ޑެސްޓިނޭޝަން މޯލްޑިވްސް ރޯޑްޝޯ | ގެސްޓްހައުސްގެ ބޮޑެތި ރަށްތަކުގެ ކައުންސިލް ތައިލެންޑަށް

ތައިލެންޑުގައި މާދަމާ ފަށާ ޑެސްޓިނޭޝަން ރޯޑް ޝޯގައި ބައިވެރިވާން 12 ކައުންސިލަކުން 60 އަށްވުރެ ގިނަ މަންދޫބުން މިއަދު ތައިލެންޑަށް ގޮސްފި އެވެ.

އަމިއްލަ ކުންފުންޏެއް ކަމަށްވާ އެމްއައި އެޑްވަޓައިޒިން އިން ބުނީ މި ރޯޑްޝޯވްއަކީ ޓޫރިޒަމްގައި އެންމެ މުހިންމު އެއް ބައި ކަމަށްވާ ގެސްޓްހައުސް ސިނާއަތަށް ހާއްސަކޮށް ވަކި ރަށްރަށް ވަކި މަންޒިލްތަކެއްގެ ގޮތުގައި އިސްތިހާރު ކުރުމުގައި އިސްކޮށް ހަރަކާތްތެރިވާ ކައުންސިލްތަކަށް ބާއްވާ އިވެންޓެކެވެ. 

ތައިލެންޑުގައި މާދަމާ ފަށާ ޑެސްޓިނޭޝަން މޯލްޑިވްސް ރޯޑްޝޯގައި ބައިވެރިވާ ކައުންސިލުންތަކުން މިއަދު ތައިލެންޑަށް ގޮސްފި އެވެ. ތައިލެންޑުގެ ބެންކޮކްގެ އެންމެ މަގުބޫލް އެއް ޝޮޕިން މޯލް ކަމަށްވާ ސެންޓްރަލް ވޯލްޑް ޝޮޕިން މޯލްގެ އެންމެ ގިނަ މީހުން ޒިޔާރަތް ކުރާ ފެއާ ގްރައުންޑުގައި އޮންނަ މި ޓޫރިޒަމް އިވެންޓަކީ ރަށްރަށުގައި ހުރި ގެސްޓްހައުސްތައް ޕްރޮމޯޓް ކުރަން ހާއްސަކޮށް ކައުންސިލްތަކަށް ބާއްވާ ޓޫރިޒަމް އިވެންޓެކެވެ. 

އެމްއައި އެޑްވަޓައިޒިން އިން އިންތިޒާމުކޮށްގެން ކުރިއަށްދާ މި އިވެންޓުގައި 13 ކައުންސިލަކުން 60 ޑެލިގޭޓުން ބައިވެރިވެފައިވެ އެވެ. 

މާދަމަ އިން ފެށިގެން ހޮނިހިރު ދުވަހުގެ ނިޔަލަށް ކުރިއަށް ގެންދާ ބޮޑު މި އިވެންޓު ކުރިއަށް ދަނީ ޗައިނީސް ނިއުއިޔާ އާ ދިމާކޮށް ކަމަށްވުމުން ގިނަ ބަޔަކު މި ރޯޑްޝޯ އަށް ދާނެ އެވެ. މި އިވެންޓުގައި ޓްރެވަލް އެޖެންޓުންނާ ކައުންސިލްތަކުން ބާއްވާ މީޓިންތަކާއި އިންވެސްޓަރުންނާއެކު އޮންނަ ބައްދަލުވުން ތަކެއް ވެސް އޮންނާނެ އެވެ. އަދި ފެއާ އޮންނާ ތަނަކީ ސެންޓްރަލް ވޯލްޑް ކަމަށްވުމުން މިތަނަކީ އަބަދުވެސް ގިނަ ބަޔަކު ތިބޭ ތަނަކަށްވާތީ ގިނަ ބަޔަކަށް ރަށްރަށުގެ ގެސްޓްހައުސްތައް އިސްތިހާރު ވެސް ވާނެ އެވެ.

ޑެސްޓިނޭޝަން މޯލްޑިވްސް ރޯޑްޝޯގައި ބައިވެރިވާ 12 ކައުންސިލް ހިމެނޭ ރަށްތަަކަކީ ރާއްޖޭގައި އެންމެ ފުޅާކޮށް ގެސްޓްހައުސް ޓޫރިޒަމް ތަރައްގީވެފައިވާ ރަށްތަކެވެ. މި ރަށްތަކުގެ ތެރޭން ތުލުސްދޫގައި އެކަނި 250 އެއްހާ އެނދު އެބަހުއްޓެވެ. އަދި މާފުށީގައި 2800 އެއްހާ އެނދު އެބަހުއްޓެވެ. އެހެންވެ މި ރަށްތައް ތަމްސީލް ކުރަން އައި ކައުންސިލްތަކަކީ ރާއްޖޭގެ ގެސްޓްހައުސް އެނދުގެ ބޮޑު ޕަސެންޓެއް ހިއްސާ ކުރާ ރަށްތައް ކަމަށް އެ ކުންފުނިން ފާހަގަކޮށްފައިވެ އެވެ.