ރަށު ޓޫރިޒަމް އިސްތިހާރު ކުރަން އަންނަ މަހު ރާއްޖޭގައި ބޮޑު ފެއާއެއް

ރާއްޖޭގެ ޓޫރިޒަމްގައި އެންމެ ހަލުވިކޮށް ތަރައްގީވަމުންދާ ގެސްޓްހައުސް ވިޔަފާރިއަށް ހާއްސަކޮށް އަންނަ މަހު "ރަށު އެކްސްޕޯ" އެއް ބާއްވަން ތައްޔާރު ވެއްޖެ އެވެ. 

މާކެޓިން ކުންފުންޏެއް ކަމަށްވާ ދަ ތްރެވަލް ގައިޒް އިންތިޒާމު ކުރާ އެކްސްޕޯއަކީ ދިވެހިރާއްޖޭގެ ރަށްތަކުގެ ރީތިކަމާއި ސަގާފަތާއި އެކިއެކި ހަރަކާތްތައް ދައްކުވައިދޭގޮތަށް ރާއްޖޭގައި ފުރަތަމަ ފަހަރަށް އިންތިޒާމުކުރާ މިބާވަތުގެ ފުރަތަމަ އެކްސްޕޯއެވެ.

 "ރަށު އެކްސްޕޯ 2025" ބޭއްވުމަށް ހަމަޖެހިފައިވަނީ، އަންނަ ފެބުރުއަރީމަހުގެ 13 އިން 15 އަށް ހުޅުމާލޭ ސެންޓްރަލް ޕާކްގަ އެވެ.

މި އެކްސްޕޯ ތެރޭގައި ގެސްޓް ހައުސް އަދި އެހެނިހެން ލޯކަލް ޕެކޭޖްތައް ވިއްކާލުމުގެ ފުރުސަތު ލިބިގެންދާއިރު، އަތޮޅުތެރޭގެ ރަށްތަކުގެ މީރު އެކި އެކި ކެއުންތަށް ދައްކާލާ، އިޝްތިހާރުކުރެވި އަދި ވިއްކާލުމުގެ ފުރުސަތުވެސް ރަށު އެކްސްޕޯގެ ތެރެއިން ފަހިވެގެން ދެއެވެ.

ޓޫރިޒަމް ހިސާބުތައް ދައްކާ ގޮތުގައި މިވަގުތު 825 ގެސްޓްހައުސްގައި 13,837 އެނދު އެބަހުއްޓެވެ. މިވަގުތު މި ވިޔަފާރި ރާއްޖޭގެ 10 އަތޮޅެއްގެ 117 ރަށެއްގައި ކުރަމުންދެ އެވެ.