އީސީގެ މެންބަރު ކަމަށް ސޮލާހާއި ޒާހިދު އައްޔަނު ކޮށްފި
އީސީގެ މެންބަރުކަމުގެ ދެ ގޮނޑި ހުސްވީ ކޮމިޝަންގެ ނައިބް ރައީސް އަލީ ނަޝާތާއި މެންބަރު މުހައްމަދު އާސިފް މަގާމުން އިސްތިއުފާ ދެއްވުމާ ގުޅިގެންނެވެ.
އިލެކްޝަން ކޮމިޝަންގެ މެންބަރުންގެ ހުސްވެފައިވާ ދެ ގޮނޑިއަށް އެ ކޮމިޝަންގެ ސެކްރެޓަރީ ޖެނެރަލްގެ މަގާމުގައި ކުރިން ހުންނެވި އަބްދުއްރަހްމާން ސޮލާހު ރަޝީދާއި ހިއުމަން ރައިޓްސް ކޮމިޝަންގެ ކުރީގެ ނައިބު ރައީސް މުހައްމަދު ޒާހިދު މިއަދު އައްޔަނު ކުރައްވައިފި އެވެ.
ރައީސް އޮފީހުގައި މިއަދު ބޭއްވި ރަސްމިއްޔާތެއްގައި މި ދެ ބޭފުޅުންނަށް މެންބަރުކަމަށް އައްޔަން ކުރެއްވިކަމުގެ ލިޔުން ހަވާލު ކުރެއްވީ ރައީސް ޑރ. މުހައްމަދު މުއިއްޒެވެ.
މި ދެ ބޭފުޅުންގެ ނަން ރައްޔިތުންގެ މަޖިލީހުން ފާސްކޮށްފައި ވަނީ ދައުރުން ބޭރުން މިމަހުގެ 16 ވަނަ ދުވަހު ބޭއްވި ޖަލްސާގައި ވޯޓުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
އީސީގެ މެންބަރުކަމުގެ ދެ ގޮނޑި ހުސްވީ ކޮމިޝަންގެ ނައިބް ރައީސް އަލީ ނަޝާތާއި މެންބަރު މުހައްމަދު އާސިފް މަގާމުން އިސްތިއުފާ ދެއްވުމާ ގުޅިގެންނެވެ.
ދެބޭފުޅުން މަގާމުން އިސްތިއުފާ ދެއްވީ ކޮރަޕްޝަންގެ އަމަލުތަކެއް ހިންގާފައި ވާތީ މިނިވަން މުއައްސަސާތަކުގެ ކޮމިޓީން ދެ މެންބަރުން ވަކިކުރުމަށް ފާސްކޮށްފައި ވަނިކޮށެވެ.
އީސީއަށް އައްޔަން ކުރި ޒާހިދަކީ ކުރިން އެޗްއާރުސީއެމުން ވަކިކުރި ބޭފުޅެކެވެ. އޭނާ އެ މަގާމުން ވަކިކޮށްފައި ވަނީ ކުރީގެ މަޖިލީހުގައި އޭނާގެ އިތުބާރު ނެތް ކަމަށް ފާސްކޮށްގެންނެވެ.
ކޮމިޝަނަށް އައްޔަނު ކުރި ސޮލާހު އެންމެ ފަހުން ހުންނެވީ ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ޕީއެސްއަކަށެވެ.
ކޮމެންޓް
Republic of Maldives