މީހެއްގެ އެކައުންޓުން އެއްލައްކަ ރުފިޔާ ވަގަށް ނެގި މީހަކު ބަންދަށް

މަކަރާ ހީލަތުން މީހެއްގެ އެކައުންޓުން އެއްލައްކައަށްވުރެ ގިނަ ރުފިޔާ ވަގަށް ނެގި މީހަކު ހައްޔަރު ކޮށްފި އެވެ.

މި މައްސަލައިގައި ހައްޔަރު ކޮށްފައި ވަނީ އުމުރުން 22 އަހަރުގެ، ގދ. ތިނަދޫ، ސްކޫނާ، ހުސައިން ޝާހިލް މުހައްމަދެވެ.

އޭނާގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރު ކުރުމުން، އެ ކޯޓުން ނެރެފައިވާ އަމުރުން އެނގޭ ގޮތުގައި މަކަރާހީލަތުން ވަގަށް ނެގި ފައިސާގެ ބޮޑު ބައި ޖަމާކޮށްފައިވަނީ އޭނާގެ އަމިއްލަ އެކައުންޓަށެވެ. 

އެގޮތުން ވަގަށް ނެގި ފައިސާގެ ތެރެއިން 95،000 ރުފިޔާ ޝާހިލްގެ އަމިއްލަ އެކައުންޓަށް ޖަމާވެފައިވާ ކަމަށާއި، އެއަށްފަހު އޭގެއިން ފައިސާ ނަގައި އަދި އިތުރު އެކައުންޓްތަކަށް ޓްރާންސްފާ ކޮށްފައިވާ ކަމަށް ފުލުހުން ވަނީ ކޯޓުގައި ބުނެފަ އެވެ.

އަމުރުގައިވާ ގޮތުން ޝާހިލް ވަނީ ކުށަށް އިންކާރު ކޮށްފަ އެވެ. އޭނާ ބުނެފައި ވަނީ އެ އަމަލު ހިންގީ އޭނާ ނޫން ކަމަށާއި އެކަން ކުރީ އަބްދުﷲ ކިޔާ އޭނާގެ ރައްޓެއްސެއް ކަމަށެވެ. އޭނާ އެކައުންޓަށް ޖަމާވި ފައިސާގެ ބައެއް އަމިއްލައަށް ނެގި ކަމަށާއި ބާކީ ހުރި ފައިސާ އަބްދުﷲ ބުނެގެން ޓްރާންސްފާ ކުރީ ކަމަށް ވެސް ބުނެފައިވެ އެވެ.

ކޯޓު އަމުރުގައިވާ ގޮތުން ތުހުމަތު ކުރެވޭ މިންވަރަށް ފުލުހުން ވަނީ ހެއްކާއި ގަރީނާ ހުށަހަޅާފަ އެވެ. އެހެންވެ، އޭނާ 15 ދުވަހަށް ކަސްޓޯޑިއަލް ޖަލެއްގައި ބަންދު ކުރުމަށް ވަނީ އަމުރުކޮށްފަ އެވެ.