ޓޫރިޒަމް 10 ޕަސެންޓުގެ ކުރިއެރުމެއްގައި | ޑެއިލީ އެރައިވަލް 6،000 އިން މަތި

ރާއްޖެއަށް މި އަހަރުގެ މިހާތަނަށް ޒިޔާރަތް ކުރި ޓޫރިސްޓުންގެ އަދަދު ގާތްގަނޑަކަށް 10 ޕަސެންޓުގެ ކުރިއެރުމެއްގައި އޮތްއިރު، ރާއްޖެ ދުވާލަކު އަންނަ ޓޫރިސްޓުންގެ އަދަދު 6،000 އިން މައްޗަށް ޖެހިލައިފި އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މި އަހަރުގެ މިހާތަނަށް ރާއްޖެއަށް ޖުމްލަ 117,532 ޓޫރިސްޓުން ވަނީ ޒިޔާރަތްކޮށްފަ އެވެ. މިއީ މިދިޔަ އަހަރު އައި 107,119 މީހުންނާ އަޅާބަލާއިރު ގާތްގަނޑަކަށް 10 ޕަސެންޓުގެ އިތުރުވުމެކެވެ. ރާއްޖެ އަށް އެންމެ ގިނައިން ޓޫރިސްޓުން އަންނަ މި ދުވަސްވަރު ދުވާލެއްގެ މައްޗަށް އަންނަ ޓޫރިސްޓުންގެ އަދަދު ވަނީ އިތުރުވެފަ އެވެ. މިގޮތުން މިދިޔަ ހޮނިހިރު ދުވަހު ރާއްޖެއަށް 8,031 ޓޫރިސްޓުން ޒިޔާރަތް ކުރިކަމަށް ހިސާބުތަކުން ދައްކަ އެވެ. 

މި އަހަރުގެ މިހާތަނަށް ބަލާއިރު އެންމެ ގިނަ ޓޫރިސްޓުން ޗުއްޓީ ހޭދަކުރަމުން ގެންދަނީ ރާއްޖޭގެ ރިސޯޓްތަކުގަ އެވެ. ރާއްޖެ އަންނަ ޓޫރިސްޓުންގެ 70 ޕަސެންޓު ޗުއްޓީ ހޭދަކުރަމުންދަނީ ރިސޯޓްތަކުގައި ކަމަށް ޓޫރިޒަމުން މި އަހަރު އަލަށް ނެރެން ފެށި ޓޫރިޒަމް ހިދުމަތްދޭ ތަންތަނަށް އައި ޓޫރިސްޓުންގެ އަދަދުން އެނގެ އެވެ. 

މި އަހަރުގެ މިހާތަނަށް ބަލާއިރު އެންމެ ގިނައިން އައިސްފައިވަނީ ރަޝިއާ މީހުންނެވެ. އެ ގައުމުން ދަނީ ރާއްޖެ އަންނަ ޓޫރިސްޓުންގެ 13 ޕަސެންޓް ހިއްސާއެއް ކުރަމުންނެވެ. މިހާތަނަށް ރަޝިއާއިން 15,077 ޓޫރިސްޓުން އައިސްފައިވެ އެވެ. އަދި އިޓަލީއިން 12,560 މީހުން އައިސްފައިވާއިރު ޗައިނާ ޓޫރިސްޓުންގެ އަދަދު އުޅެނީ 11,560 ގަ އެވެ. 

މިދިޔަ އަހަރަކީ ރާއްޖޭގެ ޓޫރިޒަމަށް ކާމިޔާބު އަހަރެކެވެ. މިދިޔަ އަހަރު ރާއްޖެއަށް ދެ މިލިއަން ޓޫރިސްޓުން އައިސްފައިވާއިރު ޓޫރިޒަމް ފެސިލިޓީތަކުގެ އޮކިއުޕެންސީ ވެސް ވަނީ އިތުރުވެފަ އެވެ. އަދި ޓޫރިސްޓުން ރާއްޖޭގައި ތިބޭ މުއްދަތުވެސް އިތުރުވެފައިވާތީ އާމްދަނީވެސް އިތުރު ވެގެންދާނެ އެވެ.