ޑިވްލޮޕްމަންޓް ބޭންކުގެ މަސައްކަތް 3 މަރުހަލާއަކަށް، މި ކުއާޓާގައި ނިމޭނެ

މޯލްޑިވްސް ޑިވްލޮޕްމަންޓް ބޭންކް (ޑީބީއެމް) އިން އިންވެސްޓްމަންޓްތައް ފެށުމުގެ މަސައްކަތް ތިން މަރުހަލާއެއްގައި ކުރަމުންދާ ކަމަށާ އެ މަސައްކަތްތައް މި އަހަރުގެ ފުރަތަމަ ކުއާޓަރުގައި ނިމެނޭނެ ކަމަށް އިކޮނޮމިކް މިނިސްޓްރީން ބުނެފި އެވެ.

ރާއްޖޭގައި ފުރަތަމަ ތަރައްގީ ކުރި އިންވެސްޓްމަންޓް ބޭންކް، ޑީބީއެމްގެ މަސައްކަތުގެ އަޕްޑޭޓެއް ދެއްވމުން މިނިސްޓަރު މުހައްމަދު ސައީދު ވިދާޅުވީ މިހާރު ކުރަމުން ގެންދަނީ އިންސްޓިޓިއުޝަނަލް ސެޓަޕްގެ މަސައްކަތްތަކާއި ބިޒްނަސް މޮޑެލް އެކުލަވައިލުމުގެ އިތުރުން ޑިވެލޮޕްމެންޓް ބޭންކުގެ ސިޔާސަތުތައް އެކުލަވައިލުމުގެ މަސައްކަތްތެކެވެ. އެ މަސައްކަތްތައް މި އަހަރުގެ ފުރަތަމަ ކުއާޓަރުގައި ނިމޭނެ އެވެ. 

ރާއްޖޭގެ ފުރަތަމަ ޑިވްލޮޕްމަންޓް ބޭންކް އިފްތިތާހުކޮށްދެއްވީ މިދިޔަ އަހަރުގެ ނޮވެމްބަރު 16 ވަނަ ދުވަހު އެވެ. ބޭންކް ހިންގަން ފަށަން ސެޓަޕްހަދައި އަމަލީ ގޮތުން ފައިނޭންސް ދޫކުރަން ފެށުމުގެ މަސައްކަތް ކުރަނީ ރާއްޖޭގެ ފުރަތަމަ މަރުކަޒީ ބޭންކް ހިންގި އުމަރުޝޮޕިން އާކޭޑް ހުރި އިމާރާތުގެ ތިރީގަ އެވެ. 

މޯލްޑިވްސް ޑިވްލޮޕްމަންޓް ބޭންކް (ޑީބީއެމް) ގެ ސީއީއޯ ނޮއެލް ގްރެގާ ޕެޓާސަން ޖޯންސް ވިދާޅުވެފައިވާ ގޮތުގައި މި ބޭންކްއަކީ ރާއްޖެއަކީ ތަރައްގީވެފައިވާ ގައުމަކަށް ރާއްޖެ ހެދުމަށް އެންމެ މުހިންމު ދައުރެއް އަދާކުރާނެ ފަރާތް ކަމަށާ ބޭންކް ކުރިމަގުގައި ވެގެންދާނީ ރާއްޖޭގެ ތަރައްގީގެ މުހިންމު ބައިވެރިޔާގެ ގޮތުގައި ކަމަށެވެ. ރައީސް ޑރ. މުހައްމަދު މުއިއްޒުގެ ތަސައްވުރު ކަމަށްވާ ރާއްޖެ 2040 ވަނަ އަހަރު އެންމެ ތަރައްގީވެފައިވާ ގައުމަކަށް ހެދުމުގެ ތަސައްވުރަށްދާން މި ބޭންކުން މުހިންމު ރޯލެއް ކުޅޭނެކަން އޭނާ ފާހަގަ ކުރެއްވި އެވެ.

"ރާއްޖެ އަށް މާލީ ދަތިތަކެއް އެބަހުރި. އިމާރާތްކުރުމުގެ ދާއިރާގައި އިންވެސްޓްމެންޓް މަދުވުންފަދަ ދަތި ތަކެއް ވެސް އެބަހުރި. ރާއްޖޭގެ ދަރަނި މަތިވުމުގެ މައްސަލަ ވެސް އެބައޮތް. ޑިވެލޮޕްމެންޓް ބޭންކާއެކު މާލީ ހާލަތު ރަނގަޅުކޮށް، މަޝްރޫއުތަކަށް އިންވެސްޓަރުން ހޯދައިދީ އިމާރާތްކުރުމުގެ ދާއިރާ އަށް ދިރުން ގެނެސްދޭނެ،" ބޭންކިން އާއި ފައިނޭންސިން ދާއިރާގެ ތަޖުރިބާކާރު ވިދާޅުވި އެވެ.

އޭނާ ވިދާޅުވީ ޑީބީއެމް ވެގެންދާނީ ބޮޑެތި އިންވެސްޓްމަންޓްތަކަށް އެހީތެރިކަންދޭ ބޭންކްއެއްގެ އިތުރުން ރާއްޖޭގެ މެދުފަންތީގެ ވިޔަފާރިތަކަށްވެސް ދިރުން ގެންނަ ފަރާތްތަކަށް ކަމަށެވެ. މިކަމުގައި ބޭންކް މަސައްކަތް ކުރާނީ އިންޓަނޭޝަނަލް ޕާޓްނަރުންނާއެކުގައިކަން އޭނާ ފާހަގަ ކުރެއްވި އެވެ.  

ރާއްޖޭގެ ބޮޑެތި އިންވެސްޓްމަންޓްތަކަށް ފައިނޭންސް ހޯދަން އިންގިލާބީ ބަދަލެއް ގެނެސް ކުރިއަރުވަން ޑިވްލޮޕްމަންޓް ބޭންކެއް ހެދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން މި ބޭންކް އުފައްދާފައިވަނީ މިދާއިރާއިން ދުނިޔޭގެ ފެންވަރުގައި ފާހަގަކޮށްލެވޭ ފަރާތްތަކާއެކުގަ އެވެ. އެގޮތުން ޑިވެލޮޕްޕްމަންޓު ބޭންކުގެ ސީއީއޯގެ މަގާމަށް އައްޔަންކުރީ އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސް އެވެ. ޗެއާޕާސަންގެ މަގާމަށް އައްޔަންކުރީ ސިންގަޕޫރުގެ ރައްޔިތެއް ކަމަށްވާ އަރުނީ ގުނެތިލަކަ އެވެ. މި ދެބޭފުޅުންނަކީ ވެސް ދުނިޔޭގެ މާލީ އިދާރާތަކުގެ އިސް މަގާމު ތަކެއް ފުރުއްވާފައިވާ ބޭފުޅުންނެވެ. މީގެ އިތުރުން ބޯޑުގައި ހިމެނިވަޑައިގަންނަވަނީ އަހްމަދު އަލީ - މއ. ވޭސައިޑް 805 ފްލެޓް އާއި ސިންގަޕޫރުގެ ސައީދު އަބްދުއްނާސިރު ބިން ސައީދު ހަސަން އަލް ޖުނެއިދު އާއި އިނިގިރޭސިވިލާތުގެ ރޮބަޓް ޑުނިއެލް ކާންޓް އެވެ.