އުތުރަށް މިރޭ ވެސް މޫސުން ގޯސް

ރާއްޖޭގެ އުތުރުގެ އަތޮޅުތަކަށް މިރޭ ވެސް މޫސުން ގޯސްވާނެ ކަމަށް ލަފާކޮށް ވައިޓް އެލާޓް ނެރެފި އެވެ.

މޫސުމާ ބެހޭ ގައުމީ އިދާރާއިން މިރޭ ވަނީ އުތުރުގެ އަށް އަތޮޅަށް މޫސުމީ އިންޒާރު ނެރެފަ އެވެ. މި އެލާޓް ނެރެފައި ވަނީ މިރޭ ދަންވަރު 3:00 އާ ހަމައަށެވެ.

އެލާޓުގައި ބުނެފައި ވަނީ އެ ސަރަހައްދަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައުގަދަވާނެ ކަމަށް ވެސް ލަފާކޮށްފައިވެ އެވެ.

މިއަދު ހެނދުނާއި ހަވީރު ވެސް އެ ސަރަހައްދަށް ވަނީ ވައިޓް އެލާޓް ނެރެފަ އެވެ. އަދި އުތުރުގެ ބައެއް އަތޮޅުތަކާއި މެދުރާއްޖެތެރެއަށް މެންދުރު ޔެލޯ އެލާޓް ވެސް ނެރެފައިވެ އެވެ.

މާދަމާގެ ހެނދުނާ ހަމައަށް މެޓް އޮފީހުން ނެރެފައިވާ މޫސުމާ ބެހޭ މައުލޫމާތުން އެނގޭ ގޮތުގައި މާދަމާ ހެނދުނު 6:00 އާ ހަމައަށް ރާއްޖޭގެ އެހެން ސަރަހައްދުތަކަށް ވެސް ވިއްސާރަކުރުން އެކަށީގެންވެ އެވެ. އަދި، ކަނޑުތައް ވެސް ގަދަވާނެ ކަމަށާއި، ވިލާގަނޑުގައި އިތުރަށް ގަދަވާނެކަމަށް ފާހަގަކޮށްފައިވެ އެވެ.