ދިރުވާލައިގެން ކިލޯއަކަށްވުރެ ގިނަ ޑްރަގް އެތެރެ ކުރި މީހަކު ބަންދު ކޮށްފި

ދިރުވާލައިގެން ކިލޯއަކަށްވުރެ ގިނަ މަސްތުވާތަކެތި ރާއްޖެ އެތެރެކުރަން އުޅުނު ބްރެޒިލް ފިރިހެނަކު ބަންދު ކޮށްފި އެވެ.

އުމުރުން 44 އަހަރުގެ ލެންޑަސަން ޑިޕައުލޯ ގާސިއާ ނަމަކަށް ކިޔާ އެމީހާގެ މައްޗަށް ކްރިމިނަލް ކޯޓުން އިއްޔެ ނެރެފައިވާ އަމުރުގައިވާ ގޮތުން، އޭނާގެ ހަށިގަނޑުން 107 ބްލެޓް ވަނީ ފެނިފަ އެވެ.

މި މަސްތުވާތަކެތީގެ ބަރުދަން ކިލޯއަކަށްވުރެ ގިނަކަމަށް ފުލުހުން ވަނީ ކޯޓޫގައި ބުނެފަ އެވެ. މައްސަލައިގައި އިތުރު ފަރާތްތައް ބައިވެރިވާ ކަމަށް ތުހުމަތުކޮށް، ކޮންޓްރޯލް ޑެލިވަރީ އޮޕަރޭޝަނެއް ވަނީ ހިންގާފަ އެވެ. މި އޮޕަރޭޝަނުގެ ތެރެއިން ދިވެހި ފިރިހެނަކު ވެސް ވަނީ ހައްޔަރު ކޮށްފަ އެވެ.

އަމުރުގައިވާ ގޮތުން، ބްރެޒިލް މީހާގެ ކުޑަކަމުދާތަކެތި ކޮކޭންއަށް ވަނީ ޕޮޒިޓިވްވެފަ އެވެ.

އޭނާ ބަންދު ކޮށްދިނުމަށް ފުލުހުން ކޯޓުގައި އެދުނީ 30 ދުވަހަށެވެ. ނަމަވެސް ގާޒީ ސޮފްވަތު ހަބީބް ވަނީ ޝަރީއަތް ނިމެންދެން އޭނާ ބަންދު ކުރަން އަމުރު ކޮށްފަ އެވެ. 

ސަބަބަކީ މައްސަލައިގައި އަންނަ ހަފްތާ އޭނާއަށް ދައުވާ ކުރަން ފޮނުވޭނެ ކަމަށް ފުލުހުން ބުނުމުންނެވެ. އަދި ލެންޑަސަން އާއި ދައުލަތާ ދެމެދު އިއުތިރާފްގެ އެއްބަސްވުމެއް ހެދުމުގެ މަސައްކަތް ވެސް ކުރަމުންދާތީ އެވެ.