ހައުސިން މަޝްރޫއުއަށް ޖާގަދޭން މަޑުއްވަރީ އަދި މީދޫއަށް ފަޅުރަށެއް

ރ. މަޑުއްވަރީ އަދި އެއަތޮޅު މީދޫގެ ބިން އިތުރު ކުރެވެން ނެތުމުން ކޮންމެ ރަށަކަށް ފަޅު ރަށެއް ހަމަޖައްސައިދިނުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މަޑުއްވަރީގައި 50 ހައުސިން ޔުނިޓް އަދި މީދޫގައި ވެސް ހައުސިން މަޝްރޫއެއް ހިންގަވައިދެއްވުމަކީ ރައީސްގެ ރިޔާސީ ވައުދުފުޅެކެވެ. އެކަން ކުރުމަށް މިއަހަރުގެ ބަޖެޓުގައި ވެސް ވަނީ ހިމަނާފަ އެވެ.

މަޑުއްވަރީއަށް މިއަދު ވަޑައިގެން އެރަށު ރައްޔިތުންނާ މުހާތަބުކުރައްވައި ވާހަކަދައްކަވަމުން ރައީސް ވިދާޅުވީ އެރަށުގެ ފަޅުގައި ހިއްކާނެ ޖާގަ ނެތް ކަމަށެވެ. ހިއްކެން އޮތީ އެންމެ ހައެއްކަ ހެކްޓަރުކަން ފާހަގަކުރައްވަމުން ރައީސް ވިދާޅުވީ ރަށުގައި އިގްތިސޯދީ މަސައްކަތް ކުރާ ތަންތަން ފަޅު ރަށަކަށް ބަދަލުކޮށްގެން އެ ޖާގަ ލިބިގެންދާނެ ކަމަށެވެ.

އެރަށަކީ ވަރަށް ބޮޑަށް ފައިބަރުގެ މަސައްކަތް ވެސް ކުރާ ރަށަކަށްވާތީ އެއީ ސިއްހަތަށް ވެސް ނުރައްކާ ހުރި ކަމެއް ކަމުން، އެފަދަ މަސައްކަތްތައް ކައިރި އެހެން ރަށަކަށް ބަދަލުކުރުމަކީ އެންމެ ރަގަޅު ގޮތް ކަމަށް ރައީސް ވިދާޅުވި އެވެ.

އެހެންކަމުން މަޑުއްވަރީއަށް އުފުލަންދޫ އަދި މީދޫއަށް ކައިރީ އޮތް ތާވަތަ ހަމަޖައްސައިދިނުމަށް ނިންމަވާފައިވާ ކަމަށް ރައީސް ވިދާޅުވި އެވެ. މި ދެ ފަޅުރަށްތައް މިރަށްރަށުގެ އިހުތިސޯސްތެރޭ ހިމެނުމަށް ގާނޫނީ ގޮތުން ކުރަން ޖެހޭ މަސައްކަތްތައް ވަރަށް އަވަހަށް ކުރައްވާނެ ކަމަށް ވެސް ވިދާޅުވި އެވެ.

"މިރަށް ހިމެނޭ ގޮތަށް، ދެން މިދެންނެވި އެހެން ރަށްތަކުގަ ވެސް ހައުސިން ޔުނިޓް އަޅަން، ކެމްޕޭނުތެރޭ އަޅުގަނޑު އިއުލާނުކުރި ރަށްތައް ހިމެނޭ ގޮތަށް މިމަހުގެ ބާކީ މިއޮތް ދުވަސްކޮޅު، މިއަންނަ ހަފްތާ ތެރޭގަ އިރާދަކުރެއްވިއްޔާ މިރަށުގެ 50 ޔުނިޓްގެ ހައުސިން މަޝްރޫއު ހިންގަދޭނެ ފަރާތެއް ހޯދުމަށް އަޅުގަނޑު އިއުލާނުކުރާނެ ވާހަކަ ވެސް ދަންނަވަން،" ރައީސް ވިދާޅުވި އެވެ.

ރައީސް ވަނީ މަޑުއްވަރީގެ ބަނދަރު ހެދުމާއި ރަށް ގިރުމުގެ މައްސަލަ ހައްލުކުރުމާއި އަދި މަގު ހެދުން ފަދަ ވައުދުތައް ފުއްދަވައިދެއްވާނެކަން ތަކުރާރު ކުރައްވާފަ އެވެ. ދެން އެރަށަށް ވަޑައިގަންނަވާނީ މިކަންކަން ނިމި، އުފާފާޅު ކުރެއްވުމަށް ކަމަށް ވެސް ވިދާޅުވި އެވެ.