އޭސީސީން ތިނަދޫ ސިޓީ ކައުންސިލަށް ވަދެ، ވައްކަން ކުރި ކަމުގެ ތުހުމަތު
"އެމީހުން ކައުންސިލްތެރޭ ނުނުކުމެ ތިބުމުން ކޯޓު އަމުރެއް ނެތި ތިބެގެން ނުވާނެ ކަމަށް ވެސް އެންގިން. ރަސްމީ ގަޑި ނިމި މުވައްޒަފުން ނެތް ގަޑިއެއްގައި ކައުންސިލްތެރެ ލޫޓުވާލާފައި ވަނީ. މިއަދު ހެނދުނު އެކަން ކޮށްފައި ހުރިކަން އެނގުނީ،"
ތިނަދޫ ސިޓީ ކައުންސިލަށް އެންޓި ކޮރަޕްޝަން ކޮމިޝަން (އޭސީސީ) އިން ވަދެ، ނުރަސްމީ ގަޑީގައި ކައުންސިލްތެރޭ ހުރި ސާމާނު "ވަގަށް" ގެންގޮސްފައިވާ ކަމަށް އެ ކައުންސިލުން ބުނެފި އެވެ.
ކައުންސިލްގެ ޕޭސްބުކް ޕޭޖުގައި މިއަދު ކޮށްފައިވާ ޕޯސްޓެއްގައި ބުނެފައި ވަނީ އެ ކައުންސިލްގެ ގިނަ އަދަދެއްގެ ތަކެތި "އޭސީސީގެ ނަމުގައި އައި ބަޔަކު ވަގަށް" ނަގާފައިވާ ކަމަށެވެ. އެހެންވެ، ކައުންސިލްގެ ހިދުމަތްތަކަށް ވެސް ބުރޫއަރާފައިވާ ކަމަށެވެ.
ކައުންސިލުން ހިއްސާކޮށްފައިވާ ފޮޓޯތަކުން ފެންނަ ގޮތުގައި، ފައިލްތަކާއި ބައެއް ސާމާނު ބިންމައްޗަށް ވަނީ އުކާލާފަ އެވެ.
މިކަމާ ގުޅޭ ގޮތުން "މިރާ" އަށް މައުލޫމާތު ދެއްވަމުން ކައުންސިލްގެ މޭޔަރު ސައުދު އަލީ ވިދާޅުވީ އޭސީސީ އިން ކައުންސިލް އިދާރާއަށް ވަނީ އިއްޔެ ރަސްމީ ގަޑީގައި ކަމަށެވެ. ނަމަވެސް އިއްޔެ އެއްވެސް ލިޔުމެއް ގެންގޮސްފައި ނުވާ ކަމަށެވެ.
އޭސީސީގެ ތިން މީހަކު ކައުންސިލަށް އައުމުން، މާދަމާ 2:30 އަށް އެމީހުންނަށް މައުލޫމާތު ދިނުމަށް ބައްދަލުވުމެއް ބާއްވާނެ ކަމަށް ކައުންސިލުން ބުނެފައިވާނެ ކަމަށް ވެސް ސައުދު ވިދާޅުވި އެވެ. ނަމަވެސް އެމީހުން ކައުންސިލް ތެރޭގައި ނުނުކުމެ ތިބީ ކަމަށް އޭނާ ވިދާޅުވި އެވެ.
"އެމީހުން ކައުންސިލްތެރޭ ނުނުކުމެ ތިބުމުން ކޯޓު އަމުރެއް ނެތި ތިބެގެން ނުވާނެ ކަމަށް ވެސް އެންގިން. ރަސްމީ ގަޑި ނިމި މުވައްޒަފުން ނެތް ގަޑިއެއްގައި ކައުންސިލްތެރެ ލޫޓުވާލާފައި ވަނީ. މިއަދު ހެނދުނު އެކަން ކޮށްފައި ހުރިކަން އެނގުނީ،" ސައުދު ވިދާޅުވި އެވެ.
އޭނާ ވިދާޅުވީ އޭސީސީ އިން ކައުންސިލް އިދާރާ "ލޫޓުވާލާފައިވާ" ކަމަށެވެ. ބަލަމުންދަނީ ކޮން މައްސަލައެއްކަން ވެސް ކައުންސިލަށް ނޭންގޭ ކަމަށް ވިދާޅުވި އެވެ.
ސައުދު ތުހުމަތު ކުރައްވާ ގޮތުގައި އޭސީސީ އިން ތިނަދޫ ސިޓީ ކައުންސިލަށް ވަނީ ތިނަދޫ އިތުރު ދާއިރާގެ މެންބަރު ސައުދުﷲ ހިލްމީ އަންގައިގެންނެވެ. ރައްޔިތުންގެ މަޖިލީހުގެ ލެޓާހެޑް ބޭނުންކޮށްގެން އޭސީސީއަށް މައްސަލަތައް ހުށަހަޅާފައި ވަނީ މެންބަރު ކަމަށް ތުހުމަތު ކުރެއްވި އެވެ. އެއީ ތިނަދޫއަށް "ސިޓީ" ގެ ދަރަޖަ ދީފައިވާތީ އެކަން އުވާލަން މެންބަރު ކުރައްވަމުން ގެންދަވާ މަސައްކަތެއް ކަމަށް ސައުދު ތުހުމަތު ކުރެއްވި އެވެ،
"އަޅުގަނޑުމެންވާނެ ކައުންސިލަށް ވަތް ކުދިންނާއި އަދި އެކުދިން ކައުންސިލަށް ވަދެ ވައްކަން ކުރަން އެންގި ފަރާތްތަކުގެ މައްޗަށް ތަހުގީގު ހިންގައި މައްސަލައިގައި ދައުވާ ކޮށްދިނުމަށް އެދި ފުލުހަށް ހުށަހަޅާފައި،" ސައުދު ވިދާޅުވި އެވެ.
މައްސަލަ ފުލުހަށް ހުށަހަޅާފައިވާކަން ފުލުހުން ވެސް ވަނީ ކަށަވަރުކޮށްދީފަ އެވެ. ނަމަވެސް މިހާތަނަށް ބެލި ބެލުމުން "ވައްކަން" ކޮށްފައިވާކަމަށް ނުބެލެވޭ ކަމަށް ފުލުހުން ބުންޏެވެ. ފުލުހުން ބުނީ މައްސަލައިގައި ބަލަން ޖެހޭ ކަންކަން ބަލަމުންދާ ކަމަށެވެ.
މި މައްސަލައާ ގުޅިގެން އޭސީސީގެ ރަސްމީ ބަހެއް ނުލިބެ އެވެ. ނަމަވެސް އެކި މަސްދަރުތަކުން، ކައުންސިލް އިދާރާއަށް އޭސީސީގެ ބަޔަކު ވަދެ، ތަކެތި ގެންގޮސްފައިވާކަން ވަނީ ކަށަވަރުވެފަ އެވެ.
ކައުންސިލާ ގުޅޭ ކޮރަޕްޝަނުގެ މައްސަލަތަކެއް އޭސީސީން ދަނީ ތަހުގީގު ކުރަމުންނެވެ. އޭގެ ތެރޭގައި މިދިޔަ އީދުގައި އެރަށުގެ ބަނދަރުމަތީ ބެހެއްޓި ދެ މޮނިއުމަންޓް ހެދުމުގައި ވެސް ކޮރަޕްޝަންގެ އަމަލުތަކެއް ހިންގާފައިވާ މައްސަލައެއް ހިމެނެ އެވެ.
ކޮމެންޓް
Republic of Maldives