް ކަމަށެވެ. އަދި ކޮމިޝަނާ ގުޅޭ ގޮތުން ފަތުރަމުންދާ ހަގީގަތާ ހިލާފު ވާހަކަތަކީ ބަލައިގަނެވޭ ކަމެއް ނޫން ކަމަށާއި އެއީ އިންތިހާޔަށް ކަންބޮޑުވާ ކަމެއް ކަމަށް އޭސީސީ އިން ބުންޏެވެ.

ކަން ހިނގައި ދިޔަ ގޮތް ސާފުކޮށްދެމުން އޭސީސީން ބުނީ ކައުންސިލްގެ މައްޗަށް ތަހުގީގު ކުރަމުންދާ މައްސަލަތަކަކާ ގުޅިގެން އެ ކޮމިޝަންގެ ޓީމެއް އިއްޔެ ކައުންސިލްތެރޭ ހަރަކާތްތެރިވެފައިވާ ކަމަށެވެ.

"ނަމަވެސް މިކަމުގައި މި ކައުންސިލްގެ ފުރިހަމަ އެއްބާރުލުން ލިބިފައިނުވާ ވާހަކަ ހިތާމައާއެކު ދެންނެވިން. އެހެންނަމަވެސް، ގާނޫނު އަސާސީއާ، އެންޓި-ކޮރަޕްޝަން ގާނޫނުގެ ދަށުން، މި ކޮމިޝަނުގެ ގާނޫނީ އިމުގެ ތެރެއިން، އެންމެހާ އިޖުރާއަތްތައް ފުރިހަމަ ކުރުމަށްފަހު، މި ކޮމިޝަނުގެ ތަހުގީގަށް ބޭނުންވާ ލިޔެކިޔުންތައް ވަނީ ހޯދާފައި،" އޭސީސީގެ ބަޔާނުގައިވެ އެވެ.

ތިނަދޫ ސިޓީ ކައުންސިލުގެ މޭޔަރު ސައުދު އަލީ ވިދާޅުވެފައި ވަނީ އޭސީސީން ގިނަ އަދަދެއްގެ ސާމާނު ގެންގޮސްފައި ވަނީ އިއްޔެ ރަސްމީ ގަޑި ނިމުނު ފަހުން އިދާރާގައި މުވައްޒަފަކު ނެތް ވަގުތެއްގައި ކަމަށެވެ. އެ މައްސަލަ ފުލުހަށް ހުށަހަޅައި، ދައުވާ ކޮށްދިނުމަށް އެދިފައިވާނެ ކަމަށް ވެސް އޭނާ ވިދާޅުވި އެވެ.

ކައުންސިލާ ގުޅޭ ކޮރަޕްޝަނުގެ މައްސަލަތަކެއް އޭސީސީން ދަނީ ތަހުގީގު ކުރަމުންނެވެ. އޭގެ ތެރޭގައި މިދިޔަ އީދުގައި އެރަށުގެ ބަނދަރުމަތީ ބެހެއްޓި ދެ  މޮނިއުމަންޓް ހެދުމުގައި ވެސް ކޮރަޕްޝަންގެ އަމަލުތަކެއް ހިންގާފައިވާ މައްސަލައެއް ހިމެނެ އެވެ.