"ވަގު" ފޯމު ފުރީ ޑީއެންއާރް އޮފީސްތެރޭގައި ކަމަށް އެއްބަސްވެއްޖެ

ސަރުކާރު ހިންގާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެންބަރުން އިތުރު ކުރުމަށް ފޯމުތައް ފުރީ ޑިޕާޓްމެންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) އޮފީހުގެ މީޓިން ރޫމެއްގެ ތެރޭގައި ކަމަށް ބައެއް ވެރިން އެއްބަސްވެއްޖެ އެވެ.

ޕީއެންސީއަށް މީހުން އިތުރު ކުރުމަށް ފެށި ހަރަކާތެއްގެ ތެރެއިން އިލެކްޝަން ކޮމިޝަން (އީސީ) އަށް ހުށަހެޅި ފޯމުތަކުގެ ތެރޭގައި މީހުންނަށް ނޭންގި "ވަގަށް" ޕާޓީއަށް ވައްދަން ހުށަހަޅާފައިވާކަން ވަނީ ހާމަވެފަ އެވެ. އެޔާއެކު ޑީއެންއާރްގެ މީޓިން ރޫމެއްގެ ތެރޭގައި ހޯމް މިނިސްޓަރު އަލީ އިހުސާނާއި މިނިސްޓްރީގެ ވެރިން ފޯމުތަކުގެ މަސައްކަތް ކުރާ މަންޒަރު ފެންނަ ފޮޓޯތަކެއް ވެސް ވަނީ އާންމުވެފަ އެވެ.

ފުލުހުންނާއި އީސީން މައްސަލަ ބަލަމުން ދަނިކޮށް، ޑީއެންއާރުން މިއަދު ވަނީ އެ އިދާރާގެ މަސައްކަތްތަކާ ގުޅޭ ގޮތުން މައުލޫމާތު ދިނުމަށް ކަމަށްބުނެ ނޫސްވެރިންނަށް ދައުވަތު ދީފަ އެވެ. އެތަނަށް ނޫސްވެރިން ދިއުމުން އެންމެ ފުރަތަމަ ގެންގޮސްފައި ވަނީ އާންމުވެފައިވާ ފޮޓޯތަކުން ފެންނަ މީޓިން ރޫމަށެވެ. ނަމަވެސް އެތަނަށް ދިޔަ ނޫސްވެރިން ގިނަ ކަމުން އެތަނުން ބޭރަށް ނެރެ، ނޫސްވެރިންނަށް މައުލޫމާތު ދީފައި ވަނީ ބޭރުގަ އެވެ.

ނޫސްވެރިންނަށް މައުލޫމާތު ދެއްވުމަށް ވަޑައިގެންފައި ވަނީ ޕާޓީ ފޯމް ފުރަމުން ދިޔަ ކަމަށް ތުހުމަތުވާ ފޮޓޯތަކުގައި ފެންނަ ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމާއި ޑެޕިއުޓީ މިނިސްޓަރު އަހުމަދު އަލީ އެވެ. 

ނޫސްވެރިންގެ ސުވާލުތަކަށް ޖަވާބު ދެއްވަމުން އަލީ ވިދާޅުވީ ފޮޓޯތަކުން ފެންނަ މީޓިން ރޫމަކީ އެކި ކަންކަމަށް ދޫކުރުމަށް ހާއްސަކުރެވިފައިވާ، އެތަނާ ވަކިން ހުންނަ ކޮޓަރިއެއް ކަމަށެވެ. ފޯމުތައް ފުރިދުވަހު އެތަން ދޫކޮށްފައި ވަނީ މިނިސްޓްރީން އެދިގެން ކަމަށާއި ނަމަވެސް އޭނާ އެކަމުގައި ބައިވެރިވެފައި ނުވާނެ ކަމަށެވެ.

"މިނިސްޓްރީގެ ބިއުރޯއިން އެދިގެން މީޓީން ރޫމް އެ ދުވަހު ވަނީ ދޫކުރީ. އެކަން ކުރި ކަމެއް [ނޭންގެ]، މި ތަނުގެ ޕޭރެންޓަކީ ހޯމްލޭންޑް މިނިސްޓްރީ. މިއީ މިނިސްޓްރީގެ ޑިޕާޓުމަންޓެއް," ތުހުމަތުތައް ދޮގުކުރައްވަމުން އަލީ ވިދާޅުވި އެވެ.

މާޖިދު ވިދާޅުވީ އެ ފޯމުތައް ފުރި ދުވަހު މީޓިން ރޫމު ނަގަން ހުށަހަޅާފައި ވަނީ މިނިސްޓްރީގެ ބިއުރޯ މެދުވެރިކޮށް ކަމަށެވެ. އެ ކޮޓަރި ދޫކުރާއިރު ދޫކުރާ ސަބަބު ބަލާފައި ނުވާ ކަމަށެވެ.

އެ ކޮޓަރީގައި ފޯމުތައް ފުރި ކަމަށް އެއްބަސްވިޔަސް، އެކަމުގައި މި ދެ ބޭފުޅުން ބައިވެރިވާ ކަމަށް ދެކެވޭ ވާހަކަތައް ވަނީ ދޮގުކޮށްފަ އެވެ. ތަކުރާރުކޮށް ނޫސްވެރިން ސުވާލު ކުރުމުން ވެސް އެކަމަށް ވަނީ އިންކާރު ކޮށްފަ އެވެ. އަލީ ވިދާޅުވީ އޭނާ އެދުވަހު އެތަނަށް ދިޔައީ ޕިއްޒާ ކެއުމަށް ކަމަށެވެ. އެނޫން އެހެން ކަމެއްކުރާ ފޮޓޯއެއް ނުފެންނާނެ ކަމަށެވެ. 

ޑީއެންއާރްގެ ޑޭޓާ ބޭސް ބޭނުންކޮށްގެން "ވަގަށް" ޕީއެންސީއަށް މެންބަރުން އިތުރު ކުރުމުގެ މަސައްކަތް ކޮށްފައިވާކަމަށް ޕީއެންސީން ވެސް ވަނީ އެއްބަސްވެފަ އެވެ. އެއީ އެޕާޓީއަށް އެނގެގެން ކޮށްފައިވާ ކަމެއް ނޫން ކަމަށާއި، އެ މައްސަލަ ބަލަމުންދާ ކަމަށް ވެސް ބުނެފައިވެ އެވެ.

ސައްހަ ނޫން ފޯމުތަކުގައި ބޭނުންކޮށްފައި ހުރީ މީހުންގެ އައިޑީކާޑު ފޮޓޯ އެވެ. އެމީހުންގެ ސޮޔާއި ފިންގާ ޕްރިންޓް ވެސް ފޯޖުކޮށްފައިވާ ކަމުގެ ތުހުމަތު ވަނީ ކޮށްފަ އެވެ.