ދުނިޔެއިން އަލަށް ރެކޯޑު ކުރެވުނު މަހެއް ރާއްޖޭން ފެނިއްޖެ

ދުނިޔެއިން އަލަށް ރެކޯޑު ކުރެވުނު މަހެއް ދިވެހިރާއްޖެ އިން އަނެއްކާވެސް ފެނިއްޖެ އެވެ.

މި މަހަށް ދީފައިވާ ސައިންޓިފިކް ނަމަކީ "ޕްލެކްޓްރަންތިއަސް ރަކި" ކަމަށެވެ. ދިވެހި ނަމަކަށް ދީފައި ވަނީ "ރަކި ބުރަކި" އެވެ.

މެރިން ޖާނަލް މޯލްޑިވްސް އިން ބުނީ ރަކި ބުރަކި ފެނިފައި ވަނީ ކަނޑުގެ އަޑިން އަލި ފަނޑުވާ ހިސާބުން ކަމަށެވެ. އެއީ 100 މީޓަރާއި 125 މީޓަރާ ދެމެދުގެ ފުންމިނުންނެވެ. މި ފުންމިނަކީ ވަރަށް ތަފާތު ދިރުންތަކެއް އުޅޭ ހިސާބެއްކަން މިފަދަ ހޯދުންތަކެއް ސާބިތުކޮށްދޭ ކަމަށް ވެސް އެފަރާތުން ވަނީ ބުނެފަ އެވެ. 

މި މަސް ހޯދިފައި ވަނީ ބޭރުގެ ސައިންޓިސްޓުންނާއި ރާއްޖޭގެ މެރިން ރިސާޗް ސެންޓަރުން ގުޅިގެން ކުރެވުނު ދިރާސާއެއްގެ ތެރެއިންނެވެ. މި މަސް ފެނިފައި ވަނީ އަރި އަތޮޅު އުތުރުބުރިން ފެށިގެން ނިލަންދެ އަތޮޅު ދެކުނުބުރީގެ ސަރަހައްދުގައި ހިމެނޭ ފަރުތަކުންނެވެ. 

ހަމައެކަނި ރާއްޖޭން ފެނިފައިވާ މި މަހަށް "ރަކި ބުރަކި" ނަން ދެވުނީ މިއީ ޑައިވަރުން ފެންނަ އިރަށް އަވަހަށް ފިލާ މަހެއްކަން ދިރާސާ ކުރި ފަރާތްތަކަށް ހާމަވުމުން ކަމަށް މެރިން ޖާނަލް މޯލްޑިވްސް އިން ބުންޏެވެ. 

"އެކަން މި މަސް ކުރަނީ ރަކިކަމާ ގުޅުވައިގެން ކަމަށް ބަލައި މިމަހަށް ރަކި ބުރަކި ކިޔުނީ،" 

މި މަހަކީ ދޭއް ނުވަތަ ތިން އިންޗިއަށް ބޮޑުވާ މަހެއް ކަމަށް ވަނީ ރެކޯޑުކޮށްފަ އެވެ. ބުރަކީގެ ތަފާތު ވައްތަރުތައް ރާއްޖޭން ފެނިފައިވާއިރު މިއީ ތަފާތު ކުލަތަކެއްގެ މަހެކެވެ.