ޖުލައި މަސް ނިމުމުގެ ކުރިން ރ. އަދި ބ. އަތޮޅުގައި އާރްޓީއެލް ފަށާނަން: ރައީސް

ރާއްޖެ ޓްރާންސްޕޯޓް ލިންކް (އާރްޓީއެލް)ގެ ހިދުމަތް ދެން އެންމެ އަވަހަށް ގާއިމުވެގެންދާނެ އަތޮޅަކީ ރ. އަތޮޅާއި ބ. އަތޮޅުގައި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރ. އުނގޫފާރަށް ވަޑައިގެން ރޭ ވާހަކަ ދައްކަވަމުން ރައީސް ވިދާޅުވީ މި އަހަރުގެ ޖޫން މަސް ނިމުމުގެ ކުރިން ރ. އަތޮޅުގައި އަދި ޖުލައި މަސް ނިމުމުގެ ކުރިން ބ. އަތޮޅުގައި އާރްޓީއެލްގެ ހިދުމަތް ފައްޓަވައިދެއްވާނެ ކަމަށެވެ.

އުނގޫފާރަކީ ސަރުކާރުން އާބަން ސެންޓަރެއްގެ ގޮތުގައި ތަރައްގީ ކުރަން ކަނޑައަޅާފައިވާ ރަށެކެވެ. އެކަން ފާހަގަކުރައްވަމުން ރައީސް ވިދާޅުވީ މެދު އަދި ދުރު ރާސްތާ ވިސްނުންފުޅުގެ ތަރައްގީގެ މާސްޓާ ޕްލޭންގެ މަސައްކަތްތައް ކުރެވެމުން ދާއިރު، ހުރިހާ ދާއިރާއަކުން އެންމެ މަތީ ފަންތީގައި ހިދުމަތް ލިބޭ ރަށަކަށް އުނގޫފާރު ވެގެންދާނެ ކަމަށެވެ.

އެރަށުގެ ބިން ހިއްކުމުގެ މަސައްކަތް ކުރިއަށް ގެންގިސްދެއްވާނެ ކަމަށާއި، އެއަށްފަހު އެރަށުގައި 500 ހައުސިން ޔުނިޓް އަޅުއްވައިދެއްވާނެ ކަމަށް ވެސް ރައީސް ރޭ ވަނީ ވިދާޅުވެފަ އެވެ.

އަދި، ރަށުގެ ތައުލީމީ ދާއިރާއަށް ބޭނުންވާ ތަރައްގީ ހޯދައިދިނުމަށް މަސައްކަތް ކުރައްވާނެ ކަމުގެ ޔަގީންކަން ރައީސް ވަނީ ދެއްވާފަ އެވެ. އާބަން ސެންޓަރެއްގެ ފެންވަރުގައި ރަށް ތަރައްގީވެގެން އަންނައިރު، އެއް ދަންފަޅިއަށް ކިޔަވައިދެވޭނެ ގޮތަށް ތައުލީމީ ދާއިރާއަށް ބޭނުންވާ ތަރައްގީ ގެނެސްދެއްވާނެ ކަމަށް އެމަނިކުފާނު ވިދާޅުވި އެވެ.

އޭގެ އިތުރުން އެރަށުގައި ހުންނަ އުނގޫފާރު ރީޖަނަލް ހޮސްޕިޓަލް، ތިން އަހަރުގެ ޕްލޭނެއްގެ ދަށުން ޓާޝަރީ ފެންވަރުގެ ހޮސްޕިޓަލަކަށް ބަދަލު ކުރެވިގެންދާނެ ކަމަށް ވެސް ވިދާޅުވި އެވެ.

މި ހޮސްޕިޓަލަށް ރ. ބ. އަދި ޅ. އަތޮޅުގެ މީހުން ވެސް ހިދުމަތް ހޯދަން ދެއެވެ. އެހެންކަމުން އާރްޓީއެލްގެ ހިދުމަތަކީ އެ ސަރަހައްދަށް މުހިންމު ހިދުމަތެކެވެ. ހާއްސަ ގޮތެއްގައި އެއް އަތޮޅު އަނެއް އަތޮޅަށް ދަތުރުތައް ފެށުމުން އުނގޫފާރަށް ޑޮކްޓަރަށް ދައްކަންދާ މީހުންނަށް ވަރަށް ފަސޭހަވާނެ އެވެ.

އާރްޓީއެލްގެ ހިދުމަތް ދޭން ފަށާފައި ވަނީ 2022 ވަނަ އަހަރުގެ މޭ މަހު އެވެ. އެންމެ ފުރަތަމަ މި ހިދުމަތް ފެށީ ޒޯން ހައެއްގައި ހިމެނޭ ހދ. އަތޮޅުގަ އެވެ. ފުރަތަމަ ގުޅާލެވިގެން ދިޔައީ އެ ޒޯންގައި ހިމެނުނު ހއ، ހދ، ށ. އަތޮޅުގެ ރަށްތަކެކެވެ. ޖުމުލަ 41 ރަށް ގުޅާލަން ފަސް ރޫޓެއްގައި ހަތަރު ފެރީ ލޯންޗު ބޭނުން ކުރަން ފެށި އެވެ. އޭގެ ފަހުން ޅ. އަތޮޅާއި ގއ. އަދި ގދ. އަތޮޅުގައި މި ހިދުމަތް ވަނީ ފަށާފަ އެވެ.