ސައުދީން ހަދިޔާކުރި ކަދުރު ބަހަން ފަށައިފި

މިއަހަރަށް ސައުދީން ރާއްޖެއަށް ހަދިޔާކުރި ކަދުރުތައް ބަހަން ފަށައިފިއެވެ.

އިސްލާމީ ކަންތައްތަކާބެހޭ ވުޒާރާއިން ބުނެފައިވަނީ އަންނަ މަހުގެ ހަވަނަ ދުވަހުގެ ނިޔަލަށް ކޮންމެ ދުވަހެއްގެ ހެނދުނު 9:30 އިން މެންދުދުރުފަހު 13:00 އަށް އިސްލާމީ މަރުކަޒުގެ ޖަލްސާކުރާ މާލަމުގައި ކަދުރުބެހުން ކުރިއަށްދާނެ ކަމަށެވެ.

ސައުދީން ވަނީ މިއަހަރުވެސް 50 ޓަނުގެ ކަދުރު ރާއްޖެއަށް ހަދިޔާކޮށްފަ އެވެ. ރޯދަމަސް ފެށުމުގެ ކުރިން މިކަދުރުތައް ބަހައި ނިންމާނެކަމަށް މިނިސްޓަރު ޑރ. މުހައްމަދު ޝަހީމް އަލީ ސައީދު މީގެ ކުރިން ވިދާޅުވެފައިވެއެވެ. އަދި މިސްކިތްތަކުގައި އިފްތާރު ޕްރޮގްރާމް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭނެ ކަމަށްވެސް ވަޒީރު ވިދާޅުވެފައިވެއެވެ. 

ރޯދަމަހާއި ދިމާކޮށް ސައުދީން ރާއްޖެއަށް ކަދުރު ހަދިޔާކުރުމަކީ ވަރަށް ކުރީންސުރެން ހިނގަމުން އަންނަ ކަމެކެވެ. ރައީސް މައުމޫން އަބްދުލްގައްޔޫމްގެ ޒައާމަތުގައި މިކަދުރުތައް ބަހަމުންދިޔަ ގޮތާމެދު ތައުރީފުކޮށް ވަރަށް ގިނަ ބަޔަކު ކަދުރު ބަލައިގަންނަމުން ދިޔަނަމަވެސް، ފަހަކަށް އައިސް ކަދުރު ބެހުމުގައި އަމަލުކުރަމުންދާ ގޮތާމެދު މިފަހަކަށް އައިސް އާންމުންގެ ތެރޭގައި ހިޔާލު ތަފާތުވުން އުފެދިފައިވާލެއް ބޮޑުކަން ފާހަގަކުރެވެއެވެ.