ތާރީހީ ފެށުމެއް | ތިން އަހަރަށްފަހު ގައުމީ އެއާލައިނަށް ދިރުން، އުދުހި ޗައިނާއަށް

ރާއްޖޭގެ ގައުމީ އެއާލައިން މޯލްޑިވިއަން އިން ތިން އަހަރުގެ މެދުކެނޑުމަކަށްފަހު ޗައިނާގެ މަންޒިލްތަކަށް އުދުހުންތައް ފަށައިފި އެވެ. 

ގައުމީ އެއާލައިން އަށް ގެނައި ވައިޑް ބޮޑީ އެއާބަސް 330 ގެ ބޯޓުގައި މިއަދު ހެނދު ވަނީ ފުރަތަމަ ފަހަރަށް ޗައިނާގެ ޗެންގްޑޫ އަށް ޖައްސާފަ އެވެ. މިއީ ގައުމީ އެއާލައިން ތިން އަހަރުގެ މެދުކެނޑުމަކަށްފަހު އިންޑިއާގެ މަންޒިލްތަކަށް ނޫން އެހެން ދިމާލަކަށް ޝެޑިއުލް ފެށި ފުރަތަމަ ފަހަރެވެ. އަދި މިއީ ޗައިނާއަށް ކުރިން އުދުހުނު ނެރޯބޮޑީ މަތިންދާ ބޯޓު މިދިޔަ ސަރުކާރުން ފޮނުވާލުމާއެކު ދަތުރުތައް މެދުކެނޑުމަށްފަހު އުދުހެން ފެށުމެވެ. 

ގައުމީ އެއާލައިންއިން ޗައިނާގެ ޗެންގްޑޫއަށް ދިޔަ ފްލައިޓުން ދިވެހިންގެ ގިނަ ބައެއްގެ އިތުރުން ރާއްޖޭގައި ތިބި ޗައިނާގެ ގިނަ އަދަދެއްގެ ޓޫރިސްޓުންވެސް ވަނީ އެ ގައުމަށް ދަތުރުކޮށްފަ އެވެ. މި ބޯޓުގައި ވަޑައިގަތް ސަރުކާރުގެ އެންމެ އިސް އޮފިޝަލަކީ ކުރީގެ ނައިބް ރައީސް އަދި ފިނޭންސް މިނިސްޓަރު އަބްދުﷲ ޖިހާދު އެވެ. 

ގައުމީ އެއާލައިން އިން އަލަށް ގެނައި ވައިޑް ބޮޑީ އެއާބަސް 330 ގެ ބޯޓުގައި ޗައިނާއަށް ކުރާ މި ދަތުރުގައި ތިން މަންޒިލަކަށް އުދުހެން މިހާތަނަށް ޝެޑިއުލްގައި ހިމަނައި ޓިކެޓު އަގުތައް އާއްމުކޮށްފައިވެ އެވެ. މި ދަތުރުތަކުގައި ދާ ކޮންމެ މީހަކަށް 40 ކިލޯ ލިބެ އެވެ. މިއީ ރާއްޖޭން ޗައިނާއަށްދާ ފްލައިޓަކުން ދޭ އެންމެ ބޮޑު ބެގޭޖު އެލަވަންސެވެ. 

މޯލްޑިވިއަން އިން ޗައިނާގެ މަންޒިލްތަކަށް މިހާރު އިއުލާނުކޮށްފައިވަނީ ފްލައިޓްތައް ފެށުމާ ދިމާކޮށް ކުރިއަށް ގެންދާ އިނޯގްރޭޝަން ފެއާ ތަކެވެ. މިއީ މިހާރު ރާއްޖޭން ސީދާ ޗައިނާގެ މަންޒިލްތަކަށް ދެވޭ ގޮތަށް މިހާރު ރާއްޖޭގައި ހުރި އެންމެ ހެޔޮ ފެއާ އެވެ. މިހާރު ރާއްޖޭން އެންމެ އަގުހެޔޮކޮށް ޗައިނާއަށް ޓިކެޓު ވިއްކާ އެއާލައިންގެ ޓިކެޓުގެ އަގުވެސް ހުރީ ޓެކްސް ނުހިމަނައި 500 ޑޮލަރަށްވުރެ މަތީގަ އެވެ. އެ އެއާލައިންއިން ސިންގަޕޫރު އެއާޕޯޓުގައި ގިނައިރުތަކެއް މަޑު ކުރަން ޖެހެ އެވެ.