ރ. އަތޮޅަށް ކުރެއްވި ދަތުރުފުޅު ނިންމަވާލެއްވުމަށްފަހު ރައީސް މާލެ ވަޑައިގެންފި
މި ދަތުރުފުޅުގައި ރައީސްގެ އަރިހުގައި ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގެންނެވި އެވެ.
ރ. އަތޮޅުގެ ބައެއް ރަށްރަށަށް ކުރެއްވި ދަތުރުފުޅުތައް ނިންމަވާލެއްވުމަށްފަހު ރައީސް ޑރ. މުހައްމަދު މުއިއްޒު އެނބުރި މާލެ ވަޑައިގެންފި އެވެ.
މި ދަތުރުފުޅުގައި ރައީސް ވަނީ އެ އަތޮޅުގެ 11 ރަށަކަށް ޒިޔާރަތްކުރައްވައި، އަތޮޅު ކައުންސިލްތަކާއި ރަށު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، ރަށްރަށުގެ މުވައްސަސާތަކުގެ އިސްވެރިންނާ ބައްދަލުކުރައްވައި، އެރަށްރަށުގެ ތަރައްގީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރައްވާފަ އެވެ.
މި ދަތުރުފުޅުގައި ރައްޔިތުންނާ މުހާތަބުކުރައްވައި ދެއްކެވި ވާހަކަފުޅުތަކުގައި ރައީސް ވަނީ މި އަހަރު ސަރުކާރުން ރައްޔިތުންނަށް ހިދުމަތްކުރުމުގައި ކުރިއަށް އުންމީދު ކުރަންވީ ބައެއް ކަންކަމުގެ މައްޗަށް އަލިއަޅުއްވާލައްވައި ރައްޔިތުންނަށް ވަރަށްގިނަ އުފާވެރި އުއްމީދީ ކަންތައްތަކެއްގެ ވާހަކަ ހިއްސާކުރައްވާފައިވެ އެވެ.
އެގޮތުން އެކި ރަށްތަކަށް އެންމެ ބޭނުން ޖެހިފައިވާ ދާއިރާތަކުން މަޝްރޫއުތައް ހިންގުމަށްޓަކައި ސަރުކާރުން ދޭންޖެހޭ އެއްބާރުލުން ދޭނެ ކަމުގެ ޔަގީންކަން ކައުންސިލްތަކަށާއި ރައްޔިތުންނަށް ވަނީ ދެއްވާފަ އެވެ.
ރަށްރަށުގައި ކުރިއަށް ގެންދާ ބައެއް މަޝްރޫއުތައް ފައްޓަވައިދެއްވައި، ބައެއް ހިދުމަތްތައް ވެސް ރައީސް ވަނީ މި ދަތުރުފުޅުގެ ތެރެއިން އިފްތިތާހުކޮށްދެއްވާފަ އެވެ. .
މި ދަތުރުފުޅުގައި ރައީސްގެ އަރިހުގައި ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގެންނެވި އެވެ.
ކޮމެންޓް
Republic of Maldives